DUDBUT'K'A

EŞREF OSMANAĞAOĞLU

Skidala muşi ilimişa do xeironi dulyapeşa na kadu Eşref Osmanağaoğlu, 1898 3’anas Xopas dibadu. Baba muşi Mehmet efendi, nana muşi Vasfiye xanumi ren. Eşref begi Xopas irdu do içilu edo emuşk’ule St’amp’olis kodibargu. Sirkecişi xilaşi skeles matireloba qu. Mogapa do skidala muşi Anatoliaşi fuk’ara berepeşa okadu. Osmanağaoğluk, İslamuri axlak’iş oskedinu, İslamuri şuuriş k’aixeşa oxo3’onapu, ilimişa oxizmet’u, oxizibuşa nodginu, imani do muvazene na uğun ağanmordalepe omordinu şeni 45 3’anaş morgvalis seri-dğaleri udodginu icedelu.

Eşref Osmanağaoğlu, Turkiaşi İlmiuri do İçtimauri Xizmet’epeşi Vak’ifiş p’ot’e na var goiç’k’ondinasunon mevcudietişi sebebi do mtini magedginale ren. 1950-oni 3’anapes Anatoliaşi noseri mara fuk’ara ağanmordalepek İslamuri gurapas na n3’irupt’es meç’irobape z’iru do entepe k’ala iderdu. K’uranişi K’ursepeşa Meşveluşi Ok’oxtimale aşote kogeidginu. Raxmetoni Eşref begişi kunis do aksionis na imoirdu k’aobaşi cemieti 1973 3’anas andğaneri coxote divak’ifu. Eşref begik am vak’ifis serveti muşi var naşku mara skidala muşişi 45 3’ana muşi nukadu. Menceloni irade, k’ap’et’i azmi, misali k’arakteri do tak’va muşite 1986 3’anaşakis, ç’umaneri namazişen serepeşi yano vaxtişakis ixandu do vak’ifişi dudmaxvencoba qu.

Atlet’iuri xura na uğut’u Eşref begi, yulva-geulvaşi k’ult’ura ok’ont’aleri, irade do k’ap’et’i k’arakteroni, şahsietişi timsali, azimoni, musamahoni, gurami, k’ult’uroni, gonç’k’ireli, k’aixeşa İslamuri şuuri na uğut’u xalisi mumini rt’u. Dini do ibadeti qoropt’u, t’ani o3’iru var unt’u, şoxret’i afet’i tkvala ren yado iceru do ixlasi muşi var oziyanu, kianaşen uxonare mendaxtu. Nosi na uğun k’arta mitxanis k’itxupt’u do entepe k’ala ok’oisimadet’u. Fik’iri mutepeşi var mo3’ondu na muk na icert’u dulya ikipt’u. Musik’aşi mordineri çkina uğut’u. K’arta ç’eşidi k’aide do usuli uçkit’u do mamgurepe muşişa ogurapt’u. Ç’araloba do şiiriti dido qoropt’u do Osmanuri dido mskva ç’arupt’u. Celi, kufi, rikka, sulusi steri oç’aruşi st’ilepe uçkit’u. Emuşi osimaduşa goxverepeşi ozmonu var nanç’uşinet’u. Emuşi nogure paraşi mogu var do Ğormoturi xizmet’i rt’u. 1986 3’anas St’amp’olis doğuru. Fatihişi cames na ixvenu cenazeşi namaziş k’ule K’ozluşi k’abristanis kodixvu. Teonaşi doloxe inciras do Ellak (c.c.) ti muşişen razi iqvas.



                                                                                                                                                              TÜRKÇE