BZ'İROP Eçidovitoar 3’ana mek’ilu Nak’o qinva do yazi golilu Xoloti bz’irop, xoloti go3’k’er Xolo çkva şeni e na iqvaper Vo3’k’er zoğa skanis do çai skanis Mjoras na varvalaps he zoğa skanis Vo3’k’er ç’uç’ut’a he noğa skanis Vo3’k’er na gyulun Sunduraş ğalis Kimi Zenis vore kimi Ğaldidis Tesbiği mevuxir xolo nandidis Bazi yepçkindur mitam Arkabis Vo3’k’er k’alati na mobun dadis Kimi K’isas vore kimi Atinas Kimi Sumles vore kimiti Ğeres Var uçkin Turkuli he ç’ut’a beres Ustak oxori k’idups, he beres Sargana p’ç’opup xolo İsinas Bozopes vubir xoloti K’isas Lazuri pxoron xoloti ç’andas Do gogişinap si ma k’ata ndğas E he, xoloti ç’ut’a yanodas Sicak noğamisas k’azi elo3’k’aps Xolo vuz’i3ap skani kva do ncas Pskidur ma miçkin xoloti Xopas Adimis umç’vaps do mani mani Mus meç’işun p’ia he mskva k’ulani T’ik’ina k’ap’ulas so ulun eya Var mi3’umer si p’k’itxa na p’ia Mjorak varvalaps mp’ula va ren n3as Meçxomek feluk’a ağne elonç’aps Vusimin helesas edo yalesas Bazi hesa yossas baziti yissas Yuryati vognap molati vognap Heyamoti vognap yamoti vognap Toli k’ata k’ele golovoqonap İrixolo bz’irop ma iri vognap Vo3’k’er he duzepes he elamtepes He k’uçxe t’et’eli mskva k’ulanepes Xolo ek vore, he noderepes Gemabiran ma mati mutepes Ehe dadik xolo kyume don3’eren Xvani k’alaşişa kagamiğeren Berepek imxornan t’epsis akole De3aş papaşi geno3’k’int’ole Osargane mxucis mojacineri Çxomişen mulun doç’k’indineri Dadi çkimiş biç’i ağne çileri Çil do kimoci p’urmoli steri K’uk’uma igiben k’i3i ç’k’vineri Furniş mkviriş n3omi ren kimineri Mç’k’idi k’i3is gidven, saci moitven Kapçia i3xot’en luqu igiben Biç’ik xazirups atmacaş gyari Markvalişi guri çaps, sari sari Ok’vinçe k’idupan gale berepek Obodaleş mosa şupan badepek Msicis kandara gu3igerenan İri xaziri ren mtviri çumernan Pucik mozari kodorineren Ağne mjaşi 3xoni k’ai iç’k’omen Çakmakli t’ufeği yopşa gelobun Kyumeş xveneri odas go3’obun Bağuş k’ila dadis mpuleri uğun Mtviri şeni iri xaziri uğun Uşkiri ginon-i, m3xul xeç’eç’uri K’ak’ali ginon-i, vana ç’uburi Txiburbali-i, vana Faşuri M3xuliş xoşafi-i, vana uşkiri Qurz’eniş p’ek’mezi vana xurmaşi Şinaxeri ren loqa papaşi Şinaxeri ren kyume sicaşi Mi gyat’en oncğores sica moxtaşi Dido adeti ren aşo Lazuri Lazepe mitişen şa ren-i mt’k’uri Emuşeni ren na maç’uns guri Mara var viqvert p’ant’a bunduri Goişinare antepe mteli Çkva var goxtare k’uçxe t’et’eli Ne Doloqaleşen tirup k’ireli E Lazi da çkimi ğanci ç’ereli Orç’ali t’ik’ina çkva met’k’oçare Kimolişi kyole çkva var iqvare Siti ik’itxare siti ç’arare Na gondini xak’i skani gorare E dadi megomskun muk’o gom3kvana Siti goişaşer iri doptkvana Mu loqa nena ren otkvalu nana Mis go3’vağen skanda ha didi şana Antepe ik’itxi si xeleberi Ar ndğas tanaginon muru3xi steri Giz’i3asen p’icik mjoraşi ç’veri Do iqvaginon moşletineri Sarpi, 1962   © 2006 kolkhoba.org