LAZİSTANİŞİ GOLA: VİJA Rizinişi ilçepeş art-arti Vijaşi dixaşzoma ren 88 km². Am dixaşi %80 ren mt’k’alepuna. Germaloni ren, zenepe dido var uğun. Vijas var uğun p’icdop’ici sinori Uçazoğa k’ala. Zoğaş k’eleşen omjoreşakis, ginz’enoba muşi ren 22 k’m. Vijaşi omjore, yulva do gulvaş k’ele k’irk’oleri do zoğaşa p’icdop’icot na geladgin germa K’açk’arepeş k’elen goi3’k’onden. Mağaloba mutepeşi ren nanç’inerot 2.000- 4.000 met’re. Am germapeş doloxe, 3.932 met’re mağaloba na uğun germa K’açk’ari do 3.344 met’re mağaloba na uğun germa Cimili do mağaloba mutepeşi 2.000 met’reşen met’a uk’ore3xu germa do rak’anepe gudgin. Germa K’açk’ariş jin geladgin t’iba Didizoğa, t’iba Meterezi, t’iba Muru3xi, t’iba Doneni, t’iba Serincefi do Uçat’iba coxoni k’rat’erişi t’ibape. Abja Furt’una golulun Vijaşi şkagurişen. Abja Furt’una yeçkindun K’açk’ari do Verçenikişi vadepeşen moxtimeri abja Eleviti do abja Paloviti k’ala abja Ayderişi ok’ok’atute. Abja Furt’una diliben Uçazoğaşa Otena do Art’aşenişi sinorişen. Otena, Art’aşeni, Map’avre, Xemşini, İsp’iri, Ğalit’k’ubi do Mak’ufi k’ala sinorepe na uğun Vijaşi mcveşi coxo ren “Vicealti”. Art’aşeni iqu ilçe 1953–s. “Vicealti” Çamlica coxote nik’irinu Art’aşenişa. 27.06.1957-s gamaxtimeri 7033 k’ore3xaloni k’anonite “Çamlixemşini” coxote ilçe ixvenu. Vijaşi nak’onoba ren 8.206 k’oçi. Şkaguris na skidunanpeşi nak’onoba ren 2.355, oput’epes na skidunanpeşi nak’onobati ren 5.851. Vija 3’opxups anşi maxale do 27 oput’ek. Xalk’ik ulun çkva noğapeşa didote sezonuri madulyot. Didoteti noğapes furuni, lok’ont’a, p’astaxana steri dulyaş sotepes ixandepan. Texişa na var ulunanpekti ixandepan çaişi xaçka, maskindinoba do germaluri dulyapes. K’ult’uraşi meçxomoba do mabut’k’ucoba ikipan. Ayderişi T’urizmişi K’ortas uğun 1.200 oncireşi k’ap’asit’e. Vijaşi t’aroni ren mç’imoni iroras. Qinoras -7 dereceşakis iqinen. Monç’inoras 25 dereceşakis imçxapen. Dğaluri irişen mağali t’u3anobaşi çkvaneroba ren 23,6 derece. 3’analurot m²-s na mç’ips omç’imoba ren nanç’inerot 245 cm3. Havas t’eniti ren %10- %7. Vijas gedgin vit oncironi cansağobaşi şkaguri k’ala arti sağobaşi ocaği. Sağobaşi şkaguris ixandeps ar hekimi, sağobaşi ocağisti jur hekimi. Şkaguri sağobaşi ocağis uqoun sum mamuni, ar xemşire, sum sağobaşi memuri, ar gomorgva sağobaşi t’eknisieni. İlçes sağobaşi şkaguris uqoun ar şofori. Oput’epes koren mtelot çxoro sağobaşi oxori. Oput’e Mek’aleskiritis k’ideri ren sağobaşi ocaği. Sağobaşi şkaguris ar ambulansi, şkaguri sağobaşi ocağis koren ar vasit’a. Vijas koren Nasionaluri Gamantana do Xususi Oktalaş k’elen gek’ideri 12 daironi lojmani, 6 daironi adliyeşi lojmani do 18 daironi belediyeşi sosialuri oxori. Vijaşi şkaguri do oput’epes koren 27 geç’k’apuri n3’opula. Sumik meçaps otironi sist’emaşi gamantana. Şkaguristi koren ar geç’k’apur-oşkande n3’opula, ar lise, ar imami do xatip’işi lise. Mek’aleskiriti do M3’anusti tito geç’k’apur-oşkande n3’opula ren k’ideri. Vijas ok’itxoba-oç’arobaşi nispet’i ren %97. Vijaşi xuti oput’es (Mek’aleskiriti, Ğvandi, M3’anu, Komilo, Abiçxo) Lazuri nena iğarğalen.