|
P'REZİDENT'İ VLADİSLAV ARZ'İNBA
Vladislav Arz’inba, 19 Pukrik’a 1945 tarixis Soxumişi oput’e 3’aleni Eşiras dibadu. Beroba do doguraleşi p’eriodi oput’e muşis goloçkvu. 1962- 1966 3’anapes Soxumişi Oxen3ale P’edagogiaşi İnst’ut’iş Tarixişi Fak’ult’es iguru. Artneri inst’ut’işi Yulvaluri Çkinapeşi Ak’ademias mamgurapalot ixandu. Dokt’ora muşi Tbilisişi Oxen3ale Universit’es meçu. 1969- 1987 3’anapeşi şkas Mosk’ovas na oxoru Arz’inba, Yulvaluri Goşogorapeşi İnst’ut’is Ç’it’a Asia, Hatti do Hititiş tarixi goşogoru. 40-şen dido ilmiuri mak’alep ç’aru. 1987 3’anas Dirmiti Gulya Nena, Tarixi, Ç’aralobaşi İnst’ut’iş direkt’ori iqu. 1988 3’anas Abxaziaşi mağala sovietişa mebusi na i3xunu Arz’inba, 1989 3’anas Sovieturi Artobaşi mağala sovietişa i3xunu. Artneri 3’anas Sovieturi Artobaşi mağala sovietiş icraşi heyetis, ot’onomi resp’ublik’apeşi komisioniş dudmaxvence iqu.
Arz’inba, Abxaziaş tarixis irişen beciti map’olit’ik’epeşen arti iqu. Skidala muşiş morgvalis xalk’epeşi k’anonuri hak’epeş mogapu şeni icedelu. Am ocedelu şeni Sovieturi Artobaş xalk’epeşi omordinuş ok’rebule gek’idu. Am inisiat’ivi Sovieturi Artobaşi dudk’anoniş tolite ditasdik’u do dik’abulu. 1990 3’anas Abxaziaşi mağala sovietişa dudmaxvence i3xunu. Abxaziaşi timoşletineroba do hukumranobaşi temelepe am tarixiş k’ule ik’ap’et’anu. 1992 3’anaşi geç’k’alas, Okortulek Abxaziaşa na nat’k’va3u p’eriodis, Abxaziaşi nasionaluri seferberoba do nodgitaşi k’omit’eş dudmaxvence iqu. St’aroşina 1993-s na oktalapt’u Abxaziaşi xalk’ik, maişgale Kortu mencelepe Abxaziaşen kogamapağu do duşmanis geocginu.
26 3’ilva 1994-s Abxaziaşi maartani p’rezident’i i3xunu. 3 Gimua 1999-s majura fara Abxaziaşi p’rezident’i i3xunu. 2002 3’anaşen doni zabunoba muşişi sebebite xalk’iş doloxe na var iz’iret’u Arz’inba, 2005 3’anaşi 3xunaş k’ule vazife muşi Sergey Bagapşis nuşkvu. Arz’inba, tarixişi p’rofesori do Abxaziaşi Çkinapeş Ak’ademiaşi mamgurapale rt’u. Edo xolo Adige Oirkianuri Çkinapeşi Ak’ademia do 1995 3’anaşen doniti K’androf Oirkianuri Munasebet’epeşi şerefoni mak’ature rt’u. 4 Mirk’ani 2010-s domiğures. Arz’inba, muşi steri matarixe Svetlana Cergenia k’ala çileri ren do Madina coxoni, Mosk’ovaşi Oxen3ale Universit’eş tarixişi burmeşen mezuni k’ulani uqonun.
|
TÜRKÇE
