|
ŞEHİDİ ABDULAZİZ RANTİSİ
Abdulaziz Ali er-Rantisi 23 Gimua 1947-s Filistinişi işgali xveneri art no3’ile Yafa do Uşdudişi oşkes gedgimeri oput’e Yebnas dibadu. Aile muşi oput’eşi irişen zengini ocaxepeşen rt’u do mçire arazepe uğut’u. Mara anşi 3’aneri rt’uşi aile muşis maişgale sionist’epek oput’e işgali qvesşi yebargu naç’iru. Aile muşi, Gazzeşi omjore k’eleni k’asaba Han Yunusis gedgimeri multecepeşi kamp’is dibargu. Ak’ranepe muşi k’ala var asteruşakis anşi 3’anerişen doni doguraleşen galeni orapes dulya z’iru do oxandus geoç’k’u. 1965-s lise oçodinu do universit’es ok’itxu şeni Misirişi noğa İskenderiyeşa mendaxtu. 1970-s K’ahireşi Tibbiyeş Fak’ult’eşen mağala derecete imezunu. Xolo K’ahires berepeşi cansağobas mast’eri do dokt’ora qu. 1978-s Gazzeşi İslami Universit’e guin3’k’uş k’ule am universit’es mamgurape yado oxandus geoç’k’u. Am universit’es genet’iuri gzalepeşen nak’limeri zabunobape do berepeşi cansağobaşi jin 3’oxle doçent’i do uk’uleti p’rofesori unvanite dersepe meçu. Rantisi dido ç’k’uaneri do gecgineri k’oçi rt’u do mesleği muşişi ilmiuri xandapes, sosialuri aktivit’epes, ç’andapes do nodgitas manişa içinu do igorinen k’oçi niktu.
P’rof. Rantisi, 1987-s Hamasişi magedgine şkvit k’oçişen arteri rt’u. Rantisiti Hamasişi ge3’opxinuş 3’oxle Gazzes Muslimani cumalepeşi teşkilat’iş go3’oncğoneri k’adroş doloxe rt’u. 1987 3’anaşi yedgitaş geoç’k’inuşen 37 dğaş k’ule serişi gverdis k’alebe maişgale askerepek oxori muşis gules do Rantisi oç’opes. Hamasi resimuro geidginu gamignapuş k’ule go3’oncğoneri k’adroşen ç’opineri maartani k’oçi iqu. Art tuta molaxeduş k’ule oxişkvinu. 4 Mirk’ani 1988-s xolo iç’opinu do 2,5 3’ana molixunu. 4 St’aroşina 1990-s koxişkvinu. Mara arvala 100 dğa golaxtuş k’ule xolo iç’opinu do art 3’ana molixunu. Rantisi k’arta aşo oç’opinupe k’ala mtelo şkvit 3’ana maişgale oxen3aleşi molaxunalepes molaxedu.
17 Xrist’ana 1993-s İsraelişi xe3alas omjore Lubnanişa çveri 415 k’oçişi Filistinişa uk’uniktinuşa izni meçamu dvaç’iru. Rantisi uhak’oni mağduri noktineri k’oçepeşi nenamgektiroba qu şeni molaxunales molit’k’oçinu do 1997 3’anaşi oşkeşakis molixunu. Diabeti rt’u şeni mani-mani tibburi k’ont’rolepe dvaç’irt’u tina maişgale xe3alak ak’o oraş doloxe molaxunales işkence oğodu. Rantisi, 9 İgrik’a 1998-s, Hamasişi askeruli xanç’alişi go3’oncğonerepeşen Muhyiddin eş-Şerifişi oşehidinus ot’onomi xe3alak İsraeli k’ala ok’oişveluya tku şeni ot’onomi oxen3aleşi molaxunaleşa molit’k’oçinu. Akonaşisti hucreşi işkencepe iğodinu. Jur 3’anaşa xolos ot’onomi oxen3aleşi molaxunales molaxeduş k’ule 14 K’undura 2000-s oxişkvinu. 2002-s Filistinuri xalk’i yedgitinuşi gamognapa var oxvenuşi şart’ite oxişkvinu. Rantisişa, 10 Mbulora 2003 tarixişi ç’umanis maişgale oxen3aleşi putxapeş k’elen fuze istolinu mara yaralineri komuçitu.
P’rof. Rantisi, Şeyx Ahmed Yasini işehidinuş k’ule Hamasişi Gazzeşi umumi mesuli i3xunu. 17 İgrik’a 2004-s Rantisişi arabaşa Gazzeşi olandeş k’ele maişgaleşi helik’op’t’erişen fuze istolinu. Rantisişi jur maçumale k’ala 25 3’aneri biç’i muşi Muhammedi ekonaşis dişehides. P’at’işi yaraleri Rantisi, Gazzeşi Şifa ozabunales dincirinu. Mara dido gayreti ixvenu tina var moişletinu do dişehidu.
|
TÜRKÇE
