|
EK'LESİA AİA İRİNİ
Aia İrini ren mcveşi Bizant’iuri ek’lesia, namuk na dgin Topkapişi Sarayiş avlas. İrişen didi Bizant’iuri ek’lesia yado içkinen. Maotxani oş3’anuraşi moç’k’apes K’onst’ant’inus maartanişi (324-337) oras gedgineri ren. Aiasofia k’ala artneri avlaşi k’idapeş şkas gedgineri na ren Aia İrinik koz’iru p’at’i ndğalepe. 532-s na yeçkindu Nik’aşi tiezdobas iç’vu. İmp’arat’ori Justinianosik nok’idapu Aiasofia k’ala Aia İriniti ağneburot. Mara 8. do 9. oş3’anurapes na yeçkindu dixaşk’ank’alapeten dido beciti zararepe aqu binas. Bizant’iurepek p’at’rikxanaşi şap’eli na ucoxopt’es Aia İrini doskidu Sultanuri k’idapeş doloxe, namuk na go3’k’ondun Topkapişi Sarayi, Mp’olis xe geidvinuş k’ule. Am sebebiten var goiktinu meçetişa. Emuşeni var z’iru dido beciti arkit’ekt’uruli goktiroba. İxmarinu doloxeni cepxane do Malimobaş Nazirobaşi silaxişi dep’ot.
Ahmet masumanişi xe3alas, Osmanuri dobadonaşi çkvadoçkva svapeşen moncğoneri xvenape, “mcveşi silaxepeşi k’olek3iape” do “mcveşi xvenapeşi k’olek3iape” coxoten jur çkva burmes ok’ibğinu Aia İrinis. Am muzeumi itirinu “Çinoni K’oşk’i”şa 1875-s. 1908-s, akonaşisti ik’idinu ağani ar malimuri muzeumi. Am muzeumik xizmet’i meçu xalk’is 1949-şakis, malimuri muzeumot. 1974 do 1976 3’anapeşi şkas na ixvenu dulyapeten, t’enişen opağu şeni, gomorgva muşis let’aşi mepşalape itirinu. Andğas muzeumi na ren Aia İrinik oxormancoba ikips uk’ore3xu xeşnoxvenuri oseyrobas 1973 şen doni.
|
TÜRKÇE
