|
AĞANİ GURAPAŞİ 3'ANA KOGYOÇ'K'U
2006-2007 gurapaşi 3’ana ma-18-ani St’aroşina tariğis kogyoç’k’u. Geç’k’ap’uroni do oşkenduri gurapas na iguraps nanç’inerot vitootxo milyoni mamgure do xutoşidootxoneçdovitoxut şilya mamgurapalek dersi oxvenuşa kogyoç’k’es. An3’i maartani farot doguronis ok’itxuşa na gyoç’k’u mamgurepe, sum tuta morgvalis moşvacinoni na aqu umçane mamgurepe do entepeşi mamgurapale xelaten gyoç’k’es ağani gurapaşi 3’anaşa. K’arta 3’anas na iqu steri, an3’iti ağani mamgurepe nana mutepeşişi xeepe dokaçeri do xoroneri ides doguroni mutepeşişa do entepeşen namtinepe am3ika toliçilamuroni rt’es. Namtini mamgurepeti var naşkves nana mutepeşi k’lasişen gale oxtimuşa do mteloras imgares. Çkineri t’ragi-k’omik’uri qopinape an3’iti iskedinu xolo. Umçane k’lasepeşi mamgurepek gyoz’i3apt’es ağani mamgurepeşi xalepeşa mara, albat mutepeşi maartani ndğati gvaşinet’es do emuşeniti az’i3inet’es.
Maartani ndğas, ağani do umçane mamgurepe, mamgurapalepe do doguronepes na ixandeps majura maamage p’ersoneli xelaten gyoç’k’es ağani gurapaşi 3’anas mara, iris uğun derdepe, golaxtimeri 3’anapes steri. Didi noğa, ç’it’a noğa do oput’epes na skidunan do doguronişa na ulunan ağani do umçane mamgurepesti, entepeşi nana-babapesti, mamgurapalepesti do majura p’ersonelepesti dido seriuzuli p’roblemepe uğunan: Didi noğapeşi doguronepeşi k’lasepe dido nz’giperi na ren şeni do namtini doguronepes mamgurapalepe na var uqonunan şeni. Ç’it’a na ren noğapeşi namtini doguronepes branşuri mamgurapalepe na var uqonunan şeni. Namtini oput’epes doguroni do mamgurapale na uğun do uqonun tina, mamgurepe na var uqonunan şeni. Çeçme mutepeşi na var ixandeps şeni, 3’k’ari na var uğunan şeni, mamgurapale varna mepağe na var uqonun şeni do emusteri p’roblemepeşi sebebiten şilyapeten doguronepeşi mamgure do mamgurapalepe ek’o xeleberi var renan. Xarcepeti ar çkva seriuzuli derdi ren. Geçk’ap’uroni doguroni do lisepeşi dersiuri p’rogramapeti dobağine na var renan steri, andğaluriti var renan. Dixaşk’ank’aluri ar teres na pskidut şeni, am k’at’ast’rofak mcveşi uk’ap’et’i do risk’oni doguroniş binapeşa umosi seriuzuli zarari meçasunon.
Moro, gurapaşi k’rima maamagepe na ren mamgurapalepeşi ek’onomiuri, so3ialuri, k’ult’uruli do p’rofe3ialuri xalepe dido perişani ren. Xeşpaxa mutepeşi Avrop’uri st’andart’epeşi dido tude na ren şeni do mamgurapalepek çkva dulyapesti ixandepan geç’areli omogu do bere-bari oskedinu şeni. Eşo na ren mamgurapaleti moro na dvaç’irs steri, mamgurepes var oxva3’onapenan, dobağine çkina meçamuşi menceli var aqvenan entepes.
Mk’ule nenaten, gurapaşi skidalas p’roblemi na var uğun spero var ren. Mtel am derdepe do meç’irobaten na dvaç’irs steri gurapa var ixvenen. Turketişi gurapaşi sist’emas ar seriuzuli do radik’aluri riforma dvaç’irs. Oki eşo var ixvenen, Turketis na uğun derdepes manz’inen do em orasti moşletinuşi gza çkar mitis var a3’iren.
|
TÜRKÇE
