DUDBUT'K'A

K'AÇK'ARİŞİ GERMAPEŞİ NA3İONALURİ P'ARK'İ

K’açk’arişi Germapeşi Na3ionaluri P’ark’is 51.550 hek’t’ari let’a uğun. Na3ionaluri P’ark’işi didi burme Rizinişi Çamlixemşini coxoni noğaşi do ç’it’a ar burme Artvinişi Yusufeli coxoni noğaşi doloxe ren.

K’açk’arişi Germapeşi Na3ionaluri P’ark’işa oxtimu şeni, Rizini-Art’aşenişi gzaşi jin, Furt’unaşi vadis noqonuten 18 km. idaşi Çamlixemşinişa ninç’işinen. Emuşk’ule Ayderi do Zilkaleşi gzaepeten jur çkvaneri xtimalaten ilinen.

K’açk’arişi germapes gyulva k’ele Furt’unaşi ğali, jilentuna do yulva k’ele Xemşinişi ğali ren. Am vadepes xampa ar flora uğun. Mzgudapes Karsturi t’ip’i do tudeni do jileni floras endemiuri ç’eşidepe uğun. Turketis, Rhodendronepek 3.000 met’reşa na nunç’işun ar xvala sva ren. K’açk’arişi germape Turketis, Pleistosanişi doğişi nişanepe k’ala ak’t’uali doğoba na iz’iren svaepeşen ar teri ren. Am dixas dido doğepunape k’ala, doğişi t’ibape, doğişi vadepe do doğişi kvaepe ren. Generalurot granit’i do granit’uri kvaepeşen eçkinderi na ren geologiuri st’rukt’uraşi jin Alpişi Orojenezişi dido nişanepe iz’iren.

Fauna dido xampa na uğun K’açk’arişi germapes, ğveri, mtuti, ğeci, meli, mt’k’uri txa, mskveri, k’venuri, mk’apu, mt’k’uri kotume steri 3xvorape skidunan. K’açk’arişi germapes mağaloba tamo-tamo na anz’inen şeni, magolaoba oxvenu na unonanpe şeni dido k’ai do mskva ar dixa ren. Turketişi irişen beciti dudgermapeşen ar teri na ren K’açk’ariş germapeşi ak’t’uali doğoba do majura nat’urali xampobape, magermepes, t’urist’epes do çkinaşk’oçepes dido onç’elnan.

3’oxle Furt’unaşi do Xemşinişi ok’ule, mzgudaş ç’eş’idoba do xampoba k’ala faunapeşi çkvaneroba na uğun mteli vadepes oz’iramu ç’irnan. Furt’unaşi vadis na ren Zilkaleşi doloxvapes k’ult’uralurot beciti ar ğirsi uğun. Edo xolo, raionişi so3ialuri-k’ult’uraluri do ek’onomiuri oskedinu na o3’iraps golaşi oxorepes, t’abiati k’ala ahengi do ok’iduşi st’ilepe k’ai uğunan. Emuşeni akonaşi na mulunan k’oçepes dido anç’elenan. Ayderişi gola do abanope, am golapeşi oskedinuşi svaepeşen ar teri ren.

Ayderişi golapeşi xolos, ar ndğas oxizmet’u şeni xveneri na ren saha do t’rek’ingi oxvenu şeni k’ai na ren t’op’ografia k’ala magermeloba dido raxat’i ixvenen. Çamlixemşinişi noğas, Ayderişi gola do majura golape k’ala Na3ionaluri P’ark’is, lok’aluri maxvencepeş k’ont’roliten ve entepek na o3’irasunon svaepes çadiri do k’aravaniten didginen, guilen do iskedinen.



                                                                                                                                                              TÜRKÇE