GEDVALEREPE

K'OLXOBA


Xolo guiktu 3’ana do, xolo komoxtu stveliti
Xoloti e 3aş tude bdgir, xolo eşo mç’ips eşo mtups
Ndğa nulun 3’ana mus noqups, çkin a ndğalepe k’orop3xupt
3’anas ar dğa ren şuris na, mjora eşulun memoçxups
A nena didos var uçkin, xvala man do sin şurimşine
Sin giqonut’as var oçkva, ibiri mot gaşkurinen
Lazona şuris gogixta, si k’era çkimiş daçxiri re
Guris mgarini momixteps, muşeni k’ai gaçkinen
Lazona şuris gogixta, si k’era çkimiş daçxiri re
Mcveşepe çkiniş dixa re, Ğormoti skani mance ren
K’olxepeşi kovoret motalepe, mcveş alboni miğunan
Oç’aruşi xarfepe, andğaşa domiskidu nena çkimi Lazuri
Emuşeni dopskidi, xoloti var dobğuri

Nena : Yaşa Tandilava

Sİ Mİ QOPERE

Mi qopere si amk’ata, skani şeni vizmon ma p’ant’a
Ma si qorop do si ma var, p’ia ak’o mskva si çkar vart’a

Mi qopere do ma mu ptkva, manişa moxti manişa
Mi qopere do ma megozmon
Si çkimi steri çkar va re, edo m3udişi mot memozmon
Mu giğun guris iz’iren, a3’i memaşkvi si var qorop

Si mutxa ginon tkvi mara, mundesti xolo si mo mçva
Hem başka mi iqven guris do si mi qopere

Ma serişi var vincira, aşo xvala muç’o iqva
Duniaşa p’ia mot moxti, moxtana si mi qopere

Si qopere muç’o mosa, eger emç’opi var emalen
Var minon gurişi 3’k’una, mara mu p’a çkva çare va ren

Mi qopere do so vida, ç’ami çkimi mik mi3’vas
So bz’ira e ma aşo do mevizmon

Ma gi3’vare do iguri, guri gedvare do k’aixeşa
Si domçvare ma moptaşa

Çkar var memaşkva am k’eleşen
Meşvenus vore ma tixçe do mepşven

Mi qopere doptkva xolo, Lazuri obiru minon
Reçine usva kemençes do vizmon, si mi qopere

Bazi na e3’yognap moro, mi qopere ma vigzali
Xoloti moxtat’i moro, mi qopere si maçkinen
Ognapuşa vidat mele do goptat, hem isa emk’el-amk’ele

Mi qopere do vognap ma, mcveşi alboni na miçkit’as
Hele amuşi çkva mu ptkva, alboni şeni ma mik mi3’vas

Ma gi3’vare do ma gi3’va, çkimden k’ai mik goguraps
Çkin dopşinaxat Lazoba bağis pçvat, mi qopere

Si qopere am musik’a, si mi qopere
Amuşen met’i mu gi3’va, çkin mi qoperet

NANİ NANA

Nana çkimda komoxti nana
Mcveşi Lazuri tkvala mibiri nani nana
Nana çkimda komoxti nana
Mibiri nani nana va ğuras nani nana

Sin çkimi k’ala kort’ik’on mşuns ma
Lazuri birapape mibirt’i
Eşo derdoni domibirt’aşa
Nani nana mskva Lazi bozo man dovirdet’i

O nani nani nani nanina
A3’iti xolo komoxti nana
Kogelapxedat çkin xvala xvala
Domi3’vi mteli doviğağala

Nana skidas Lazuri tkvala
Mogaşkurinen nana va ğuras nani nana
Nana ma mteli miçkin
Nana a3’i çkva var imgara, mibiri nani nana

Lazepek xolo eşo ibiran
Mskva berepeti xolo dordapan
Ç’ip’oni xolo oç’andinapan
Nani nana mcveşepe steriti xoronapan

O nani nani nani nani na
A3’iti mtelik vixelat nana
Goviçk’endinat derdi do mgara
Ağne vibirat Lazuri nana

Ç'UT'A Ç'ANİ

Nani nani ç’ut’a Ç’ani, bere mulun nana skani
Kalamani dokaçeri, 3i3i yopşa mokaçeri

Ç’ut’a Ç’ani ç’ut’a Ç’ani, bere mulun nana skani
Kalamani dokaçeri, 3i3i yopşa mokaçeri

Nani nani ç’ut’a Ç’ani, Anak’ras ren baba skani
Ar xes xerxi dokaçeri, ar xes guri mokaçeri

