|
LAZURİ DOGURONEPEŞİ MAARTANİ SVARA: ALBONİ
K’ult’uruli timoşletinoba mutepeşis t’iranobaten na goladgitespe Lazi berepeşi alboni nixires mara Lazi berepeşi nena var ağurines…
K’avk’asias Lazuri steri nenapeşi oç’aruşi p’ro3esi Soviet’uri p’eriodis, 1920-oni 3’anapes gyoç’k’u. Am nenapeşi albonepe iptineri p’eriodis Latinuri boncapete moirdu do am nenapeşi k’ult’uruli avt’onomia aşoten gyoç’k’u. Meqoneri p’eriodis am nenapeş namtinepeşi albonepe K’iriluri albonişa goktiruten k’ult’uruli avt’onomia mutepeşis naqones mara Lazuri, k’ult’uruli avt’onomia muşi na nik’arbinu nenapeşen ar teri iqu.
Turketis, Lazepes golaxtimeris ar alboni na var uğut’esşi çkinas, iri oras çxvindi nindrik’et’u do mtini var işinet’u. Mara Lazepes Latinuri boncapeten xazireli maartani alboni mutepeşi, Okorturaşi Soviet’uri So3ialist’uri Resp’ublik’as 1929 3’anas na gamiçkvinu “Mç’ita Muru3xi” coxoni gazetas ixmarinu. Soviet’uri tereş doloxvinuşi p’eriodis, Lazepes k’ult’uruli hak’k’epe na uğut’esşi 3’anapes na gamiçkvinu namtini svarapesti moixvadinu.
Alboni, 1935 3’anas Abxaziaşi Avt’onomiuri Resp’ublik’aşi nananoğa na ren Soxumis İskenderi 3’itaşi coxoten gamiçkvinu. Alboni, geç’k’ap’uroni doguronepeşi maartani k’lasepeşi mamgurepeşi oxmaru şeni ixaziru. İptineri p’eriodis Soviet’uri tereşi Lazi berepe, na skidut’es raionepeşi doguronepes nananenaşi dersepe ik’itxupt’es. İskenderi 3’itaşi am Lazepeş doguronepeşi direk’t’ori rt’u.
Lazurişi lit’erat’uruli nena oqopinuşi xandas dido becitoba na aqvasunt’u am alboni, 3’oxlenurot Lazi berepes Lazurişi ok’itxu do oç’aruşi misiaten ixaziru. Soviet’uri geç’k’ap’uroni doguronepeşi maartani k’lasepeşi p’rogramişa moxva na ren am svaras artikartişen mskva do feidoni Lazuri t’ekst’epe uğun.
1994 3’anaşi Gimuaşi tutas, Turketis am albonişi gamaçkumaluk sum temaşi oxo3’onuşa sebebi aqu:
1- Lazuris alboni na var uğunşi p’rop’agandape mek’arbu.
2- Soviet’uri tereşi Lazepes k’ult’uruli avt’onomia na var uğut’essi p’rop’agandape yeç’k’vidu.
3- Latinuri boncapeten xazireli Lazuri Alboni, maarta fara Gyulva Germanias Wolfgang Feurstein-Fahri Lazoğluşk’elen 1984 3’anas na var ixazirinu iris o3’iru.
|
TÜRKÇE
