|
NAT'URALİ Ç'AMİ: ANZERİŞİ TOPURİ
Kianas çkar mengaperi na var ren pukirişi flora na uğun Yulva Uçazoğas na gamulun Anzerişi topuri nat’urali ç’ami ren. Na ixvenu goşogorapes Anzeris 400-500 ç’eşidi pukiri na skidun do antepeşi doloxe 80-90 endemiuri pukiri xvala Anzeris na iqven oxoi3’onu. Anzeris, am pukirepeşen but’k’ucepek na k’orobups topuri, derdepeşa çare do z’abunobapeşa şvela iqven.
Anzeris nca var irden. Am sebebiten Anzerişi topuris xvala endemiuri pukirepeşi polenepe iqven. Mbulobaş tutaşi çodinaşi dolonis pukirepes na noxedunan but’k’ucepek, Mariaşinaş tutaşi oşkendaşakis topuri oxvenu oçodinapan. T’aronepeşi k’aoba do tipepeşi oç’k’iruşi oraşi toliten topuri k’arta 3’anas dido varna ç’it’a gamulun. Anzerişi topurişa şekeri varna çkar ar ok’atuşi madde var ik’aten. Anzerişi topuri dido z’abunobapeş şvelaşi origini ren. Xampa vit’amini na aqven Anzerişi topuriş doloxe % 25 p’rot’eini ren. Ar çaişi k’izi topurişen na iç’opinen B5 coxoni vit’amini, 75 dik’aş kuvali, 6 k’ilo p’ort’ak’ali, 12 k’ilo balurzaği, 16 k’ilo uşkurişen iç’opinen.
Xususurot manişa energiaşa na guikten xaziri ar oç’k’omale na ren şeni, onçviru, magermeloba, at’let’izmi, bask’etboli, fut’boli, halt’eri, bisik’let’i steri sp’ort’epe k’ala na iboden sp’ort’menepes menceli meçamu do doç’k’indinu osubukanu şeniti ixmarinen. Na gamiğinen Anzerişi topuris, Ankaras Hacettepeşi Universit’et’is polenişi analizi ixvenen. Na gamiğinen topurişi % 70 Germania, İnglandi, Amerik’a, Frangi, Svitzerlandi, K’uveiti, Suudi Arabist’ani, İrani, Japonia steri terepeşa ninçğonen.
Na ixvenu k’liniuri goşogorapes na oxoi3’onu faidape antepe ren:
. Ordoşen oxo3’onas k’anserişi z’abunobapes şvela meçaps.
. Guri do şip’işi z’abunobape, mide do barsağişi z’abunobape oşvelaps.
. Purpu do kunişi z’abunobape oşvelaps, felci do xurişi z’abunobape ok’aaps.
. 3’k’unepe oçodinaps, nunk’uşi pupulepe ok’aaps.
. Opera3iaşi ç’k’irape ordoşen ok’aaps, nuxondunuşi sist’ema on3’uranaps.
. Xurxiş piltvişi pupuli mek’arbups, barsağişi pupuli oşvelaps.
. Ordu do mordinus p’ozit’iuri ak3ia ikips, seksuali menceli monz’inaps.
. Şip’işi k’ap’et’onoba do menz’gipoba eç’k’vidups, di3xiri pağups.
. Ç’k’ua gon3’k’apaps, xazmi operpinaps, umenceloba oçkvapaps.
. Tolepe olasiraps, qvilepe ok’ap’et’anaps, adalepe omordinaps.
. İştaği gon3’k’ips, t’ra3’a mek’vatups, ink’ibazoba oçodinaps, k’ilo var ikips.
. Bere na var aqven oxorcapeşa k’ai nargen, p’rost’at’i mek’arbups, k’vint’eloba,
hep’at’it’i B do C coxoni z’abunobapes şvela meçaps.
. Tomaşi dobğu oçodinaps, oxvalu do ast’imişi z’abunoba oşvelaps.
|
TÜRKÇE
