MAPA GUBAZİ

Ğoman Gubazi maz’iru,
Mara mi rťu var miçkiťu,
Xobiş p’icis elaz’iťu,
Diзxiriş ťibas inçvirťu.

Mepti, jileşen voз’k’edi,
P’k’itxi:”k’oçi mu gağodu,
Mik qvilu do ğura skaniş
Ambari mik giťrağodu?”

Min ore, ak mot elaz’ir,
Domiз’vi si sonuri re;
Mu p’a miз’vi do gişvelam,
Bekim da çkineburi re.

Em oras k’oçik kagonз’k’u,
Tolepe çilamuroni;
Ç’viniten koguipatxalu,
Do miз’vu: “giçkin mu reni?”

Heyvax, andğa domp’iles,
Domimk’ulanes dğalepe,
Diзxirit ok’imç’itanu,
Ak na ren mteli ğalepe.

Ma vore mapa Gubazi,
Lazepeş mç’k’eşi ar guri;
Mzaxalepeşen topuri,
Duşmanepeşen arguni.

Ma Lazi vore, Margali,
K’olxi rťu çkimi p’ap’uli;
Ğormotik dunia з’opxuşi,
İqu çkini daç’k’apuri.

Do K’olxobaten movirdi,
Nena çkimi rťu K’olxuri;
K’olxaşen viç’vi, vixali,
Do K’olxaşen ma dobğuri.

Mu p’at, skidala aşo ren,
Ar ulun, majura mulun;
Do xtimerepeş şurape,
Moxtimerepe k’ala gulun.

Aз’i mati зaş gzas vore,
Jilen kianas pçumernan,
Melaikepek ťaxtepe,
Çkimi şeni mumernan.

Edo ma vulur, tkva skidit,
He, şurimşine skirepe;
Ma mendaviğa mendraşa,
Tkvan na giğunan ç’vinepe.

Kşunťan mtelis mi na ret,
Opuťuri do noğuri:
Arteri kiana çkimis,
Lazik’as kogevoğuri.

Gogixtit tkvanti giçkiťan,
Fiyati dobadonaşi,
K’arta ğali do k’arta sva,
Mskvalina Lazonaşi.

Xark’i avlişa va naşkvat,
Mi na ren var iguraşa,
Nena-dadala şinaxit,
Do va gondinat ğuraşa.

Meťa mu giз’va e skiri,
Ora maçoden manişa;
Goxveз’ap: ma na goguri,
Diliği guri skanişa.

Xuras doxuman manişa,
Leťaşi tude xvala ren,
Mara, giçkiťan var ğurun,
Şuri do tkvan k’ala ren!

Antepe tkuşi doğuru,
Aз’i ren зaşa gzaleri;
Mati hak gomak’uзxinu,
Vimçvirťi upis ğvareli.

Aз’iti voз’k’er Gubazis,
Micoxops xonari muşi,
Do ham skidalaş mз’k’upiner,
Gzapes mitanaps te muşi.

 
© 2009 kolkhoba.org