|
HEMİDİYEŞİ ALAYEPE
Hemidiyeşi alayepe gei3’opxinu İbrahim do Kerim Paşapeş k’elen, Sult’an Abdulhemidi majuranişi emriten 1891-s. Noğira muşi rt’u; malimuri disip’lini meçameri aşiret’epeşen Yulva Anatolias feide oz’iru, on3’uraneri 3xenoni mencelepe o3’ipxute na momixtasunt’es Rusuli işgalişa medgineri ar menceli xes okaçu, galenepeşi xonaris quci na meçapt’u do ti-ezdimuşi gzalepe na gorupt’u mitxanepe oslebinu, aşiret’epeşi obargu do onoğarapu; odisip’linute gamantanu, aşiret’epeşi doloxe k’abğepe oçodinu do am aşiret’epes na uğut’u menceli oxen3aleşi guri şeni oxmaru, emutenti gza, xinci, n3’opulaşi binape ok’idute Anatoliaşi onoğaruşa mxuci meçamu.
İptinerot am alayapeşi nak’onoba rt’u nanç’inerot 50, mara oraş doloxe komanz’inu. 1908 3’anas 65 iqu. Didote iz’irenet’u Anşi Vilayet’işi; Erzurumi, Vani, Bitlisi do Diyarbekiris. Vilayet’i Sivasisti ar alayi i3’opxinu. Ge3’opxeri alayepeşen otxo rt’u maxutani armiaşi, majurapeti maotxani armiaşi t’erit’orias. Mara T’rablusgarbisti i3’opxinu am k’erk’ela. Coxo muşi çkvaneri rt’utina, iptinerot iz’irinu 1880-s Yemenis. Maotxani armiaşi serdali Muşir Zeki Paşak na numxvacu am p’roekt’işa medgineri rt’es paşape didote. Sult’an Abdulhemidi majuranik misia meçu Zeki Paşaşa am dulya şeni. Erzincani şkaguroni na 3’opxu Muşir Zeki Paşak dulyas kogeç’k’u 1891-şi pukrinoras. Mendoçku Mirliva Maxmud Paşa Vani, Malazgirt’i, Xinisişi gomorgvaşa. Hemidiyeşi Alayepeş o3’opxinus kogeiç’k’inu. Am dulyak naqonu xut 3’anas. 1896-s Erzincani, Dersimi, Erzurumi, Diyarbekiri, Vani, Malazgirt’i, Urfa do yulvas uk’ore3xu dobargales i3’opxinu Hemidiyeşi 3xenoni Alayepe. Am p’eriodis, vilayet’i Erzurumişi doloxe ovro alayi i3’opxinu.
Sult’an Abdulhemidi majurani t’axt’işen geit’k’oçinuşi, am alayepeşi coxo do muşeburoba iktirinu. Am alayepes geidvinu Aşiret’uri 3xenoni Alayepe, 1910-s, İttihadi do Terakk’işi P’art’iaş k’elen. Şafi Kurdepeşi ağa do aşiret’işi reisepeşi berepe na in3’ipolinu Mp’olişi Aşiret’uri Mektebi do Hemidiyeşi Alayepes Kurduri na3ionalist’oba diçiçkilu. Yulva Anatolias Alevi-Şafi k’abğapeti koyeçkindu. Sumexuri ti-ezdobapes xmareri am alayepe, var ixmarinu Balk’anuri limas. 1913-s xolo na iteşkilinu am alayepe i3’opxinu İxtiyaturi 3xenoni Alayepeşi coxote. Jur firk’ot şkaguroni muşi Erzurumi na rt’u maçxorani k’olorduşa nik’irinu. Maartani Kianuri Limas, yulvas, Rusepe k’ala na ok’vak’idu am alayepek zarari meçu Rusepes. Am alayepes beciti roli uğut’es Sumexepeşi get’k’oçinus.
|
TÜRKÇE
