|
T'AMT'RA K'APOGİANNİDİSİŞİ K'ASRİ
K’apogiannidisişi k’asri, T’amt’raşi rak’ani Qini3’k’aris çamepete gudgineri art steğoş doloxe ren. Art Nouveu tarzoni zarifi k’asri noğaşi eşrafepeşen K’onstant’in K’apogiannidisi şeni geik’ideren. K’asriş gek’idu 1903 3’anas içodineren. Mance muşi, ocaxi muşi k’ala uçvinuş oras yani 1923 3’anas Grek’iaşa mendaxteren.
Ataturkik iptinero 15-17 St’aroşina 1924 tarixis T’amt’ra moik’itxuşi belediyeşa do umumi mufettişobaşa ideren do uk’ule Qini3’k’arişi muhiti arabate goxteren. Am goxtimuş oras k’asri z’ireren do ekonaşis m3ika moişvaceren. T’amt’raşi majurani mok’itxinus Ataturki, 26-29 3’ilva 1930 tarixis am k’asris musafiri iqveren. Ataturkis, k’asri mo3’onduşi T’amt’rulepek k’asri hediye meçamu isimaderenan. T’amt’raşi xususi idarek xazineşen 2 Pukrik’a 1931 tarixis k’asri eç’operen do vilaetişi daimi encumeniş k’ararite Ataturkişa hediye niçineren. T’amt’raşi 10-11 Mbulora 1937 tarixis masumani do çodina mok’itxinus Ataturki, muşi şeni mo3’ipxeri am k’asris musafiri iqveren. Ataturki ğuruş k’ule k’asri, da muşi Makbule Boysanişa niçineren. 17 İgrik’a 1943 tarixis T’amt’raşi belediyek istimlak’i qveren. Amdğas Ataturkişi k’asri (Belediyeşi xalk’uri muze) yado ixmarinen.
K’asri bodrumişi k’ati k’ala otxo k’atoni kva bina ren. Amaxtimoni k’atis doxunuşi oda, moşvacuşi oda, oç’k’omuşi oda do mok’itxeşi oda ren. Maartani k’atis oxanduşi oda, onciruşi didi oda, oçvuşi oda do ok’oxtimuşi oda ren. Majurani k’atisti ç’it’a oda uğun. Esasi yulva do olande k’ele cephe uğun. Cepheşi xususobapes do binaşi mo3’ipxinus moderni Avrop’uri mimarişi tesiri uğun. Doloxeni taksimepes tuğula ixmarineren. Pi3arişi madulyoba k’aixeşa ren. Doloxeni tesisatis k’aloriferi, lavabo do obonale ixmarineren do emoras antepe ağani işinet’u. Duşemepe k’aro mozaik’i ren do tavanepe ampiri tarzi do alçite mo3’ipxeri ren. Doloxe muşis orijinali Çini, Jap’oni do Avust’uriaşi vazope, moderni musik’aşi şk’api, Osmanalişi usuli sedefoni sehpa, Avrop’aşen muğineri mobiliape do heikelepe ren.
|
TÜRKÇE
