MEDİ MİĞUN

Medi miğun, moxtasen hem orape,
Ar mskva şina, mcveşis nart’u dğalepe.
Na-iyert’u mtel dulyape xelate,
Xolo otanasen Lazonaşi svalepe.

Ora iyu, monk’a dulyape maves,
T’rağodeyi p’it dulyape noderepes.
Ot’rağodu var içoden Lazonaşi svalepes,
Xolo noderepe p’at, mskva dğalepes.

Lazis nomskun Lazuri osinapu,
Lazurişen çkva mu duskidu?
Berepe-çkunis Lazuri coxo gyodu,
Xolo gyoç’k’asen Lazepeş ok’ocoxu.

Medi miğun, na-moxtasen orape şeni,
Ok’ok’idineri var, çku mo3’k’vineri…
Ok’ok’limeri oxtimu Lazepe şeni,
Xolo pskidat, Lazepes na-nomskun steri.

Medi miğun, Lazuri nena şeni,
İri ognas, nanaşi nani steri.
P’ap’ulepe-çkunişi orape steri,
Xolo skidas, Lazuri nena-çkuni.

 
© 2009 kolkhoba.org