Ç’ut’a Ç’ani ç’ut’a Ç’ani, Anak’ras ren baba skani
Ar xes xerxi dokaçeri, ar xes guri mokaçeri

Ç’ut’a Ç’ani ç’ut’a Ç’ani, n3aşa yextu p’ap’u skani
Biga muşi dobaz’geri, muru3xepe gobaz’geri

Nani nani ç’ut’a Ç’ani, n3aşa yextu p’ap’u skani
Biga muşi dobaz’geri, muru3xepe gobaz’geri

Nani nani ç’ut’a Ç’ani, bere mulun nana skani
Kalamani dokaçeri, 3i3i yopşa mokaçeri

Ç’ut’a Ç’ani ç’ut’a Ç’ani, bere mulun nana skani
Kalamani dokaçeri, 3i3i yopşa mokaçeri

Nena : Nurdoğan Abaşişi

RAK'ANİS XÇE K'OMA

Rak’anis xçe dumani, mtanuras goladven
Tanaşi yulun n3aşa
Rakanis xçe dumani, var gyulun gemtumani
Na z’irupe nimers n3aşa

Dumanis mutxan unon tkvas, nani nana
Rak’aniş ğocis micans, nani nana

Dumani n3aşa yulun, derdi muşi guris uğun
İmgars do mç’ima mulun
Domiqondi e dumani, si mo ida hek’o mani
Nani nani mo ida hek’o mani

Derdi çkimi gagnapinen, derdi skani memognapi
Nani nani mo ida hek’o mani
Derdi skani memognapi
Derdi skani memognapi, mo ida hek’o mani
Derdi skani memognapi...

LAZİ OXORCAŞİ BİRAPA

Uça mzoğas ar feluk’a iz’iren, eya miçkit’as ki mişi ren?
İxi na bars zuğap’icis guikten, dalğa dalğas moqups muikten

Mzoğa k’ala kçumer ma do ordo moxti ordo e şana
Mzoğa k’ala kçumer, mot va mulur ordo e şana

Nani nani nani guri çkimiş xali mik mi3’vas?
Nani nani nani guri çkimiş xali mzoğak tkvas

E başluği skani uça sirmali, muit’aşa k’aravişen mivali
Meleneri let’aş şura momiği, cumalepeş ambarepe domi3’vi

Arkabişen do Paşişa ar t’oroci voçkva e şana
Gonç’eleri let’as nena çkimi mevumçina ma

Nani nani nani guri çkimiş xali mik mi3’vas?
Nani nani nani guri çkimiş xali mzoğak tkvas

Nena : Yaşa Tandilava

HELESSA

Sin mcveşi di3xiri çkimi, sin mcveşi guri cuma çkimi
Açkva xoloti gomişini mi na vore ma

Mcveşepeli ar nenaşen vibirt, ar opeşen yeptit 3aşa
Artikartis qoropaten virdit, artot vort’it gurandğaşa
Dovibirt’it nani nana, yamo helessa

Oi mcveşi di3xiri çkimi, oi vaşa a3’i içkini
Oi açkva xolo icgirali n3ati kort’aşa

Mcveşepek na gemçinadves nena, movingonat kagopşalat
Cumalepek xolo gomişinas, sum sersiten gebirala
Dovibira mcveşeburi, yamo helessa

DOVİXORONAT MCVEŞURİ

Feluk’aten vinçvilat T’amt’raşen Soxumişa
Arkabişen vigzalat Oçamçire Paşişa
Sarpişen Art’aşeni Vi3’e do Atinaşa
Azlağas movişvacat kogolaptat Xopaşa

Dovixoronat mcveşuri, k’uçxe vosterat manişa
Mteliti ok’odgimeri, ok’ovibirat k’aişa

Vibirat do vixelat aşo Sarpi kort’aşa
Xoroneri vigzalat oput’eşen noğaşa
Ç’ip’oni ç’andineri kaeşaptat noğaşa
Soti var dogaç’k’indan eşo aşo kort’aşa

Dovixoronat mcveşuri, k’uçxe vosterat manişa
Mteliti ok’odgimeri, ok’ovibirat k’aişa

Tai steri gulunan biç’epe k’ulanepe
Xoronis mok’odginan oş 3’aneri badepe
Birapaten ran3’k’alaps germas na dgin ncalepe
Z’i3iner xeleberi xoronan cumalepe

Dovixoronat mcveşuri, k’uçxe vosterat manişa
Mteliti ok’odgimeri, ok’ovibirat k’aişa

