DUDBUT'K'A

K'AÇK'ARİŞİ GERMAPES OKTİŞİ P'ARAŞUT'İ

Oktişi p’araşut’i, oputxuş oras ar putxaş msvaşi formi eç’opinuten p’lanorepe steri oputxuşi p’rensibepeten na putxun umot’oroni ar havaşi vasit’a ren. Coxo muşişenti na oxoi3’onen steri, k’uçxeten perpu na elaxtilinen rak’anişi oktepeşen, p’ilot’işi mk’ule ar onk’ap’inuten putxun. Hava na var ezdips k’umaşi do xususi dizaini, na iqven k’onari mak’simumi oputxuş ora do minimumi geputxuş surat’i şeni xveneri ren. Emuşeni ar oktişi p’araşut’işi p’ilot’is, majura map’araşut’epeşen çkvanerot tude ar k’vinçi steri subuka galinen.

Oktişi p’araşut’işi sp’ort’i, 1980 geç’k’apunas gamaxtu, ç’it’a oraşk’ule p’op’ulari iqu do mteli kianas imralu. Amuşi irişen beciti sebebepe; irişen ek’onomiuri havaşi vasit’a do t’abiatişi sp’ort’epe k’ala xolos oqopinu ren. Xususi ar xvenoba do dido ar eforoba na var unon oktişi p’araşut’işi sp’ort’i, st’andart’i ar gurapaşk’ule oxmarinu dido perpu do keifoni ren.

Ar oktişi p’araşut’işi sp’ort’meni na bars ixepes oxosaruten k’ai t’aronepes dido orapes aputxinen do mendişi p’eriodis oputxuşi geç’k’apunaşen dido mendraşakis alen. Am xvenoba direk’t’i sp’ort’menişi oputxuşi çkinape do 3adapeten na moirden şeni sp’ort’menepek mutepeşi şeni "p’ilot’i" coxo ixmarnan.

Oktişi p’araşut’işi sp’ort’i, çkar mitişi noşvelu na var unon, putxa, mot’ori steri çkar mutu na var ixmarinen do xvala na ixvenen ar sp’ort’i ren. P’ilot’ik 6-15 kg monk’anoba na uğun p’araşut’i do majura malzemepe, k’apulaşi ar 3an3aş doloxe muşebura oktişa atiren, nanç’ineri 10 dek’ik’es oputxuşi xaziroba açodinen do oputxus gaç’k’en.

Turketis oktişi p’araşut’işi oxmarinu dido manişa imralen do oputxu şeni dido mskva dixape xolo ren. Antepeşen ar teriti K’açk’arişi germape ren. Ayderişi golaşen nanç’ineri 45 dek’ik’oni magzalobaşk’ule na ninç’işinen Kavronişi golas, nat’urali mskvanoba uğun do xolo oktişi p’araşut’i şeni dido mskva ar dixa ren.



                                                                                                                                                              TÜRKÇE