DUDBUT'K'A

MAMGVANE MUZİ

Muzi irden muşeburo omjoreyulva Asiaşi t’rop’ik’uri k’ortapes. Ncaluri ar mzguda do am mzgudaşi xilaşa muzi itkven. “Muzi” ren Arabuli tkvala. Turkias didopete Anamur do Alanyaşi şkas k’ortapes imralinen. Muziş dvaç’irobaşi %80 k’onari am k’ortaşen gamulun. Muzi dido na iç’k’omen xilapeşi arti ren. Muzis uğun dido vit’amini, p’rot’eini, minerali do aminoasidi. Nostonoba do şurate dido nogore xila ren yulva Avrop’aşi dobadonapes. Mara umuteli dobadonapesti, muzi ren dido beciti mgvanaşi odude. Umuteli dobadonapeşi berepek p’rot’einiş dvaç’iroba muzi oç’k’omuten oçodinapan.

Muzi oç’k’omuk ipels qvilişi ok’ap’et’inus. K’ai ren xuçeşi sap’aroba do doç’k’indinerobaşa. Pelaperi ren dirk’u do mem3xvalaşi txomurişa edo mç’uşi zabunobapeşa. İnk’ibazoba na uğun mitxanepek muzi oç’k’omuşi va renan. Muzis uğun “B1”, “B2”, “C”, “A” do “E”-şi vit’aminepe. Amuş met’a xampa; p’ot’asiumi, erk’ina, k’alsiumi, fosfori, sodiumi do iot’i uğun. Muzişi k’alori ren dido mağala. Murenki var uğun k’olest’eroli. Muzis uğun sodiumi do p’ot’asiumişi maddepe, namupek ok’ap’et’inapan gurişi mem3xvalepe. P’ot’asiumi osağaps mem3xvalape, namupek na mencelişen melus na kogeoç’k’u upi geçamute. Perpot ok’ank’anuşa gza meçaps. “B1”-şi vit’aminite xuçeşi hucrepeş normaluri oxandus nuşvels. Emus na uğun iot’ikti nuşvels t’iroid mbelaşi on3’uranuro oxandus.

Muzişi baği ren ekseri olande muşi motrageri, qinişa genk’ileri sotepes. Muzişi mzgudak irden umosi k’ailot ekseri omjoreşk’ele na no3’k’en, arm3ika gemtumani k’ortapes. Turkias, muzi irgen t’aroniş moxvanobate Mirk’ani-Pukrikaş tutapes. St’aroşinas, motragaş tude noxvene orguk k’ai netice meçaps. Orguşi osvarobaş olande-omjoreşk’ele oqopinuk dobağineri omjorinus gza meçaps.



                                                                                                                                                              TÜRKÇE