Nena : Yılmaz Avcı

VA KŞUNS MCVEŞEPE

İxi mibaru kodomç’opu, viburbalop toli gza umendrale
Guris medi gemit’alu
İxi arçkva dovişva umendrale, ma ambari kodomit’alu

Si ma so gora, ma sopes vida, xvala vore gemzuli
Ma si megozmon şurimşine cuma çkimi
Uskaneli ma mu p’a domi3’vi do, soşa viğa derdi çkimi

Çkin mteli arto dovirinit berepe, mtelik nanas p’qoropt’it
Do doviqvitşi oxovak'nit xeepe, mtelik artonoba pçvit

A3’i muç’o p’a do muç’o gi3’va, beki va kşuns mcveşepe si
Cuma çkimi so nulur xvala xvala

ELE MELE K'İSMET'İ

So putxu ç’ak’a-ç’uk’a ele mele k’ismet’i
Dunias mutu var minon qoropa skaniş met'i

Ele mele k’ismet’i si re çkimi k’ismet’i
Mendrale muşeni mç’up qoropa do minnet’i

Skani tolişi k’umxi guris kodolomabğu
Qoropa monk’a t’eren burgilis dolomabğu

Ele mele k’ismet’i si re çkimi k’ismet’i
Mendrale muşeni mç’up qoropa do minnet’i

Ç’ak’a-ç’uk’a mendili rak’anişen mivali
Andğa var memoqup na megomt’inap ç’umani

Ele mele k’ismet’i si re çkimi k’ismet’i
Mendrale muşeni mç’up qoropa do minnet’i

Nena : Nazi Memişişi

AĞANİ ALİLO

Oi Alilo da, oi Alilo da
Eçidoxuti am tutas, K’riste dibadu Betlemis ya ho
Muru3xepe çaçxalapt’es, otanapt’es Betlemis ya ho
Ham mç’k’eşepek kogneşk’ule, k’ainoba bz’irit ya ho
Evusi do Ağavus ya, ğeci go3’obun k’ağus ya ho
K’ai oxormance çkimik ya, m3ika momik’vatups ya ho
Çkin Xrist’ana gegixvamupt, mtelixolo k’ai vort’at e ho

AĞANİ VAHAHAİ HEYALESA

Oxormance nek’na gon3’k’i, ağne 3’ana gegixvamat
Aya mcveşi çkva ağani k’aobate sin ixeli
Pot'e var giz’iramut’as p’at'i şei bedi ç’veri oo..

Vahahai heyalesa, vahahai do heyalesa
Vahahai heyalesa, vahahai do heyalesa oo..

Axur skani puciten yopşa oo..
Bağu skani ğviniten yopşa oo..

Vahahai heyalesa, vahahai do heyalesa,
Vahahai heyalesa, vahahai do heyalesa oo..
Badi do xçini giqonun na oo..
Yextas şkvitoş 3’anaşa oo..
Açkva xolo mominz’ini na p’k’orobi paraşa oo..

Vahahai heyalesa, vahahai do heyalesa
Vahahai heyalesa, vahahai do heyalesa oo..

Nena : Nazi Memişişi

DOLİ DO Ç'İP'ONİ

Oh oi nani, oh oi nani, oh oi nani
Daçxirişi xveneri oi nani nani
Uça tolepe skani oi nani nani
Ağan çoxa z’ik’vaten do nani nani
Xoronap mani mani oi nani

Oh oi nani, oh oi nani, oh oi nani
Ek’o mu megomskun e başluği getveri
Mot i3’k’er gemtumani, emti var e3’i3’k’er-i
Moxtas biç’i do dovigura, oi nani oi nani
E biç’i do coxo skani nani nani oi nani

Oh oi nani, oh oi nani, oh oi nani
Arik Lazi gicoxups majvanik xolo Ç’ani

CİLVELO NANAYDA

Si nak’o mskva na dirdee nanayda
Mot var miçkit’u gyuli oy nanayda
Man skani qoropa şeni nanayda
Dop’ç’upt’i çkimi guri oy nanayda

Dinay nanoy nanoy ninay nanayda cilvelo nanayda

Dunia k’uçxeten govili nanayda
Var bz’iri skani ucgişi nanayda
P'ant'a Ğormotis voxve3’ap nanayda
Si iqva k’ismet’i çkimi nanayda

Dinay nanoy nanoy ninay nanayda cilvelo nanayda

Bulbuli steri na vibir nanayda
Memiuci do işkini nanayda
Si gyuli steri inazli nanayda
Qoropa çkimi mişini nanayda

