XELA DO K'AOBA

Ağanişen, eveluri oraşa,
Nandidi do p’ap’ulişi gurişa,
Gonduneri Lazepeşi şurişa,
Xela do k’aoba, ar p’orgya opşa…

Xanç’eni golaşen, oput’eşa,
Onaş k’alivişen, ont’uleşa,
Mcveşi do serapa ar noderişa,
Xela do k’aoba, ar p’orgya opşa…

Xeleberi do paği berobaşa,
Gonç’eleri, mcveşuri skidalaşa,
Gonoşine na-ivu 3’anapeşa,
Xela do k’aoba, ar p’orgya opşa…

Umeşvenu na-mzgudun oropaşa,
Oropumu me3aderi gurişa,
Ozmonupeş doloxeni medişa,
Xela do k’aoba, ar p’orgya opşa…

Lazepeşi hem doxmeli nenaşa,
Lazuri na-isinapams, nuk’uşa,
Lazonaşen majurani svapeşa,
Xela do k’aoba, ar p’orgya opşa…

Gudaşi sersişen ç’ililişa,
Gzaşi k’aideşen, nanaş nanişa,
Xe k’limeri Lazepeş xoronişa,
Xela do k’aoba, ar p’orgya opşa…

Meleni do moleni Lazepeşa,
Atinaşen şa meleni Sarpişa,
Mzuğap’icişen germaşi tişa,
Xela do k’aoba, ar p’orgya opşa…

 
© 2009 kolkhoba.org