DUDBUT'K'A

K'ADİMİ NENA SURİANURİ

Surianuri (Suryaya) Hami-Sami nenaluri grup’işi Sami xanç’alişa mek’ireli nenae. Antik’i Aramuli, Aramiuri nenaşen mulun do mcveşi nenape namut Ak’aduri, Asuruli (mcveşi Surianuri) do Babiluri k’ala, andğaneri nenapeşenti Arabuli k’ala mzaxalie. Urfaşi şkaguris dobargeri Surianurepek 2. oş3’anuras Xrist’ianoba ik’abulesşi, Surianuri k’ult’ura Yunanuri k’ult’ura k’alati oxiktu edo menceloni do xampa ç’araloba eçkindu. İrişen beciti noç’are, xvameri svaraşi Peşitta coxoni Surianuri goktirae. Surianurepe, 431 3’anaşi Efesi do 451 3’anaşi K’adikoişi k’onsilepeş k’ule çkvaneri mesebepeşa kok’uirtes do nena do alboni mutepeşiti yulva do geulva yado jur xanç’alişa ok’irtu. Surianuri alboni marz’gvanişen k’vazaliş k’ele iç’aren do 22 bonca uğun. Boncape ok’inç’en şeni geç’k’alas, çodinas do oşkas çkvaneri iç’aren.

Geulvaluri Surianuri antepek 3’opxupan: Bizansişi notesire Monofizit’i (Hz. İsas arteri do uok’o3’k’u tabieti uğun yado icernan) Yak’ubepe, 680 3’anas antepeşen uk’ui3’k’es Monothelitizmişa amaxtes (Hz. İsas arteri ğormoturi k’arakteri uğun mara insanuri iradeti kuğun yado icernan) edo uk’ule 1182 3’anas K’at’olik’oba ik’abules Lubnanuri Marunepe do andğa K’at’olik’i renan mara Bizansiuri ixvamepan Melkit’epe. Yulvaluri Surianuri antepek 3’opxupan: Diofizit’i (Hz. İsas artimajuraşen moşletineri jur tabieti uğun yado icernan) Nesturepe do uk’ule antepeşen ok’o3’k’eri do K’at’olik’i nikteri Keldanepe. Nesturepek yulvaluri Aramiuri, Çini şakis iğes do gontales. Jur grup’isti xonaroni boncape çkvaneri ik’itxen.

Andğaneri Surianuri nenas çkvadoçkva lok’aluri şive uğun do nenaşa Arabuli, Turkuli, Kurduri dido zit’a amaxtimerie. Frengiuri, Germanuri do İnglisuri zit’apeti nenaşa amulun. Turoyo; Yak’ubi Surianurepek ğarğalapan do andğaneri geulvaluri Surianuri şive ren. Tur-Abdinişi k’ortas do St’amp’olis, Suria, Lubnani do namtini Avrop’aluri dobadonapeşa çverepek, Amerik’as do Avust’ralias iğarğalen. Mlahso; Diyarbekiris am şiveşi mağarğale çodina k’oçi 1998 3’anas ğuru şeni mağarğale miti var doskidu. Zit’aluro k’lasiuri Surianurişa, Turoyoşen umosi xolos ren. Suriti (Aturaya); Asuri Xrist’ianepeş k’elen iğarğalen do andğaneri yulvaluri Surianuri şive ren. İranis, İrak’is, Surias, Turkias, K’ibrisis, Armenias, Okortules, Azerbaicanis, Lubnanis, Avrop’aluri dobadonapes, Amerik’as do K’anadas iğarğalen. Ağani yulvaluri Keldanuri; Keldanepeş k’elen iğarğalen do andğaneri yulvaluri Surianuri şive ren. İranis, İrak’is, Turkias, Surias, Lubnanis, Avrop’aluri dobadonapes, Amerik’as do K’anadas iğarğalen. Am şiveşi mağarğalepek Suritişi şive k’aixeşa oxo3’onapan. Hertvini; Siirtişi gomorgvas iğarğalen. Suritişa xolos şive ren. Surianuri şivepeşi mağarğalepek manişa im3ikanenan do mek’arbinuşi şkurna zdipan.



                                                                                                                                                              TÜRKÇE