|
QURZ'ENİŞ K'URK'AŞİ DİDŞVELAPE
Ant’ioksidani na ren qurz’enişi k’urk’ak xura, muşi doloxe na yeçkindun varna galendoni uk’ont’role oksigenuri radik’alepeşen do majura radik’alepeşen çumers. Qurz’enişi k’urk’aşi ant’ioksidanuri k’alifik’a3iape, dido çinoberi ant’ioksidanuri vit’aminepe na ren C şi vit’aminişen eçi fara do E şi vit’aminişen jurneçdovit fara umosi menceloni ren.
Nat’uralurot na imralen xilepe, lilvepe do zamzavatepe sağoba çkini şeni dido feidoni renan. Qurz’enişi k’urk’ati antepeşen ar teri ren. Mara oskedinus mteloba uğun. Xvala qurz’enişi k’urk’a, jvari çai, askili steri jur-sum oç’k’omaleten edo majura k’aidepes becitoba var meçamuten, ti tkvani var mogaşletinenan. Sağoboni ar skidala şeni k’arta sezonişi xili, lilve do zamzavati okteri-mokteri ç’k’omit. Mkiri do şakarişen noxvene oç’k’omalepe do majura rafinuri varna p’ak’et’uri oç’k’omalepe dido mo imxort. Nat’uraluri tipi ç’k’omeri 3xovarepeşi xor3i, mja do markvali ç’k’omit.
Qurz’enişi k’urk’ak şip’işi degenera3ias nadgiten do şip’epe tkvani omçiranups. Hip’ertan3ia, gurişi k’rizi do felcisi albatoba minimize ikips. Diabet’oni do varisoni k’oçepeşa dido k’ai nargen. Tolepe mak’uleri degenera3iaşen do k’at’arak’t’işen çumers. Qurz’enişi k’urk’a mteloras k’omp’ut’eri k’ala dulya na ikips k’oçepeş tolişi sağoba şeni dido beciti ren. Qurz’enişi k’urk’a DNA şi ziyani oç’it’anaps do k’anserişa oç’opinuşi risk’i minimize ikips.
Qurz’enişi k’urk’ak t’k’ebis na aqven k’ollageni ok’ap’et’anaps. T’k’ebi na omencelinaps şeni k’ozmet’iuri indust’rias merxemi oqopinotti ixmarinen. Qurz’enişi k’urk’a şip’işi sertoba do muşi k’ala na mulun dido z’abunobapeşa gza var meçaps. Qurz’enişi k’urk’a histaminişi lejveri oç’it’anuten alergias nadgiten. Qurz’enişi k’urk’a p’rostaglandinuri pupulepeşi sent’ezi oç’it’anuten romat’izmuri z’abunobape, 3’k’una do endomet’riozi steri xalepes dido feidoni iqven.
Uça qurz’eni varna emuşi xomula ç’k’omuptt’taşi k’urk’ape k’aixeşa lağunit. Aşoten umosi k’ai megargenan. Qurz’enişi k’urk’a steri xeç’ep’a muşisti p’roant’osiadini uğun. İnç’iri (mç’k’eşi qurz’eni) do ğviniti p’roant’osianiten xampa ren.
|
TÜRKÇE
