|
REJİSORİ GEORGİ DANELİA
Georgi Danelia dibadu Tbilisis 25 Mariaşina 1930-s. 1939-şen doni muşi ocaği skidu Mosk’ovas, so na Daneliaşi baba rt’u şefi injineri Mosk’ovaş met’roşi sist’emas. Daneliaşi babak iqu nişanoni generali. Edo iust’at’u dolont’raluri met’roşi sist’emapes Sovieturi oktalobaşi. Muşi nana rt’u sat’ranciş masterale. Uk’açxeti ixandu majurani direkt’orot Mosfilmis. Daneliaşi nanaşda Verik’o Andcap’ariz’e kimoceri rt’u Mixeil Ç’iaureli k’ala, namuk na rt’u xolosoni megabre St’alinişa. Daneliak 3’oxle dip’loma ezdu Mosk’ovaşi Ark’eologiaş İnst’ut’işen. Ok’ule ik’itxu Mosfilmişi mağali rejisorobaşi k’ursis. Edo Mixail Rommik go3’ancğonet’u emus. 1959-s gamaxtu ekolen do iqu filmişi rejisori Mosfilmişi Mosk’ovaş st’udios.
Maartani gecginoba aqu İgor T’alank’ini k’ala. Entepeşi filmi “Seryozha”s niçinu k’rist’ali burti 1960-s K’arlovi Varis. Ok’uleti ixandu Gennadi Şp’alik’ovi k’ala Mosk’ovuri skidalaşi jin. Mara sansurişi burok var meçu gza am filmişi iptineri t’ekst’is. Uk’açxe “Goxtimu Mosk’ovaşi kuçapes” coxoni filmi yişiğinu 1963-s. Nik’it’a Xruşçovi geit’k’oçinu xe3alaşen Leonid Brejnevişk’elen. Edo ağani p’eriodi kogeç’k’u Sovieturi dobadonas. Daneliaşi dido iqoropineri k’omedia “33” (1965) ignapinu ant’i-Sovieturi KGB-şk’elen.
Edo Danelias var axvenu çkar mutu filmi otxo 3’anaş morgvalis. 1969-s na yeşiğu filmişi coxo rt’u “Mo geimzule”. Yeşiğu muşi ust’at’uri k’omedia “Bedişi Dudp'axonepe” 1972-s, “Afonia” 1975” do “Mimino” 1977-s. Aşopetenti naqonu muşi gecgineri k’arieras. K’omediaşen ekole ar k’uçxeş ot’k’oçu iz’iren “Osenny Marafon”-s 1979-s. Aya ren melodrama, namuk na meçaps ambarepe ar k’oçişen. Am k’oçi ren oşkendas muşi skidalaşi do jur oxorcaş qoropaşi. 1986-s na yeşiğu filmi ren “Kin-Za-Za”. Mara aya filmi ren muşi çkineri ğaraşi gale. Mteli ren çkvaneri am met’aforuli filmis. Daneliak yoçkindu molaşinobaşi kiana. Muşi maartani çili rt’u Lyubov Sok’olova (1921- 2001) namuk na osağu 370 filmuri roli. Edo amaxtu Guinnesişi rek’ordepes. Entepeşi biç’i Nik’olai Daneliati (1958- 1985) rt’u filmiş direkt’ori, namuk na doğuru t’ragediulot. Georgi Danelia andğas skidun Mosk’ovas.
|
TÜRKÇE
