|
K'OLXOBA.ORG SUM 3'ANERİ İQU…
K’olxuri minobaşa do am minobaşi nenape Lazuri do Margaluris omxvacu şeni na oç’andinaps sait’i çkini “k’olxoba” sum 3’aneri iqu. K’olxuri k’ult’uraşi maanderoba do K’olxuri nenapeşi maemanetobaş şuuri na uğun sait’i çkinik mesuli maç’andinobaşi misali meçamuşa naqonops. İst’oriuli minoba çkini K’olxepeşen ebzdit, andğanerdğas Lazi-Margali coxote pskidut, moxtanoras Lazi-Margali minobate bğuraten, K’olxuri k’ult’urate kimineri voret do çkini minobaşen met’a ofisialuri çkar minoba k’abuli var vikipt yado slogani go3’adgeri “k’olxoba”k ok’vak’idu muşis naqonops.
Na nik’arbas xalk’i k’ala k’ult’urati na yeç’k’odun varna asimilasionik xalk’i ofisialuri k’ult’urate na zaps k’aixeşa na uçkin “k’olxoba”k, xalk’i oqopinuşi şuuri do asimilasionişa medgituşi şurite icedels. Xalk’i oqopinuşi şuuri, nena do ist’oriaşi omancelu, k’ult’ura oşinaxute moxtanoraşa nunç’işinu tkvala ren ya zop’ons. Nasionaluri mogapa mutepe şeni K’olxuri k’ult’ura do minoba na ixmarnanpeşa izni var meçaps, diasp’ora yeçkindu şeni na ixandeps p’at’inobaşi merkezepe k’ala dulya var uğun, oirkianuri k’idalapeşen çkar mutu var meşvens, oxen3alepeşa mxuci var nodumers do arxvala minoba do k’ult’ura muşişi mencelite oç’andinaps.
Antik’uri K’olxuri k’ult’uraşi na iğarğalen nenape Lazuri do Margaluri oç’andinu şeni sum 3’anaşen doni na ixandeps “k’olxoba”k, p’roget’epe isimadeps, o3’k’aşi teklifepe ognapaps, goşo3’k’en do goşogorups. Sum 3’aneri tecrube muşite, Lazuri do Margaluri arxvala folk’loruli vardo ak’ademiuriti na iç’arinenşi ispati ikips. K’olxuri k’ult’uraş omanceluşi şuurite am k’ult’uraşi qoroperi nenape imxvacinas do oşkendari noğirate guri geidvinasna k’ult’uruli xak’epe moiginen do şerefoni iskedinen yado ognapaps.
Çkin k’arari meçameri voret, Ğormotik bolaki mo3’iran.
|
TÜRKÇE
