|
|
|
MU P'AT E SKİRİ
Ginon leksi ç’ari, ginon ibiri,
Ginon içalişi, ginon inciri,
Mu na ginon qvi, m3udi ren iri,
Var mema3’qvenan, mu p’at, e skiri?!
Ma bedixaman3ak mu p’a, var miçkin,
Mu mşinapan, p’ia, eti mis uçkin,
Ma na momç’unpe xvala ma miçkin,
Mişa medi p’a, mu p’a, e skiri?!
Dixa muşis iqven monk’a k’ata kva,
K’ap’ik’işa var bğir, ak m3udi mu ptkva,
Mişa medi p’a do mişen mu pçva,
Miş nek’naşa mepta, mişa, e skiri?!
İris aşkurinen t’k’ebi muşişen,
Kimoli k’oçi dido ç’ut’a ren,
İri dulya ikten cumu-mç’k’iditen,
Var vore zengini, mu p’a, he skiri?!
Ora moxtasen, dido mgoraten,
K’ata nena çkimi eşaç’araten,
Em oras irik ma miçinaten,
Şa mz’iraten-i çkva ma, e skiri?!
Kodomabğaşi p’icis k’ibiri,
Domixomaşi t’anis di3xiri,
Kayemixtaşi dudis inç’iri,
Gomişinere do mu iqven, e skiri?!
Vasyugani, 1949
|
|
© 2006 kolkhoba.org
| |
|