|
AR AĞANMORDALE İRDEN
Umçanepeşi uonç’elobaşi sebebiten a3’işakis inst’it’ut’i na var aqu Lazuri nena do k’ult’ura, xemaxvenconi do onç’eloni ağanmordalepeşi manz’inuten irden do moxtasnerişi imendi o3’iraps. Lazuri nena do k’ult’ura na onç’elnan ağanmordalepe, nananena do k’ult’ura mutepeşis mancoba ikipan. Ağani qviskili ağanmordalepek, k’ult’ura xvala obiru, oxoronu do kapçia oç’k’omu ren yado var isimadepan. İmendi na momçapan ağanmordalepes, arxvala jur-sum Lazuri birapaşi rep’ert’uari, nak’otxani xoronişi figuri do kapçiaşi oç’k’omalepek nena do k’ult’ura na var askedinasunon do moxtasneri qviskilepeşa na var naçinasunon dido k’ai uçkinan.
Emre Pehlivanlar (Troxte) ağani qviskili ağanmordale-peşen ar teri ren. 1989 3’anas Atinaşi Avramiti coxoni oput’es dibadeen. Sum 3’anaşakis oput’es, vitoar 3’anaşakis noğas skideen. Ok’ule Mp’olişa dibargeen. Mara k’arta çaişi sezonis oput’e muşişa oxtimuten dobadona k’ala k’ont’akt’i var meç’k’videen.
Lazuri, nana muşi do birabapeşen igureen. P’ap’uli muşişen oz’iramuten nena do k’ult’ura muşişa mxuci meçamus gyoç’k’een. Guda, kemance do p’ilili steri inst’rument’epeşa nç’ela aqveen. 2000 3’anas ar oput’eşi ç’andas na iç’andu gudaşi xonari dido k’ai a3’oneen do gelaçamu oguruşa k’arari meçeen. Nanç’inerot ar 3’anas p’ilili k’ala ixandeen do 2002 3’anas maartani guda eç’opeen. P’rofe3ialuri guda gelaçamuşa 2003 3’anas gyoç’k’een. K’ult’uruli sakvarepeşa ok’atuten guda gelaçeen. Ok’uleti kemance anç’eleen do çkar mitişi umeşveluten jur tutaşi doloxe gelaçamu igureen. Pukrik’aşi tutas GOLA Lazuri Xalk’uri Birabapeşi Berepeşi K’oro içineen. Am k’oros guda do kemance na gelaçu Emre Pehlivanlarik, solist’oba oxvenuşa gyoç’k’een, destani tkveen do namtini skecepes roli qveen. Maartani Jvari Gola K’ult’ura, Xeşnoxvene do Gomorgvaşi Fest’ivalişa na ak’atu Emre Pehlivanlarik musik’uri xandapeşa naqonops.
|
TÜRKÇE
