|
K'UT'ALİ PESONİ Ç'K'ONİ
Ç’k’oni, 3’ipurari (Fagaceae) familiaşi Quercus cinsişen 200 k’onari ç’eşidiş şkas monç’inora-qinoras but’k’a na var dobğaps ç’eşidepeti na uğun, k’ap’et’i kerestoni capeşi oşkari coxo ren. Kianas, dido mçire dixapes gedgin. Ç’k’onepek vasati 500 3’ana skidunan do mağaloba 30 met’re, mçirenoba 2 met’re k’onari uğunan. Ç’k’onepeşi t’ani muntazami, t’k’ebi 3’oxle muntazami do ok’ule bri3’eri do p’aruxa iqven. Peso mutepeşi k’ut’ali uğun do dido imçiranen. But’k’ape muşiti formepe muşi steri çkvaneri ren do morgvali, uk’ibire varna muntazami kinari uğun. P’alamuti coxoni silindiri xilape muşi k’adexi steri mutxas doloz’in. Namtini ç’eşidepe muşişi p’alamudi didi do bu3xoni iqven.
Turkias tabiuri 18 ç’eşidi ç’k’oni iz’iren. Turkia dido xampa ren, ç’k’onepe gedgineri dixapete. Ç’k’onepes, dişkape muşişi anat’omiuri xususobaş tolite; xçe ç’k’oni, mç’ita ç’k’oni do jvari ç’k’oni yado sum ç’eşidi uğun. Mamuli pukirepek, go3’oneri çiçkilepes, tito tito do ginz’e mihveris ok’oibğenan. Daduli pukirepek tito tito varna sum-xut ç’it’a dudi steri geçanan. Pukirişi tude xicas mengaperi ar k’up’ula iqven. K’arta k’up’ulaş doloxe ar pelit’i iqven. K’up’ulaşi jin ekseri k’ap’et’i ker3elape geçans. Ç’k’onişi cak 50 3’aneri var iqvaşa p’alamuti var niçans. P’alamudis xampa taneni uğun do şira muşi ğapişi indust’rias ixmaren. P’alamudiş doloxe pelit’i coxoni ç’k’emi iqven. Pelit’ik hucreş k’ele ç’uburis nungaps. Mara, mk’olo ren do skindinapeşi oç’k’omale yado ixmaren. Ç’k’onik imralen, ç’erelqvarik do man3’ipurek qinoras oç’k’omu şeni let’as na doxvaps varna muşebura let’as na oxvakten pelit’epete.
Ç’k’onepe park’i do mabaxçoba şeni dido beciti renan. Mobilia, oxoruli do mskvanaş eşyapeş oxvenus ç’k’onişi ca ixmaren. Ç’k’onişi ca noxondinoni ren do emuşeni nek’na, otole, taro, k’aravi, xinci do skeleş oxvenus dido ixmaren. Ç’k’onişi ca, oç’uşi do oxmaruşi dişka edo xolo ğvinişi baç’k’a yadoti ixmaren. Ç’k’onişi t’k’ebişen çai ixvenen. Am çaik mç’uşi do k’uç’işi zabunobapes k’ai nargen.
|
TÜRKÇE
