|
P'İT'İ P'İT'İ BİBİ
Bibi ren Anatinaeşi tudeni familiaşen do perde k’uçxoni, 3’k’arişi k’vinçi. 3’emagi sotepes skidun. Xazi aqven emus t’iba do ç’anç’axonaş kinarepe. Manişa na diben ğali do zuğas na skidun sort’epe muşiti iz’iren. Oskedinu muşi perpu ren. Turkias na iz’iren bibepe ren melezi. Galeni dobadonapes oxomçvaleri K’amp’bel, P’ekini, Rueni steri paği di3xironepeti iz’iren. Oxomçvaleri bibi ren yeçkindineri, mt’k’uri jvaridudonişen. Lat’ara k’ik’ili do perdoni k’uçxoni ren. P’it’i p’it’i gulun do vak’ vak’ yado nena eşimers. Mtel antepe ren bibişi irişen dido na içkinen muşiurobape. Mk’ule k’uçxepe muşi uğun xura muşişi k’ap’ulaş k’ele. Emuşeni gulut’aşi naç’iren. Kimoli ren dadulişen didi do şat’afat’oni. Bibi imgvanen qinora do pukrinoras do emuşeni xor3i muşi nostoneri iqven. Mt’k’uri bibi iç’opinen didote qinora do pukrinoras. Oxoruli bibi iskedinen xor3i, markvali do k’ivran3’a şeni. Qini do mç’imaşa nuxondun. Kimoli bibişi bundğape ren çxant’eri do peroni. Qali muşiti ren jvari. Xçe, jvari, k’urşumuri, cğat’a, uça bundğapek omskvanaps bibişi xura. Dadulişi bundğape ren umosi uçxant’eri do m3ika peroni. Kimolişi bundğape dibğen monç’inoras. Dadulişi bundğape steri, k’ap’reşaşi bundğape aqven kimolisti. Bundğape ren gesvareli artikartiş jin. Emuşeniti 3’k’ari var amulun doloxeni burmepeşa. Amaxtas tina, bundğape muşi ğli3’i na ren şeni, 3’k’arişen gamaxtaşi arşvacis doxomun. Bibik k’udeliş jileni mbelapeşen yaği ezdips k’ik’ili muşite do bundğape muşis non3’aps do aşopeten bundğape aqven ğli3’i.
Bibi ren k’ai mamçvire do mageont’ane. K’ap’ula muşi jinşen gebaz’geri ren, gurp’ici galegamaxtimeri uğun. Feluk’as nungaps. Muşi k’ik’ili ren mçire do lat’ara. K’ik’ili muşiş jin motvaleri ren t’k’ebite, namuk na ren xampa xuçete. K’ik’ilişi jur k’ele ren endra-gendra. 3’k’aris geant’onen do goşogorups t’alaxepe. Dolizdips arm3ika 3’kari p’icis. Genk’ilups k’ik’ili muşi. Nena muşi nuk’ank’alaps mendi do uk’uni. T’alaxoni 3’k’arepe gale naşkumers ğormapeşen. Aşopetenti tasi do munt’urepe p’ici muşis duskidun. Pen3’o, mjvabu, larva do ç’it’a çxomepeti geaşkumers. Na z’iras imxors, korbala ren. Zoğaluri bibepe çxomi do zoğaşi xeç’ep’oni skindinapete skidun. 3’k’aris geant’onaşi k’ik’ilişi jin na uğun şuri oşvanuşi ğorma ink’ilen, 3’kari var dolapşas yado. 3’oxle k’eleni sum k’iti muşiş şkas uğun perde steri gonk’ideri t’k’ebi. K’ap’ula k’eleni ç’it’a k’ititi ren timoşletineri. Dixas p’it’i p’it’i eşo meç’ireli gulun tina, 3’k’aris dido manişa inçvirs. K’udeli muşi ren domeni steri, inçvirt’aşi.
Oxomçvaleri bibik obğe var ikips do var putxun. Mt’k’uri sort’epeşen namtinepek obğe ikipan ncapeşi xonk’oro varna tamlonaşi doloxe. M3kvit’urak na naşkumers k’ut’alas, jvaridudonik ikips obğe do ekonaşis skups. Mt’k’uri bibepek skidunan artot. Qinoras t’ibu dobargalepeşa putxunan cogepete. Oxomçvaleri bibi skidun ç’it’a grup’epete. Didote k’arta kimolis uqoun anşi daduli. K’limate, didote K’undura- Mirk’anis geç’k’aps oskus. Markvalepe 15- 20 dane iqvaşi, daduli iqven monç’va. K’arta dadulik skups 50- 60 markvali. Motali bibi arşvacis na irden şeni, mk’ule oraş doloxe geç’k’aps oskus. K’ap’et’oni dadulis askven 7- 8 3’anas. Monç’vaşi vada ren 28- 29 dğa. Oxomçvaleri bibi 15, mt’k’uri bibi 20- 30 3’ana skidun.
|
TÜRKÇE
