|
MANİ MANK'AP'URE ANTİLOP'İ
Antilop’i, Bovidae familiaşi doloxe oşi k’onari mtipura skidinaş ç’eşidepeşi coxo ren. Antilop’epe zarifi do çxoupe steri manç’amure skidinape renan. Z’ireri fosilepek Asia do Afrik’aşi dido sotepes antilop’i skidut’uya do oxomo3’onapapan. Amdğanerdğas antilop’işi ç’eşidepeşi didope Afrik’as, arxvala ovro ç’eşidi Asias skidun. Antilop’epe, uçat’ale ginz’aneri krape muşi var dobğapan. İrişen didi antilop’işi ç’eşidi divi xoci antilop’is (Taurotragus derbianus), 2 met’roni mxuciş mağaloba do 700 k’ilo monk’anoba uğun. Emuşk’uleni didi ç’eşidepe demirkir antilop’i (Hippotragus equinus), didi k’udu (Tragelaphus strepsiceros) do germa nyala ren (Tragelaphus buxtoni). İrişen ç’it’a antilop’işi ç’eşidi mapa antilop’is (Neotragus pygmeaus) 25 sant’imi ginz’enoba do tak’ribi 2 ila 3 k’ilo monk’anoba uğun. Emuşk’uleni ç’it’a ç’eşidi dikdikepe (Madoqua cinsi) m3ikaçkva mçxu ren.
Antilop’işi ç’eşidepeşi didopes gont’aleri do mçire oncvinalepe k’ai a3’onenan. Sayga (Saiga tatarica) do çiru (Pantholops hodgsoni) oşke Asiaşi qini do xomula bozk’irepes skidunan. Hindistanişi zenepes maskide dixaluri antilop’epe (Antelope cervicapra) ekseri art kimoliş k’elen oktaleri ç’it’a ilxepete skidunan. Oriksepeşi (Oryx cinsi) sum ç’eşiditi şirimonapes do umç’ime oncvinaleps skidunan. Addaksik (Addax nasomaculatus) arxvala Sahra şirimonaşi olande k’ele skidun. Divi samuri antilop’is (Hippotragus niger varani) mek’arbuşi şkurna uğun. İmpala (Aepyceros melampus) do kesoniceylani (Antidorcas marsupialis) çineri ren, 3 met’re ye3xont’inute do 15 met’re mek’a3xont’ute. Gerenuk’ik (Litoceranus valleri) Afrik’aşi olandeyulva k’eleni 3xik’epunapes skidun. Ekonaşis mçire oncvinalape va ren şeni k’ap’ulani k’uçxepe e3’azdips do calepeşi tudeni qapeşa nunç’uşun.
Omjore Afrik’as 3xik’epunapes maskide sunik (Neotragus moschatus) 3xik’epe ç’k’omups do hemeni 3’k’ari var şups. Ğaroni gnu (Connochaetes taurinus) yulva do omjoreyulva Afrik’aşi oncvinalepes gont’aleri ren. Xçe k’udeloni gnu (Connochaetes gnou) arxvala arjur çumaleri sahas skidun. P’lak’i antilop’i (Oerotragus oerotragus) omjore Afrik’aşi sarpi germapes skidun do oktepes putxun steri ar kvaşen majuranişa ustalobate a3xont’en. Brest’i duikeri (Sylvicapra grimmia) ekvat’orişi xolos rak’anepes mtviri udork’ine germapeşi mağala mintik’apes 3xik’epunapeşi doloxe skidun. Kobik (Kobus kob), Leçdok (Kobus lechve) do 3’k’arişi antilop’ik (Kobus ellipsiprymnus) 3’k’arişa xolos sotepes oskedinu qoropan. Am sum ç’eşidişi kimolepek 2,5 k’m k’onari saha xark’epeşen çumernan. Sitatungak (Tragelaphus spekei) iroras 3’k’aris doloxen. Mt’k’aepes maskide bongo k’ap’ula k’eleni xçe ğarape muşite k’aixeşa impulen. Oşke Afrik’aşi mt’k’aepes irişen gont’aleri antilop’işi ç’eşidi duikerepe (Cephalopus cinsi) tude meleri xilape ç’k’omupan.
|
TÜRKÇE