Dinay nanoy nanoy ninay nanayda cilvelo nanayda

Nena : Nazi Memişişi

DULYAŞİ BİRAPA

Eşulun ağne mjora heyana, e dalepe manişa
Mani mani mek’aptat heyana, var malenan çaişa

Si mele mot geladgir heyana, uça biç’i vigzalat
Tirit k’alatepeten heyana, çkin mani-mani p’3’ilat

Tolis mo3’k’er miz’i3ap heyana, p’ia mu giğun guris
Vaşa soti iç’vet’a heyana, qoropaşi daçxiris

Konagnişi dogi3’va heyana, moro ma na momç’unpe
Ser-ndğaleri malanden heyana, skani uça tolepe

Limci k’lubis ok’optat heyana, do Lazuri vibirat
Z’i3iner-xeleberi heyana, mtel k’olmanis vixelat

Nena : Xasan Xelimişi

SARPİ ÇKİMİ

Sarpi çkimi am seri, tanun tutaşte steri
Açkva komemagat’u, mjoras tolepe steri

Dğalepe nulunan ğalepe steri
Xolo si va nant’re andğa do seri

Var minon var minon çkva miti maqvas
Guikti guikti ti skani mak’vans

Çkini ğaliş berepe, muç’o dağiş mgerepe
Xolo komuirdenan, ginz’e skani sterepe

Nena : Yaşa Tandilava

KARKALAK'İ

Çai p’icis Lazi bozo golobğun
T’ik’inaten karkalak’i k’orobups
Zoğas nabirs guris derditi nobğun

Karkalak’i, karkalak’i k’orobups
Lazi bozok karkalak’i k’orobups

İri dalğak mjoras moni goşobğaps
K’işis dişka çai p’icis elobğaps
K’alaşikti ç’it’a ç’it’a elobars

Karkalak’i, karkalak’i elobğaps
Lazi bozok karkalak’i ok’obğaps

MAMZOĞEŞİ BİRAPA

Andğa zoğaşa mevulur, suvak’işi mosapeten
Ar domi3’vi mundes mulur, dokaçeri pukiriten

Guris moz’in ma daçxiri, mskva k’ulani skani şeni
Ucgişi soti var bz’iri, si çkimi re emuşeni

Ma ç’umanişen limcişa, feluk’aten zoğas vore
Emdğas çxomi maç’opuna, dido xeleberi vore

Ma na gyari momçaps mosa, xes golakaçeri miğun
Emute na p’ç’opa çxomi, man berepeşa memiğun

Mjora yulun ora nulun, zoğa irden zoğa gyulun
P’ia so re si so gulur, ar kobz’ira mot va mulur

NANA DO BERE MUŞİ

Şuri nana guri nana, man var viqver sin var t’ana
Ar tana re çkimi nana
T’u3a ubas men3axeri, man var virder mja var mçana
Skani loqa notkvaleri

Ha nani nani nani, gogixtas nana skani
Gogixtas gogaç’aras nana do baba skani
Şurimşine var pşinana, guri miğun patkaleri
A3’i uskaneli xvala
Acap miti go3’valeni, skani qoropa do mskvanas
Ğormotişen gexvameri, ar tana re çkimi nana

Ha nani nani nani, gogixtas nana skani
On3’eli t’it’i t’it’i, mo imgar ç’it’a p’it’i

Nena : Yaşa Tandilava

ŞURİMŞİNE NANA

Mskva nenaten domibirt’u, şurimşine çkimi nana
Elam3kveri qoropaten, mi3’umert’u çkimi şana

Nana nana çkimi k’ai nana, şana şana vore skani şana

Nana çkimişi birapa, iri kort’as çkimi kala
Ordo ordo gomaşinen, mcveş K’olxuri nena mskvana

Nana nana çkimi k’ai nana, şana şana vore skani şana

Dovirda do dovimskvana, ç’umen man ti viqva nana
Bere çkimis manti vu3’va "gogağara çkimi şana"

Nana nana çkimi k’ai nana, şana şana vore skani şana

MZOĞAŞA MEVULUR

Guris moz’in ma daçxiri, mskva k’ulani skani şeni
Ucgişi soti var bz’iri, si çkimi re emuşeni

Si oncğore mot gaçkinu, qoropak ordoşen cginu
Ma govulur mgarineri, gomanç’elen ocundinu

LAZİ MAMOSEŞİ BİRAPA

Komatferen zoğas tusi, muç’o derdis kelungaps
Tamo tamo dalğaş sersis gelevonç’ap feluk’a

