DUDBUT'K'A

FİLİSTİNİŞİ MAARTANİ YEDGİTA

Filistinişi Maartani Yedgita, 8 Xrist’ana 1987-s Filistinis İsraelişi işgalişa mtelxolo yedgitinute geoç’k’ineri tiezduşi oxonk’ana ren. Filistinis yedgita k’ala artneri oras Hamasikti oxoink’anu. Hamasik, Filistinişi Oxoşkvaşi Teşkilat’işi (FOT) İsraeli k’ala ocedelus p’asivi doskidu şeni iteşkilu do Filistinişi moşletinu şeni akt’ivi ocedelu nik’abulu. Filistinişi dixapeş jin İsraelişi oxen3ale geidginuşi Filistinurepekti çkvadoçkva teşkilat’epe gedges do maişgale xe3ala k’ala ocedelus geoç’k’es. İrişen menceloni ocedelu ren, Filistinişi İslamuri Nodgitaşi Oxonk’ana-Hamasişi go3’oncğonerobas geoç’k’ineri yedgita.

Yedgita, Filistinuri madulyepeş arabaşa art Yahudik k’amioneti muşite mantxu do otxo Filistinuri oğurinuşi, çxoro Filistinuriti oyaraluşi geoç’k’u. Ğureli do yaraleri Filistinurepe Gazzeşi Şifa ozabunaleşa moiqones. Filistinurepek, Gazzeşi İslamuri Universit’eşi Mamgureşi Meclisişi oç’andinus quci meçes do 8 Xrist’anaşi ç’umanis ordoşen Şifa ozabunaleşi 3’oxle ok’oxtimus geoç’k’es. Yahudi askerepek moxtes do Filistinurepeşen goşobğinu ak’vandes. K’alaba xalk’ik var goşibğuşi askerepek k’urşumi istoles mara xalk’ik xoloti var goşibğes do Yahudi askerepeşa kvape astoles. İşte am oğoda yedgitaşi geç’k’ala iqu. Am oğodaş k’ule Filistinişi do bilasa Gazzeşi k’arta k’ele maişgale askerepeşa kvape istolinu.

Hamasik, yedgitaşi maartani tertibis go3’vancğonu do yedgitaşi majurani tutaşen doni p’erioduro xalk’işa oxo3’onapuşi do xalk’uri yedgitaşa gza o3’iruşi, mayedgitepeşa nosi meguruşi gamognapapeşa geoç’k’u. Hamasik, art k’eleti sionist’i duşmani k’ala ocedeluşi simadape muşi do Filistinurepeşi mileturi meselepe şeni siaset’i muşişi oxo3’onapuşi gamognapapeşa geoç’k’u. Xvameri yedgitas manz’inuş k’uleti İzzettin K’assamişi mencelepe coxoni askeruli xanç’ali 3’opxu do aksionepe muşi am mencelepete oxvenus geoç’k’u.

İsraelişi maişgale xe3alak yedgita geoç’k’uşi Filistinurepes noç’irapu. 3’oxle yedgita om3ikanu şeni dido k’oçepe oç’opu do moloxunu. Mara xoloti var geacginu. Kvaşi mastolepeş oç’opinukti yedgita var om3ikanuşi ğocepes yedgitaşi sloganepe ç’areli oxorepeşi doloxvus geoç’k’u. Am sebebişen Filistinurepeşi vitdovit oxori maişgalepeş k’elen uk’itxeri dilixvu. İsraelik, Şabak’işi k’oçepeş k’elen yedgitaşa ak’ateri varna Hamas do İslamuri Cihadişi mak’ature renan şeni gamik’itxinen Filistinurepeşa işkence oğodinuşi k’anoni gamoçkvu.

3’anapeşen doni noqone işgalik, dixa mutepeşis xe gedvinuk, mutepeşi oxorepe dilixvet’uşi Yahudepeşa ağani oxorepeş gek’iduk Filistinurepes şuri nondareret’u. K’oçinobaşi hak’epe iziyaneret’u, k’oçepe iğurineret’u, iç’opineret’u, molixuneret’u, işkence iğodineret’u do gamik’itxineret’u. Am meç’iruşen utesireli art oxori, art ocaxi var doskideret’u. Filistinuri ağanmordepek İsraelişi k’urşumepeşa em dğalepes semboli noktineri kvape astoles do manebre mutepeşikti elak’atesşi no3in3xale yeçkindu. Em dğaşi oğodape mk’ule oraş doloxe Filistinişi k’arta k’ele goint’alu. Gzapes ç’veri lastik’epeşi k’oma, zift’i do barutişi şura geulva Şerias do Gazzes diligzu. Filistinuri madulyepek grevi qves, yaşik’epes şinaxeri do İsraelişi memnuneri Filistinişi bandarape gamiğes. Filistinurepeşi mtelik art k’oçi steri isimaderet’u do yedgiteret’u. Yedgitinu geoç’k’eret’u.