DUDBUT'K'A

XURAŞİ REAK'SİONİ ALERGİA

Alergia, asluro uzarare namtine maddepeşen vana t’aronişen havaşi notesiru vana psik’ologiuri fakt’orepete namtine maddepeşa, xuraşi didoxeşa reak’sioni meçamue. Normali xalis xuraşi mamçvale noxondinuşi sist’emik, namtine k’oçepes uzarare namtine maddepeşati didoxeşa reak’sioni meçaps. Am reak’sionepeşa “didoxeşa hasasieti” vana “alergia” itkven. Alergiuri reak’sionepe art ç’eşidi va ren, dido sebebite eçkindunan. Xuraşi çkvadoçkva burmepes eçkindunan do çkvaneri şidetis iqopenan.

Alergiuri reak’sionepeşa nusebebe maddepeşa “alergeni” itkven. Am maddepe oşvanuşi gzateti muişvanen, t’k’ebişen itemasinen vana oç’k’omalepete p’icişenti eizdinen. Am maddepete alergiuri reak’sioniş eçkindu şeni xuraşa 3’oxleşen amaxtimu uk’ors. Yani xuraşi noxondinuş sist’emis am madde k’ala 3’oxleşen moxvadinu do antepeşa hasasi noktinu uk’ors. Uk’açxeneri moxvadinus dido manişa reak’sionepe eçkindun. Reak’sioni, xuraşi masti hucrepeş alergenepeş meşvelute opaşu do doloxe muşişen “histamini” coxoni maddeş gamağute eçkindun. Umumi alergenepeş şkas mç’vari, yulafi, zeniştipi, 3’ipuri steri lilvepe do poleni mutepeşi; penisilini, sulfonamidi, salisilati, lok’ali anestezi steri ç’amepe; txiri, susami, çik’olata, zuğaşi maxsulepe, markvali, frasuli, lobia, fistik’i, lobiasoya, mja, dik’a, lazut’i, çxvari steri oç’k’omalepe; but’k’uci, a3’iğe, ak’rep’i steri bobolaş geak’ibinupe; skindinaş toma, bobonç’va, ğanç’k’a steri skindinuri maxsulepe; lat’eksi, z’igaraş k’oma steri majura fakt’orepe molişinen.

Alergiaşi nişanepe nçamini, k’urdeşeni vana astimi, alergiuri rinitişi nişanepe, çindini, çxvindiş 3’ap’a, çxvindi do xurxis nçamini, çxvindişi menz’gipu do xurxiş 3’ara yado molişinen. Egere k’oçis namtine maddepeşa otemasute alergia ağoden na, em madde imendranaşi mesele ilagen. Noxondinuşi sist’emik, xark’i maddepeşa nagaşi entepeş oçinu do ç’k’ua muşis oşinaxu iguraps. Emuş k’ule antigenepeşa ant’ik’orepe omralaps do nodgitun. Organizmas mundes artneri antigeni iz’iru na goşinuşi xususoba uğun şeni xazireli reak’sioni geoç’k’aps. Emuşeni mesela, tipişi nezle omç’un k’oçik k’arta 3’anas polenepe eçkindaşi noxondinuşi sist’emik am xususobaşi sebebite astaxolo reak’sioni meçaps. Alergias riniti, astimi, dermatiti do konjukt’iviti steri ç’eşidepe uğun.



                                                                                                                                                              TÜRKÇE