Mosa m3ika domibru3’u, babas komevoç’apa
Do amseri beki mutu beki mutu kop’ç’opa

Zoğa şuriş meç’k’vidala, zoğa guriş di3xiri
Bere baris var vuğana çxomi muç’o manciren

Si tis mgerik tutas amgars, ma zoğas do feluk’as
Tutas dudi gelamidgin do tutaçxas kelungaps

Komatferen zoğas tusi, şuri çkimis konungaps
Tamo tamo dalğaş sersis gelevonç’ap feluk’a

Nena : Yaşa Tandilava

DESTANE P'Ç'ARUP

Destane p’ç’arup ma na mağodu
Si mot imgar sevgyuli mu gağodu

Skani ustine deloba domağodu
Soşa vida haşo qali gelakteri

Uskaneli diqu ar mt’k’o ar 3’ana
Si m3udi gegaqven bekim a tkvala

Domaçodu sap’ri muç’o ptkva çkva ma
Soşa vida haşo qali gelakteri

Nena : Xasan Xelimişi

LAZURİ NANİ

Ha nani nani nani, gogixtas nana skani
Gogixtas gogaç’aras nana do baba skani
Ha nani nani nani, gogixtas nana skani
On3’eli t’it’i t’it’i, moimgar ç’it’a p’it’i
Ha nani nani nani, gogixtas nana skani
Gogixtas gogaç’aras nana do baba skani

T'EXİŞİ LEKSİ

Lazonas dibadet’es, mç’imaten doşoleri zenepes
Boine gulut’es atmaca steri, yeputxut’es terepeşa
Eşo-aşo guiktet’es ixi steri, bazi bazi k’alaşi steri
Baziti zifosi steri do çkar var naç’işinet’es
Baziti feluk’apes gexedut’es do
Haide Paşişa, Oçamçireşa, Anak’liaşa, Guriaşa, Samegreloşa
Oxoris mi dodgitut’u, oxorca do bere-baris gyari unt’esşi
Aşoten mapxas guink’alet’es
Oput’epeşen k’oçepe, k’urbetişa it’es
Lazonas gale ort’es na, zati Lazonaten skidut’es
İsimadept’es, izmont’es do gulut’es irimteli
Kianaşan kianaşa gulut’es do
Var dvanç’k’indet’es, p’ant’a içalişept’es

Lazona, let’a ozmonupeş doloxe na işinaxen…

ÇKUNİ Vİ3'E

Mskva noğa re çkuni Vi3’e, zuğa k’ele na mendi3’k’ers
Ma minon hek vort’a

Ciriliten xen Doğani, do trağudams ç’ut’a Ç’ani
Do leksepe notkvams

Vi3’e gogağarare, gogaç’arare si çkuni Vi3’e

Hak sifteri ç’opuman do, nusteraman ot’rik’epe
Do gamicoxuman

Zuğap’icis maçxomepek, gelonç’aman feluk’ape
Do zuğas nadvenan

İxeli Vi3’e gogağarare, gogaç’arare si çkuni Vi3’e

HAİ NANİNA

3’oxlenepes ham kianas, zoğaşen do zoğaşa
Didi Ğormotis nuçamun, k’ap’et’i mskva xalk’işa
Dobigura hem birapa, hai naninanina
Nani nana nani nana, Ğormoti ren çkini k’ala

Zoğaşen do zoğaşakis, gonç’imeri let’a çkini
E Ğormoti dopçvaminon, muç’o si na memiçkini
Em k’elen do am k’eleşa, skidan cumalepe çkini
Arto ok’ovik’atat do, ar miğut’an guriş ç’vini

BEDİ

Uçazoğas dalğa t’ruxun do naç’k’apen kvas
Seriş gverdis tuta yulun ge3’vak’iden 3as
İxik stvinups do kva do nca geşoktaps
Maçxomekti muş feluk’a gelonç’aps

K’oçis guris derdi uğun do mskva gulutkvas
Zoğa yulun dalğa gyulun k’oçik no3’k’ers 3as
Bedi gorups do var uçkins do3’inas
Nam gzaten do nam yerişa so idas

K’urbetis mis uz’irun bedi, m3udişi mot gorupt’a çkva
K’urbetis çkar gondunun met’i, skidala vaşa iqven mskva

Dobadona na var uğun k’oçi muç’o t’a
Do incubalstepek ulun nam svape mekças
İxik stvinups kva do nca geşoktaps
Do am k’oçik feluk’a so gelonç’aps

