DUDBUT'K'A

GREK'İAŞİ RESP'UBLİK'A

Grek’iaşi Resp’ublik’a (Elliniki Dimokratia), Omjoreyulva Avrop’as Balk’aniaşi gverdk’un3’ulaş omjoreşk’ele na golaz’in dobadona ren. Olandeşk’ele Arnavutia, Mak’edonia do Bulgaria, yulvaşk’ele Turkia, omjoreyulvaşk’ele Egezoğa, omjoreşk’ele Xçezoğa do gulvaşk’ele İyonzoğa gudgin. Dixaşzoma 131.990 k’m2, maxoroba 11.306.183 k’oçi, nananoğa Atina na uğun dobadonaşi majura didi noğape ren; Selanik’i, Pire, Patras, Kandiye, Volos, Yanya, Yenişehir, K’avala do Vodina.

Grek’ia, Osmaniaşi oxen3aleş osap’aruş p’eriodis 19. oş3’anuraşi didi imp’erialist’uri oxen3alepeş k’elen Mp’olişi oktalaşen ezdinute na geidginu ağani 28 oxen3aleşen arti ren. Grek’ia coxoşi cincis antik’uri İyoniaşi (andğaneri İzmir, Aydin, Manisa) Arabuli do Farsuli tkvala uğun. İyonia ren, Dorepeş k’elen Grek’ias xe geidvinuşi Anatoliaşa omt’inu na dvaç’ires do gulva Anatolias vitojur didi sit’e na gegdes xalk’iş dobadona mutepeşis na geodves coxo. Grek’iaş tarixis, mcveşi Grek’iaşi tarixi, şkaora-Bizansiaşi tarixi do moderni Grek’iaşi tarixi yado sum burme uğun. Antik’uri Grek’ia İ.3’. 2. oş3’anuras Romaşi imp’arat’orobaş xe3alaşa amaxtu do konik’arbu. Grek’ia 1458 3’anas Osmaniaşi dixapeşa ak’atu. Andğaneri Grek’ia, 1821 3’anas Osmaniaşi oxen3alek İnglisia, Frangia do Rusiaşa geicginuşi am oxen3alepeşi oçvaşi k’ortaş misiate Mp’olişi oktalaşen na eizdinu Moraşi gverk’un3’ula do Atinaşen na 3’opxun ç’it’a dixas 'Grek’iaşi Omape' coxote geik’idu. 1923 3’anaşi referandumite Grek’iaşi Resp’ublik’a ignapinu. 1926 3’anas monarşiuri xe3alaşi oktaloba geoç’k’u. Grek’ia, 1974 3’anas referandumite ağanşe resp’ublik’a iqu.

Grek’ias generalurot xut k’orta uğun: Mak’edonia, T’rakia, Epirus, Teselia do Mora. Grek’iaşi dixapeş xutiş otxo k’onari germapuna, ç’it’a ar burmeti zenepuna ren. Didi k’un3’ulape muşi ren; Girit, Rodos, Milos, Korfu, Sakiz, Midilli, Sisam, Eğriboz, Delos do Mykonos. Grek’ias, monç’inoraş tutape ekseri çxvapa do qinoraş tutape ekseri çuçuna na golulun Xçezoğaşi t’aroniş tesiri uğun. Germaluri do doloxeni k’ortapesti Xçezoğaşi germaş t’aroni iqven. Olandeşk’eleni k’ortapes qinoraşi tutape umosi qini do monç’inoraş tutape umosi çxvapa iqven.

Dobadonaşi ofisialuri nena Grek’uri, alboni muşite iç’aren. Xalk’iş %97 Ortodoksi ren. Genomskidepe didote Muslimani ren. M3ika rt’an nati K’at’olik’epe, P’rot’estanepe do Yahudepeti koren. Maxoroba muşi didote Turkiaşen 1924 do 1955 3’anaşi ok’oktirus na dibarges Rumepeşen 3’opxun. Maxoroba muşiş nasumari nananoğa Atina do gomorgva muşis skidun. M3ika xalk’epe muşi ren; Mak’edonepe, Arnavutepe, Ulahepe, Turkepe, Pomak’epe, Arabepe, Farsepe do Afrik’alurepe.

Grek’iaş maxorobaşi %30 k’onarik xaçka do maskindinobate skidun. İrişen beciti maxsulepe muşi ren; taxili, tutumi, pambuği, brinci, zeytini, txiri, qurz’eni, limoni do port’uk’ali. Grek’ia ren maçxomoba mordineri dobadona. Grek’ia ren let’aştudeni madenepe xampa na uğun dobadona. Madenepe muşi ren; boksit’i, k’romi, xçekva, mermeri, erk’ina, nikeli, amiant’i, magneziumi, linci, k’urşumi, linyiti, zimp’ara, sulfuri, aluminiumi do p’et’roli. Dobadonaşi %30 k’onarik omrala do indust’riaş branşis ixandeps. İrişen beciti indust’riaş branşepe muşi ren t’ekst’ili, kimialuri maddepe, gida, çiment’o do met’aluri indust’ria. T’urizmi ren dobadonaşi dido beciti mogapaşi odude. Marathon, Mycenae, Olympia, Sparta, Thermopylae do Tiryus steri mcveşi Grek’uri noğaş oxen3alepe t’urist’epes dido anç’elnan.



                                                                                                                                                              TÜRKÇE