|
AR FİLMİ: JUR NENA AR CAMUDANİ
Emre ren, universit’eşen ağangamaxteri ağanmarmordale ar mamgurapale. Denizliuri ren do Ege k’aixeşa kuçkin. Gulvaluri ren. Mara sup’rizi koren, namuk na eya çumers. Odulyoba şeni mendiçkvinen Yulva Anatolias germaloni ar oput’eşa. Aya ren ar Kurduri oput’e. Oput’eşi xalk’ik dğaluri dulyape muşis artikarti k’ala Turkuli var ğarğalaps. Entepes na dubağun k’onari uçkinan Turkuli mara, ğarğalapan Kurduri oput’uri omralobaşi artikartisobas. Berepesti var uçkinan çkar Turkuli. Emre ren mamgurapale aha aşo ar oput’es. Mamgurapale Emres var uçkin Kurduri, mamgurepesti Turkuli. Mamgurapale Emrek gzalepe gorups mamgurepes Turkuli ogurute ar 3’anaş morgvalis. Çkvadoçkva gzalepe 3adups çkvadoçkva orapes. Eşo gi3’vat, muşeburot ar gza bz’iri yado ocerute, nek’na geunk’ilups mamgurepes Kurduri oğarğalus. Eşo iqvasşiti, jur nenoni mara unenoni ar xali gamulun mjoraş teşa. Am xalik u3angups artikartisoba. Mamgurapale Emre ren xvala oput’es, so na xvala Kurduri iğarğalinen. Varti mamgurapale Emres mamgurepe do oput’eşi xalk’i, varti oput’eşi xalk’is do muşi mamgurepes mamgurapale Emre oxva3’onen.
Filmik mok’un3xinapan, dersi na meçasunon mamgurepeşi nena mamgurapalek oçkinuşi na ren. Filmişi oras, mamgurapale Emrek Lazi ar oput’eşa idas na, artneri mutxanepe naç’arasunt’u. Amutenti filmik xvala Kurduri nenaşi xali var, majura nananenapeşi xaliti mo3’irapan mç’ipaşa.
Maktalepe: Ozgur Doğan do Orhan Eskikoy; Senario: Orhan Eskikoy; Oz’iramuş maktale: Orhan Eskikoy; Musik’aşi maxvene: Serkan Gulgul; Masağalepe: Emre Aydin Deniz, Zulkuf Yildirim, Rojda Huz, Vehip Huz, Zulkuf Huz; Dobadona muşi: Turkia; Nena muşi: Turkuli, Kurduri; Fransuli (tudenç’araloni), Sort’i muşi: Drama; Xvenaş 3’ana: 2008; Ginz’enoba muşi: 81 3’uti; Oz’iramuşi tariği: 23 Gimua 2009.
|
TÜRKÇE