Kogvaşinen oxormuşi ok’rebuleş kva
Rak’anepes didi tusi goladveri mskva
Bedi muşi a3’i uçkins do 3’inas
Feluk’ate dobadonas çai gzas

K’urbetis mis uz’irun bedi, m3udişi mot gorupt’a çkva
K’urbetis çkar gondunun met’i, skidala vaşa iqven mskva

TXİREPUNAS

Txirepuna serini, bomkvas bomkva yant’alen
Mot memo3’k’er ç’e biç’i, guris elemankanen

Notas txiri çant’uşi, noderişa moptat’i
Txirepunas elit’i, z’i3ineri goptat’i

Diçodu noderi çkini, domaç’u, domaç’u guri
Ç’e biç’i mo igzal manişa
Mitik noderi vasen, xoloti gicoxasen
Manti moptare hek do, ek dido viz’iraten
Ma skanda va domatkven, z’iraşi mu domaven
Dido 3’ana va miğun, ç’it’a cğore maven

Goğ ek’o mot megomskun, he k’ilici şka k’ala
T’abancaten 3’opxeri, gulur muç’o k’amp’ara

Lira lira ma3’onen, e uça ç’oxa skani
Noğamisa gaqoner, goxela nana skani

Mu iven qoropa çkini, si mepşven, si mepşven gyuli
Ç’e biç’i so ore a3’işa
Mitik noderi vasen, xoloti gicoxasen
Manti moptare hek do, ek dido viz’iraten
Ma skanda va domatkven, z’iraşi mu domaven
Dido 3’ana va miğun, ç’it’a cğore maven

UÇAZOĞAŞİ BERE

Hele vida zoğaşen gemik mu muğu kobz’ira
Zoğaşa vida ek konopskida
Zoğak gumis dalğape muşi ma var mçala
Mendraleşen do sersi mulunan

Qvi zoğauça so vida soşa, qvi zoğauça qvi
Si megadvi do vaşa memaşkva, mçvi zoğauça mçvi
Zoğauçaşi bere vore ma

Hele zoğa si baba çkimişa ma mi mi3’vi
Ç’it’a var vore çkva xoş movirdi
Hele zoğa man baba çkimiş xor3i megandvi
A3’i so bgora mi3’vi so naşkvi

Qvi zoğauça so vida soşa, qvi zoğauça qvi
Si megadvi do vaşa memaşkva, mçvi zoğauça mçvi
Zoğauçaşi bere vore ma

JVARİ K'AMİONİ

Yeşili k’amioni, mati mendemioni
Ma dulya va maxenen, xanumi gomioni

Atinaşi minare, bozo si ekç’opare
Nana skani va ikums, va mişkun muç’o p’are

Haide e bozomota, avla kocedu tuta
Bigzalat oxorişa, egokta do cegokta

UGEDVALEREPE

GOLAS EMPULA YULUN


Golas empula yulun xolo mç’ima mç’imasen
E cuma memiquci nosi gogaşaşasen
Zoğas na k’oma yulun varşa k’aravi ren-i
Doloxedun do mulun ar mskva bozo var ren-i
Xopaşi ar oput’es t’ik’ina mok’ideri
Gyuli mo miğarğalap şur eşamiğare-i
Vulur do govulur ma ar k’ulani var ren-i
E nana kodopskidi soti bozo var ren-i

HEYAMO

Dadis uğun noderi, dopxaçkat do vigzalat
Mani mani dalepe, so bz’irat am dğalepe

Zeni çkinis noderi, tutaste iqven seri
Vibirt xaçker xaçkeri, hem seri hem dğaleri

Andğa k’ai t’aroni, dadi so ren termoni
Ora mek’ilu ordo, op’ç’k’omat komuği do

QOROPA

Muperi t’ani giğun, gyuli 3’i3’ila re-i
İris nena na meçap, şa ok’i3’ilare-i

Gyuli mot gemindrik’i, ma mutu var goğodi
Si ipti gz’irişk’ule, em oras domoğodi

Qoropa p’at’i mutxa, mitisti mo naç’aras
Guri çkimi kok’om3’k’u, ar gomi3’k’edi yaras

Ozmonu ozmonuten, domağodu marazi
Miti megabre va ren, ir domaqu garazi

İriş dulya diqu do, çkimi muşen var iqven
Gyuli komoxti çkimda, goxve3’ap e mu iqven

