OPUT'E ŞKİMİ DUTXE

Ma na dobirini
Oput’e şkimi Dutxe
Skanda mendra bore
Ma P’oli bore
Mendra dobskudi skanda
Si giçindrare do mogiğare deyi
Mofti P’olişa
Nak’u 3’ana iyu kogişkun
Va memalen
Sum 3’anaşi xut 3’anaşi ar memalen
Xe do k’uçxe domik’oru P’oli
Dido gomau, dido gomaen
İri skani
K’oçepe skani, berepe skani
Pucepe skani, livadepe skani
Cermape skani, gzalepe skani
Ngolape skani, rak’anepe skani
Bere bot’işa na bimçirt’i
Abcape skani
Mp’ulape skani, mç’imape skani
Ar tuta diyen do
Na var iz’iren mcora skani
Mcora skani ar tuta
Nak’u fara gaz’in
Mza va gaz’in mp’ulate
Dido aoropen oput’e şkimi
Mp’ula do mç’ima
Va naşkuman p’ot’e
Va naşkvalinenan, şxuman, mbonuman
Oput’e şkimi
Gomaşinasi bereburaşi eşope
Şkimi guri koxomak’enen
Na miğuru eşepe şkimi
Abazaşi Osmani
Memoğli Riza
T’uxina İlyasişi Fevzi
Xalik’anuri Ebaşi Nezmi
K’ru Helimişi Mecidi
Mok’ik’i Şabani Ali
Eça ndğalepe
Bere bot’işa
P’alik’ari bot’işa
Na gobit’i dixape
Dido gomau
Celayeskuri, Çumayida, Ç’irina,
Zendi, Mt’axori, Xalik’ana, Umcore
Muxudoni, Xok’vati
P’ot’e va gomoç’ondru
Va gomoç’ondrasen
Nana dixa, şkimi oput’e

10.01.1996

 
© 2009 kolkhoba.org