|
TİMO3'ONERİ T'AVUSİ
T’avusi ren kiloralepeşi (Phasianidae) familiaşen. Am familiaş Pavo cinsişi jur k’vinçis am coxo geidvinen. Antepe renan cğat’a t’avusi do jvari tavusi. Cğat’a t’avusi skidun Hindistanişi omjore k’ortas. T’avusi şeni Hindistanişi nasionaluri k’vinçi ren ya itkven. Jvari t’avusiti Burmaşi yulvaşen Cavaşakis na golaz’in k’ortapes skidun. 1936-s z’ireli K’ongoşi t’avusikti skidun t’rop’iuri mt’k’apeşi doloxe. K’arta sort’i dixas skidun. Seris ncas gelaxedunan.
T’avusi omjoreyulva Asia do yulva Hinduri k’un3’ulapeşi skindina ren. Dido nenapes na ren “t’avusi steri timo3’oneri”şi tkvalak mo3’irapan, t’avusis mskvanoba muşi na uçkin. Aya gamaçkineri ren, k’udeli xvala 3’una muşişa vardo, na no3’k’en k’oçepesti o3’iraps şeni. T’avusi ren çinaperi, çkva k’vinçis na var uğun, k’udeli muşiş jileni bundğapete. Am mskva k’udeli aqven xvala kimolis. Omzik’uşi p’eriodis, kimolik gon3’k’ips k’udeli muşi muç’o yelpaze eşo, cğat’a ç’ereli, sedefuri okro do jvari bundğoni. T’avusi ren tak’ribi 110- 125 sant’imi. K’udeli muşiti ren tak’ribi 120- 130 sant’imi. K’udeli muşi ek’o mskva rentina, k’uçxepe muşi ren dido beti. Çxiroba muşiti ren dido oşkurnoni. Msvalepe muşi ren dido mk’ule. Emuşeniti, geintxozinaşi unk’ap’un arm3ika. Ar okti z’iraşi, 3xont’un. Mara var aputxen mendraşa. Var aşkurinen k’oçişen.
Dido mcveşi orapes, namtini yulva dobadonapes na skidut’u xampapek niçanept’es dolokunepes t’avusişi bundğape. Aya rt’u adeti. Uk’ore3xu dobadonaşi mitologias, t’avusişen molişinen. Mtel antepek mo3’irapan, t’avusi dido mcveşi oras na oxoimç’k’inu. Hindupeşi oxvamepeş gomorgvas t’avusepe cogepete oskedinapan. T’avusepe Avrop’aşa mundes iqoninu, var içkinen. Romaşi doxorepes 3’opxeri diarepes Hindistaniş paxali baxarat’epete giberi, t’avusişi kuni do nena ikrami ixvenen yado iç’aren.
|
TÜRKÇE
