|
ÇEÇENİSTANİŞİ CİHADİ P'OT'E VAR İÇODEN!
İmam Şamilik (r.a.) “Çeçenistanis ar kva do ar k’oçi doskidas nati cihadi naqonasunon.” do şehidi Dudayevik (r.a.) “Çkin 50 3’ana na naqonasunon limaşa amavulurt. Eşo vixazirit.” yado na molaşinu Çeçenistanişi cihadi p’ot’e var içoden. Ella do resuli muşiş k’ele na dgin Çeçeni xalk’ik, “İmam Mansuri, Gazi Muhammedi, İmam Şamili, Baysanguri, Şuayp Molla, Xaci Muradi, Abreki, Dudayevi, Masxadovi, Basayevi, Zelimxani, Abdulhalimini, Hattabi, Hayrullahi do vit şilyadoşilya şehidi do mucahidiş k’ele dodginus naqonops. Çodina jur cihadis xut dudcumxuri şehidi na aqves Çeçenepek, tarixiş morgvalis Çar deli Petro, General Meymalovi, Çar Alek’sandiri, Lenini, St’alini, mutişi İvani, General Grek’ovi, General Voront’sovi, General T’roşevi, Yelt’sini, Alhanoviş zulmepeşa na nodgites steri andğanerdğasti P’ut’inişi do mak’udele Ramzan Kadirovişi zorbalobapeşa nodgitunan.
Rusiaşi go3’oncğonerepek do entepeşi k’ortaluri k’uklapek p’ant’a, Çeçenistanis do K’avk’asias mesele var doskidu, maisyanepeşi(!) k’oro3xa ar xeşi k’itepe k’onari ren ya tkves nati nodgita oçodinu şeni mpuleri do kesifi ar hucumişi p’olit’ik’a otatbik’es. Vitdovit ocaği komek’arbes, oxorca-kimoci, bere-badi var 3xunes, omt’ines do işkencete doğurines. Am temaşen na molaşinu magazetepe do sosiaşi sivili maguronepeti konon3’ames. Entepes, Çeçenistanişi cihadi na var içodu do k’ortas goşogzeri na naqonopt’u k’aixeşa kuçkit’es. Çodinuri oğodapek, çodina 3’anapes diçodu yado na i3’onet’u Çeçenistanişi cihadi ağanuri na imencelu do zati p’ot’e na var içoderet’u komo3’ires.
Ho, Çeçenepes dido beciti go3’oncğonerepe şehidi aqves. Entepes didi zaiyatepe aqves. P’olit’ik’uri do op’erasionuri manevraş xeşmaxvencoba dosap’ares. İnformasioniş menceli p’ot’e na var ağodes k’onari dvark’ines. Caxar Dudayev, Şamil Basayev do Abdulhalim Sadullayev steri go3’oncğonerepeş oikamu elbet dido zori ren. Mara ağanmordalepek şehidi p’ap’uli mutepeşişi anderi imancelenan edo Çeçeni xalk’ikti p’ant’a na ikipt’es steri nodgitaşa numxvacupan. Ayati ren Çeçenistanişi cihadiş moxtanora şeni dido beciti omancelu. Mucahidepeşi morali do manevuroba dido moçkvineri ren. Ellak k’ati gecgina momçasunonan yado icernan.
K’avk’asiaşi moxtanoraş temas muşebura p’lani na ikips maişgalepes do maxaluri k’uklapes ar fara çkva oxo3’onu uk’ors; Çeçeni xalk’ik mutepeşi oxoşkveroba çkar mitis var nuşkvasunon do ok’otkvuşi tema var qvasunon. Muslimanuri coxope na geoz’inan mara Muslimanepeşi duşmani na renan k’oçepeşi m3udinuri k’amp’anyapeşa Muslimanepes varoceru dvaç’irnan. Muslimanepe şeni andğa, oxoşkverobaşi k’abğas iroraşen dido omxvacuşi vaxti ren. Madduri, manevuri do informasionuri am destani k’abğaş omancelu do xvamape çkiniş vardork’inuşi ora ren.
“Ellas, macerepeşi şuri do mali eç’opineri uğun, entepes na meçasunon cennetişi muk’abili. Entepek, Ellaşi gzas ik’abğenan, oğurinapan do ğurunan. Ellak aya Tevratis, İncilis do K’uranis k’atiuri dokaderen. Nena muşi Ellaşen umosi dido na okaçaps mi ren? Em oras, na qvit muamele şeni dido ixelit! Didi moşletinu aya ren.” (Tevbe, 111)
|
TÜRKÇE
