DUDBUT'K'A

UÇAZOĞAŞİ EK'O-SİST'EMA OK'UİXVEN

Uçazoğaşa zoğap’ici na uğunan Turketi, Bulgaria, Romania, Ukraina, Rusiaş Federa3ia do Okorturak Uçazoğaşi St’rat’egiuri Xandaş P’lani k’abuli na qveşşen doni çxoro 3’ana golaxtu mara çkar p’ozit’iuri mutu var iqu. Uçazoğa na manz’inen pintoba do şkurnobapeşen oçumu şeni, çodinaş 3’anapes oirkiane do na3ionaluri xandape manz’inen mara gamargvaşi k’at’ast’rofape xolo iqven.

Uçazoğa jurneç 3’ana 3’oxle kianaşi ek’ologurot irişen xampa, mamçxomalobot irişen k’ai zoğapeşen ar teri rt’u. Andğa kianaşi irişen manişa na ipinten zoğa iqu. Uçazoğaşi havzaş na ren 17 tereşi, 13 dudnoğaşi, 170 milyoni k’oçişi pintoba Uçazoğaşa moiçodinen. Uçazoğaşa zoğap’ici na uğun 6 tereşi zoğap’icişi noğapes ar-jurşen umosi çkar opağuşi do omç’eşi t’esisi var uğun. Zoğap’icis na skidunan 10 milyoni k’oçişi oxorişi omç’epe direk’t’ot Uçazoğaşa meit’k’oçinen. Na manz’inen dixaşi pintoba, 3aşi pintoba, oşkurunoni maddeş maotiraloba, k’azape, dido do unizamuri oç’opinu, namtini muxaciri şuronepeşi omanz’inu ek’o-sist’ema ok’oxups. Uçazoğas ek’o-sist’ema dilixven, amuten hem balan3iape ok’uixven hemti ek’onomiuri ziyanepe niçinen.

Uçazoğa ist’oriul p’eriodiş doloxe mteloras beciti ar nat’urali xampobaş cinci do oirkianuri 3’k’arişgza iqu do emuşeni st’rat’egiuri ar becitoba aqu. Uçazoğaşi zoğap’icepes na ren terepek zarari meçamuşa naqonenan. Egere na3ianaluri do oirkianuri moşletinupe ixvenas na Uçazoğa ik’arinen. Uçazoğaşi ok’aru şeni mteli devletis dido vazifepe oxvenu dvaç’irenan. Uçazoğa bedi muşişa na var nişkvinen k’onari ğirsoni ren.



                                                                                                                                                              TÜRKÇE