|
NOĞAROBAŞİ NENA GREK'URİ
Grek’uri Nena (Eliniki Glosa), Hindu-Avrop’a nenaluri ocaxişi muşeburi P’rot’o-Grek’i xanç’ali 3’opxups. Namtini nenamçkinepek; Grek’uri do Armenuri Hindu-Avrop’a nenaluri grup’iş doloxe Grek’o-Grabari yado jindoni grup’is ok’onç’apan. Antik’i Grek’uri, K’lasik’i Yunanuri noğarobaşi nena yado ixmarineren. Moderni Grek’uri dido çkvaneri rennati cinci muşi antik’i Grek’urişen mulun. Grek’iaşi do K’ip’risişi Cumxuriet’iş resimuri nena ren. Grek’uri nena, 7 xonaroni, 15 uxonare, 2 ok’onç’eri 24 bonconi Grek’uri albonite iç’aren.
Grek’uri nena naqonero xmarineri do tarixi muşi gamaçkineri mcveşi nenapeşen arteri ren. Tarixişi didi devres beciti edeburi noç’arepe mralineri art-jur nenaşen arteri ren. Grek’uri nena noğarobaşa, bilasa Avrop’aluri do Oşkeyulvaluri noğarobaşa didi şvela oğodineri ren do k’oçinobaşi tarixis irişen dido alameti meşkvineri nenapeşen arteri ren. Amuşeni Grek’uri nenas, ilmişi, felsefeşi do sanat’işi t’erminologias do kianaşi majura nenapes didi tesiri uğun. Grek’uri nena, didote Grek’ias edoxolo Avust’ralias, Germanias do Amerik’aşi Ok’oxtimeri Oxen3alepes dobargeri tak’ribi 13 milioni k’oçişi nananena ren. Turkias; St’amp’olis, İmbrosis do Tenedosis dobargeri tak’ribi 2.500 Rumişi nananena Grek’uri ren yado itahminen. Edoxolo 15. do 17. oş3’anurapes Muslimani noktineri T’amt’ruli xalk’iş k’elen P’ont’osuri lehçe iğarğalen.
Grek’uri nenas xonaroni boncapeşi jin xveneri ak’sanepe dido inç’elinen. Tonosi coxineri am ak’sanepek zit’aşi hemi telafuzi hemiti maana uktirups. Jur vana umosi dido hece uğun k’arta zit’as ak’sani uğun. Grek’uri nenas fiilepeşi sum ç’eşidi tasrifi ren. Mara namtini unizame fiilepek aya sum nizamişati riayet’i var ikipan. Tasrifoni fiilişen 3’oxle faili oxmaru var unon mara sifatepeti itasrifen. Sifatepe itasrifinet’aşi cinsiet’is mendi3’k’edinen. Grek’uri nenas coxopes; k’oçinuri, oxorcaluri do not’uri yado sumi ç’eşidi uğun. Turkuli nenaşi xila, lilve do maçxomobaşi t’erminepe didote Grek’uri nenaşen amaxtimeri ren. Dido noğaşi coxos, mazuğalobaş t’erminepeşi didopes Grek’uri cinci uğun.
|
TÜRKÇE