Nena : Yaşar Turna

MA VULUR

Ma vulur abu abu, ar mskva bozo memagu
Memaguşi vixeli, t’ura kogovaxeli

Emine Apiçxuri, daçxiri re daçxiri
Moxti çkim oput’eşa, var gak’nasen çaçxuri

Emine 3’ulu 3’ulu, burgilepe ma3’k’unu
Emine skani şeni, tolepe domam3’k’upu

Anderi na naşkvare, axir oxori skani
Mot var gokimocapan, golulun ora skani

Ç'UT'A NİSA

Limciner mjora steri, ç’ut’a nisa so ulur ç’ut’a ç’ut’a
Modvalu giç’apare ç’ut’a nisa, k’uçxe giğun ç’uç’ut’a

Dido 3’ana var giğun, ç’ut’a nisa ç’uç’ut’a re ç’uç’ut’a
Si ma domç’vi domxali ç’ut’a nisa, aşote ma so vida

Peçeşen moşatanur, ç’ut’a nisa muç’o ağani tuta
Ubas komeşamixti ç’ut’a nisa, muç’o k’vinçişi mota

Ma gorup var mek’t’k’omer, ç’ut’a nisa sotxanişakis ida
Ek’o mani mot ulur ç’ut’a nisa, memanç’i ç’ut’a ç’ut’a

GZAŞİ K'AİDE

Xoloti kogoladu, rak’anepes dumani
Skani do şkimi şeni, diu axir zamani

Ecvi e mpula ecvi, çoi dolop3’edare
Keç’opes purki şkimi, mati ek’ap3’edare

Vulur vulur var malen, skanda var gamamalen
Ar ndğa var maz’iruk’o, bğuru şuri emalen

Çona sevdali şkimi, memaşkvi do nay ulur
Dolumcaşi moftare, ma hus dağişa vulur

METK'ONİ BİRAPA

Nonç’onaşen gevulur, nena momçi mevulur
E bozo skani şeni, p’ant’a ç’veri govulur
Rak’anis mot geladgir, limcişi xvala xvala
Moxti mendagiqona, mulurna çkimi k’ala
Var megocan ç’e biç’i, var malen skani k’ala
Ubas mu dologiz’in, muç’o zoğaş kvanç’ala
Mtel dadepe ak renan, çkva eşo var barbala
Ma şkurina var miğun, met’k’oçi vincubala

DEST'ANİ

Avla skanis p’ant’a m3xuli inçanen
Razi mo toiya mi na mekçanen
Guri cemat’en p’ant’a cekçanen
Haşo ela haşo hay giondare

Çona şkimik melendo mit’rağudams
Komişkunçi nena muşik miyoxams
Guri şkimik a vorsi gamiyoxams
Miondi meftare e çona şkimi

Toma skani mxucis keyemipini
Mi3’omet’i opşa maenu ini
Him ndğas şeyt’anepe kogomipini
Haşopete muç’o başi p’at’ere

Dudi moi3’amt’i ok’opxet’işat
Kogogak’oret’u him mç’ipe şkaşa
Muya mi3’vi kşuni gin3xonamt’işa
Hani gogoç’ondu e çona şkimi

OSTERU

Jur kvaş oşkendas vore, do vibğer vimkva vimkva
Aşkva va mevuxonu, bgurure m3ika m3ika

E ça man do e ça man, uça bozo momçaman
Var ep’ç’opa ptkvi yado

E sica ak’uş ibiri, cebes kodoluz’in ntxiri
Şeyt’ani mi3’vay nuxiri

E sica oşmeşi nçala, noğamisa koren avla
Kamioni haya ela

E sica dido nikaçu, noğamisa kelikaçu
Oda k’ele amukaçu

Mandre kubazkey direği, aşçi du3’opxu bureği
Pşk’omaten e mubareği

Nena : Yusuf Çakır

NANİ NANİ OY

Ela komoxti ela, e na va mogalasen
Gogala gogala do, şkimda na cegalasen

K’iri mamuli k’iri, k’iram do moy va tanum
P’uli kormepe şk’ala, k’aoba cegotanum

K'OÇARİ

K’ulani çiçku çiçku, muç’o luquşi morçi
K’ap’ulas mogik’ida, monk’a rt’a varna çorçi

Jur k’at’işi gomalu, skani şeni mep’t’k’oçi
Dido xelebas vore, kudi n3aşa yep’t’k’oçi

O nenni k’oçari, kodopskidi beçari
Bozo si ek’ç’opa-i, o nenni k’oçari

Skanda razi var t’aşa, nana baba mep’t’k’oçi
E nazoba skaniten, ma nosis mejamt’k’oçi

Çkvapes nusimini do, ma muşeni memt’k’oçi
Si na coxo gegodu, namu ren ya nam k’oçi

