GİNONNA

Ginonna k’vinçi stei putxinei mogixta,
Ginonna vingimona vitiya do megixta.
Ginonna nek’na gon3’k’i şuris komeşagixta,
Ar ndğastina memşvenu komomçi domibağun.

Ginonna skani şeni germape kamovokta,
Ginonna ixi vorga furt’unaşa govokta.
Ginonna elavuğa mjora kagolovokta,
Ar fara k’ai nena domi3’vi domibağun.

Ginonna k’udeli do jur msva komevik’ida,
Ginonna derdi skani mxucis komovik’ida.
Ginonna si gurp’icis tuta dologok’ida,
Açkva kelamiz’i3i mendraşen domibağun.

Ginonna xon3u stei gont’k’va3ei gegixta,
Ginonna mjora stei ç’umandele yegixta.
Ginonna ğurut’aşa gogan3axa gogixta,
Guri çkimiş sult’ani domaqvi domibağun.

Ginonna okropeşi saraepe dogidga,
Ginonna muru3xişi ar taci tis gegidga.
Ginonna guri çkimis ar taxti kodogidga,
Ar fara kodoxedi em taxtis domibağun.

16.12.1996

 
© 2006 kolkhoba.org