DUDBUT'K'A

ROMAURİ NENA RUMENURİ

Rumenuri (Română), Hindu-Avrop’a nenaluri ocaxişi tudeni grup’i Romauri nenapeşi yulva xanç’alişa mensubi ren. Romaniaşi resimuri nena ren. Moldovaşi resimuri nena Moldovuriti Rumenuri k’ala artneri nena ren mara Moldovaşi dudk’anonis dobadonaşi resimuri nena yado Moldovuri ç’ars. Rumenuri nena didote Romanias do Moldovas edoxolo Bulgarias, Rusias, Uk’rainas, İsraelis, Serbias, K’osovas, Hungarias, K’anadas, Amerik’aşi Ok’oxtimeri Oxen3alepes iğarğalen.

Rumenuri nenaşi irişen mcveşi noç’are Coresi coxoni maç’areşi İncilişi goktiru ren (1560). Rumenuri nenaşi lehçepe sum grup’işa ok’oirten: Daçialuri Rumenuri, İstrialuri Rumenuri do Mak’edonuri Rumenuri. Latinuri nenaşi gramerişa do zit’apeşa dido nungaps. Masdarepeşi tasrifu, zit’apeşi cincepe, cumlepeşi otkuş xali Latinuri nenape k’ala artneri ren. Romaniak, tarixişi morgvalis gomorgvaluri tesirepeşen majura dobadonape k’onari var itesirinu şeni Latinuri nenaşi umosi dido tesiri uğun. Romaniaşi mintik’as Romauri imp’arat’orobaşi xegedvuşen 3’oxle skidineri xalk’i yani Daçialurepeşi zit’apeti Rumenuri nenas ixmarinen. Emuşeni namtine zit’ape, İt’alianuri-Esp’anialuri steri nenapes var oxoi3’onen.

İ.U. 101 3’anas Romaşi imp’arat’ori Trajanik, Daçiaşi dixapeşa xegedveren. Yani am tarixişk’ule Latinuri tesiri Daçiaşa amaxteren. Amuşk’uleti Daçias, Osmanalişi oxen3aleşi do çkvadoçkva oxen3alepeşi işgali ağoderen. Am sebebite Turkuli k’ala oşkari zit’ape uğun. Didi oras SSCA-şi xe3ala uğut’u nati am orapeş doloxe K’iriluri alboni var ixmarineren. Rumenuri alboni, Latinuri albonişa dido nungaps edo arxvala xut bonca çkvaneri ren. Rumenuri albonis 28 bonca uğun.