DUDBUT'K'A

ÇVERİ NENA ARMENURİ

Armeniaşi Resp’ublik’aşi ofisialuri nena Armenuri (Hayeren), Hint-Avrop’aşi grup’işa mensubi nena ren. K’orta jileni Firati do Arasis İ.3’. 5. oş3’anuraşen doni iğarğalen do İ.U. 5. oş3’anuraşen doni Armenuri albonite iç’aren. Andğaşakis na ixmaren do 38 bonca na uğun alboni muşi, İ.U. 405 3’anas pisk’oposi Azizi Mesrop Maştotziş k’elen i3’opxinu. 19. oş3’anuras Armenuri ç’araloba moirduşi yulvaluri (Erevani) do geulvaluri (St’amp’oli) dialekt’epeşi çkvaneroba k’aixeşa komanz’inu.

Armenepek Xaldesepeşen dido zit’a eç’operenan. Eyaletepe do sotepeşi coxopes Urarturi cinci uğun. Mcveşi mageografe do matarixepek Armenepe k’ala Arabepe do Surialurepeş nena, fizik’uri xali, anane do adetepeşi ok’ongapupe z’ires. Frigiuri nena şeni na miğunan m3ika çkinak, mcveşuri k’oçepeşi Armenuri, Frigiuri nenaşi ar ç’eşidi ren yado simada k’abuli varna reddi var moxvenapapan. Modernuri orapes Armenuri, Medesepeşi nena k’ala ok’oinç’u, mç’ipaşaşi goşogorapeşi çodinas İranuri nenapeşi oşkas itasnifu. Petermanik do Vindişmanik Armenuri nena, Hint-Avrop’aşi nenape k’ala molaşinu. Emuşk’ule Mullerik, De la Zartek do çkva nenamçkinacepekti aşo isimades do goşogora mutepeşi em k’ele goktes. Aşote Armenuri nenaşi fonet’ik’uri do morfologiuri xususobape kogamintanu. 20. oş3’anuraşi geç’k’alaşakis, Armenepeşi nena İranuri nenapeşi no3’ile ren yado isimadinet’u. Armenuri xark’i zit’apeşen ipağinu, mem3xva do zit’apeşi cinci na goşogoru Hubsiçmanik, vok’aluro Aryenuri nenapeşa vardo Avrop’aluri nenapeşa mek’ireli ren yado k’arari komeçu. Mara andğanerdğas xoloti Armenuris İranuri nenape k’ala irtibati uğun yado na icers nenamçkinacepeti koren.

Armenuriş doloxe dido Farsuli unsurepe ren. Edo xolo Latinurişen do Yunanurişen eç’opineri dido zit’ape uğunan. Armenuri, Armenia do Germapuna K’arabağuri Armenepeş met’a Rusia, Okortule, İrani, Turkia, İrak’i, Suria, Lubnani, İsraeli, Frangia, AOO, K’anada, Argent’ina, Brezilia, Grek’ia, Germania, P’olonia, Uk’raina, Uzbekistani, Turkmenistani, Avust’ralia do çkva dobadonapes na skidun diasp’oraşi Armenepeş k’elen iğarğalen.



                                                                                                                                                              TÜRKÇE