|
2006 Şİ K'OLXOBAŞİ FEST'İVALİ İXVAMİNU
An3’işi K’olxobaşi Fest’ivali xolo Okorturaşi Sarpis ixvenu. Mç’ima dido k’ap’et’i mç’ipt’u tina, t’radi3ialuri ndğa ixvaminu. K’olxobaşi Fest’ivali, Berz’enetişen K’olxepes na uğut’u ok’roş t’k’ebi oxiru şeni K’olxetişa na moxtu do ok’roş t’k’ebi na nixiru Argovnat’epeşi ist’oriatenti işinen. An3’işi K’olxobaşi Fest’ivaliti otemaşu şeni xolosoni raionepeşen xalk’i Sarpişa moxtes do fest’ivali ixvames. Mak’ature xalk’ik xepe mutepeşiten na qves pi3arişi noxvenepeti muğu do artikartis o3’iru.
K’olxobaşi Fest’ivali maartani farot 1978 3’anas ixvamineet’u Sarpis. Fest’ivalişi noğira, ağnemordalepes golaxtimeroba mutepeşi oguru do am ist’oriuli ndğaşi becitoba oşinapu ren. Generalurot Mariaşinaşi maeçaniş ndğas na ixvaminen fest’ivali, am 3’anas arm3ika diyanu. St’umari gemabire do k’erk’elepeti ek’o dido var ak’at’es fest’ivalis. Xvala Aç’araşi Avt’onomiuri Resp’ublik’aşi valepe do Gurapaşi Naziri na ren Aleksi Çik’vaiz’e ak’atu fest’ivalis. Nazirik aşo tku:” Am ndğa dido beciti ren, xvala akoni xalk’i şeni var, mteli çkini şeni. Mteli Lazepes şukuri otku minon, aşo mskva do beciti ar ndğa na şinaxes şeni.”
Fest’ivalişa na ak’ates st’umarepek meodanis dodgimeri st’olepe mok’itxuten gyosvareli na ren do Sarpişi xalk’işk’elen noxvene t’radi3ialuri oç’k’omale do ğvinepe 3ades. Sarpuli oput’arepekti oxorişnoxvene do artikartişen nostoneri ğvinepe oşvuten am Ğormotoni ndğas ixvames.
3eremoniaşi irişen badi k’oçi Çxutuneturi Xuseyin Kebulaz’e rt’u. Otxoneçdoşkvit 3’aneri ren tina ixoronu. Fest’ivalis, Maçaxela coxoni do dido mcveşi na ren ar t’ufeğiti i3’irinu. A3’i ar teri na ren am t’ufeğis ar legendati uğun. Mxat’vari Cemal Gorgilaz’eşk’elen kvaş jin noxvene Batumiş manzarepeşi xat’epeti dido mskva do int’eresoni rt’u. Fest’ivalişa maartani farot na ak’atu st’umari k’erk’elepeşen ar teriti Zugdiduri Çokosnebi rt’u. An3’i Turketişen miti var ak’atu fest’ivalis. P’ilili steri t’radi3ialuri xeşnoxvene musik’uri inst’rument’epeti i3’irinu st’umarepes. Sarpuli Nodar K’ak’abaz’e xeşnoxvene p’ililepeşi ar ust’a ren. Ust’ak antepe tku: “Dido mamgurepe miqonun. Entepes p’ilili oxvenu do gelaçamu vogurap. Emuşeni am t’radi3ia dido ginz’e 3’anapeş morgvalis skidasunon yado mepşven.”
|
TÜRKÇE
