|
ŞEHİDİ ŞEYX SAİDİ
Şeyx Saidi, 1865 3’anas Erzurumişi ilçe Xinisişi oput’e K’olxisaris dibadu. Baba muşişi coxo Şeyx Mahmud Fevzi ren. P’ap’uli muşi Seyyid Xaşimi, Osmaniaşi padişaxi 4. Muradişi p’eriodis 1639 3’anas işehidinu. Baba muşi ğuruş k’ule didi ocaği muşişi mesuloba Şeyx Saidis kodoskidu. Şeyx Saidişi ocaği dido xampa rt’u. Dido skindinape uqonut’u do entepe Erzurumişen Halepişa, Musuli do Şamişakis iqonopt’u. Şeyx Saidik hemi ticareti ikipt’u hemiti na idat’u sotinuri k’oçepe k’ala munasebeti omordinapt’u. Emuşeni dido çineri do qoropeli uqonut’u. Kurdistanis dido k’oçis nutesirapt’u. Maartani kianuri limaş oras dido Kurdi dixa muşişen içvu. Am p’eriodis Osmaniaşi oxen3ales Şeyx Saidi do ocaği muşi uçvu unt’u mara emuşen aşkurinet’es şeni var elaçves.
Şeyx Saidik ilimi oguru şeni medreseşa kogeoç’k’u. Muş, Malazgirt, Xinis do Palus gurapa muşi oçodinu. Şeyx Saidi şuuroni do noseri k’oçi rt’u. Oput’epe goxtu do k’oçepeşa İslamuri do milleturi ocadeluşi şuuri mogapu şeni ixandu. Kurdistani Omağaluşi Cemietişa ak’atu. Osmaniaşi oxen3ale dilixvu do cumxuroba geik’iduşi cumxurobaşi magek’idepek mtini nunk’u mutepeşi o3’ires do Muslimanobaşi do Kurdepeşi duşmanobaş p’olit’ik’as kogeoç’k’es. Am xalik Şeyx Saidişi gayreti komonz’inu. Am xali kort’aşi çkva var dvadginet’u. Dğa oxanduşi ora rt’u.
Şeyx Saidik ixaziru do oxorişen gamulut’uşi oxorca muşik uk’itxu: “Mis memaşkumert do ulur?”. Am k’itxaşa Şeyx Saidik tarixuri coğabi meçu: “Ma do bastoni çkimi xvala kodopskidat nati kafirepes mevodgitaminon. Varti Hz. Xuseyinişen ğirsoni vore varti çkimi ocaği emuşi ocağişen umosi ğirsoni ren. Kafirepes var mevodgita na zebanepek saruği çkimişen gemak’nepan do cennemişa kodolomt’k’oçupan, em oras megaşvelasenani? Var mi3’umenani; ç’e Saidi, Ellak ek’onari mali do mulki mekçu. Ella şeni mu qvi? Antepek Ellaşi emirepe doç’inaxerenan.”
“Ho, cihadis kogevoç’k’i do mşkurnacepe, sap’arape do zabunepe var moxtan. Am gza mşkurnacepeşi şara va ren! Cuma muşi Bahaddinikti aşo u3’u: “Ağabegi, giçkin Kurdepe dido çkineri va renan. Var gegacginen.” Şeyx Saidişi coğabis mo3’ondu uk’ors: “Bahaddin, Bahaddin! Derdi mo zdip, Amedis go3’omok’idasunonan, siti K’urani şeni işehidaginon. Hz. Xuseyinisti so işehidasunon var uçkit’u. Mara entepe şeni irişen beciti mutxa rabbi mutepeşişi qoropa rt’u.”
28 Mbulora 1925-s go3’ok’iduşi oras kart’alişi jin Arabulo aşo ç’art’u: “Uğirsoni qapes go3’ok’idinuşen var maşkurinen. Çkimi ğura Ella do İslami şeni ren.” Tok’i qali muşişa goit’k’uş k’ule na tku Kurduri nena aşo ren; “A3’i udoskide skidalas xe vuvalap. Xalk’i çkimi şeni k’urbani na viqvi şeni var vipişmaner. Motalepe çkimik duşmanepe çkimis var noz’i3inan, eya domibağun.”
“Mo ek’amamgart do zalimepe mo oxelapt. Yedgita çkini k’ai oxo3’onit do çkiniş k’ulenepes gamognapit.”
|
TÜRKÇE
