|
OKORTURAŞİ RESP'UBLİK'A
Okorturaşi Resp’ublik’a, Uçazoğaşi yulva p’icis, Omjore K’avk’asias gedgimeri ren. Mcveşi Sovieturi resp’ublik’apeşen ar teri na ren Okorturaşi gulvaş k’ele Abxaziaşi Resp’ublik’a, olandeş k’ele Rusiaşi Federasioni, omjoreş k’ele Azerbaycani do Sumexia do omjoregulvaş k’ele Turkia golodgin. Nananoğa Tbilisi, dixaşzoma 57.100 k’m2, nak’onoba 3.880.000 adami na uğun Okorturaşi beciti majura noğape ren; Kutaisi, Zugdidi, Poti, Batumi, Rustavi, Telavi, Gori, Ambrolauri, Ozurgeti, M3xeta do Axal3ixe.
Oş3’anurapeşen doni Farsepe, Bizansiurepe, Moğolepe, Osmanurepe do Rusepe k’ala na ik’abğu Okorturaşa, 1801 3’anas Rusiaş k’elen xe geidvinu. 1918- 1921 3’anapeş oşkendas Okorturaşi Demok’rat’iuri Resp’ublik’a coxoni timoşletineri oxen3ale geidginu. 1921 3’anas dobadonaşa Mç’ita Armia kamaxtu do Okortura, Sovieturi resp’ublik’apeşen ar teri koniktu. Okorturaşi Sovieturi Sosialist’uri Resp’ublik’a, Sovieturi Artoba na guşibğu 1991 3’anaşakis kort’u. Okorturak, 9 İgrik’a 1991 tariğis timoşletineroba muşi ognapu.
Okorturaşi Uçazoğaşi p’ici do Rionişi havzas çuçuna, t’anoni do gverdi t’rop’iuri, yulva k’elesti umosi qini t’aroni iz’iren. Qinoraşi dros qini do mapxaşi drosti xomula do çxvapa iqven. Okorturas p’et’roli do gazi m3ika uğun. Dobadonas na gamiğinen minarelepe ren manganezi do perlit’i. Edo xolo dobadonas uğun kianas çinoberi mek’aoni 3’k’arepe do abanope.
Okorturaşi ofisialuri nena Kortuli ren. Omjore K’avk’asiuri nenapeşi grup’işen Kortuli, Margaluri-Lazuri do Svanuri na ğarğalaps adamepek didonoba 3’opxupan. Omjore K’avk’asiuri nenapeş mağarğalepeşi nispet’i ren %71. Okorturas Kortuli k’ala xolo omjore k’ortapes Aç’aruli, Sumexuri; omjoreyulva k’ortapes Azeruli, Batsuri nenape iğarğalen. Okorturaşi nak’onoba 3’opxups Kortu, Margal-Lazi, Svani, Aç’ari xalk’epe k’ala Azerepe do Sumexepek. Dobadonas edoçkva; Asurepe, Çaçanepe, Çinurepe, Yahudepe, Yunanepe, K’abardeyepe, Kurdepe, Zazape, Tatarepe, Turkepe do Uk’rainurepe steri ç’it’a grup’epeti skidun.
Okorturaşi xalk’i didopete Ortodoksi Krist’iani ren do nak’onobaşi %81,9 k’onari mek’ireli ren Okorturaşi Ortodoksuri Ek’lesiaşa. Religiuri m3ikanobape ren; Muslimanepe (%9,9), Sumexi Ap’ost’olik’epe (%3,9) do K’at’olik’epe (%0,8). Okorturaşi Yahudepe renan kianaşi irişen menceloni Yahudi cemaat’i.
|
TÜRKÇE