E ASİYE

E Asiye coxo skani k’urbani
Si mu dologocans mçxuriş tik’ani
Berobaşen doni na vort’i skani
Si domç’vi do domxali gyuli çkimi

A3’işk’ule govulur daği daği
Dido miğun guris derdi meraği
Ok’omdğulat si şekeri ma yaği
Si domç’vi do domxali gyuli çkimi

Ağne odas perde kogevok’idi
İzmoceten qalis dologak’idi
Gop’k’u3xişi mgarinis yevuk’idi
Si domç’vi do domxali gyuli çkimi

Bazi bazi gelavit’i noğaşa
Vixosart’i baba skaniş t’k’obaşa
Gyuli çkimi si var ida başkaşa
Çkimi re do giçkit’as gyuli çkimi

HEYAYMOLİ

Heyaymoli, heya yamo, yamo hemo, heyamo

Ar-jur nena doptkvat xolo, gyuli xalaği skani
Mep’t’k’oçare nana baba, skani viqvare skani

Oqviluşi domaqu yar, e cazi nana skani
Ment’ru3as do geilas yar, e biç’i kyoi skani

İrişi guri diqu yar, var iqu guri skani
Met’k’oçi do komoxti yar, p’at’i inadi skani

AM SERİ TUTA VA REN

Am seri tuta va ren, tani muru3xi tani
Çxomi dido p’ç’opina, ç’anda miğun ç’umani

Rak’anis kayuxtimun, tuta Maraşinaşi
Nosis vulur movulur, yari gomaşinaşi

Dağis dumani yulun, acap k’aravi ren-i?
Bozope na gulunan, andğa bayrami ren-i?

3'ULU BOZO

3’ulu bozo soni re?, dido heyar dido qoroponi re
Tolepeşen içkinen, irişen yar irişen noseri re

Si mele do ma mole, sole heyar sole vida ma sole?
3’k’ariş k’uk’uma ezdi, moxti heyar komoxti ğali k’ele

Elabaru k’alaşi, yari heyar yari dililu Paşi
Nosis vulur movulur, yari heyar yari gomaşinaşi

LUŞİ BİRAPA

İşt’ağiti var miğun do, ham carepe mu p’aten
Ç’uk’alite ko3’obun do, lu pşk’omaten pşk’omaten

Moy va nugzam ç’uk’ali do, va xarxalams ç’axala
Gogoç’ondu e bula do, p’ip’eri do p’at’ila

Hayde yari golaşa, rak’aniş k’ap’ulaşa
Mutxanepe gi3’vare hoy, baba skaniş t’k’obaşa

Livadi muşis cant’u hoy, kuçxes fot’a etferi
A kfa kovot’oçi hoy, emk’utu muç’o msk’veri

Dop’3’ili urzenepe do, kocevobği tavas o
Zera do Emines var do, toli miğun Hevas o

Nena : Ahmet Güngör

HEYANA

Xolo komoxtu yazi heyana, bozopeşi marazi
Si ek’o mot megomskun heyana, tis na gogotun k’azi

Musafiri emzdip-i heyana, moptana bazi bazi
Moxti mendagiqona, ek’o mot ikip nazi

Qalis na dologobun heyana, beşluği va ren ğazi
E ğurp’icis mik qvasen heyana, ç’umaneri namazi

XOPURİ XELESA

Xelesa do yalesa, ağani oxoriş nisa
Jur tuteri noğamisa, xelesa yalesa
Heyaymoli yassa yissa hoy!

Xelesa do yalesa, ar domi3'vat’i misa
İqvare-i çkini nisa, xelesa yalesa
Heyaymoli yassa yissa hoy!

Çkini zenepes noderi, tutastesti iqven seri
Bozo kogostu kemeri, xelesa yalesa
Heyaymoli yassa yissa hoy!

Sin man guri domit'axi, so iğare çkim gyunaxi
Goginçxvasen çkimi axi, xelesa yalesa
Heyaymoli yassa yissa hoy!

E mskva bozo toli moni, ek’o mot re qoroponi
Sin noğame va ginoni, xelesa yalesa
Heyaymoli yassa yissa hoy!

Gitanun uça tolepe, va kşuns çkimi k'aobape
Si aşo ç'vaginon didope, xelesa yalesa
Heyaymoli yassa yissa hoy!

Heyaymoli tira tira, k’ulanepe dginan sira
Kimi bozo kimi şira, xelesa yalesa
Heyaymoli yassa yissa hoy!

Nena : Xasan Xelimişi

DOMİVAMİS

Domivamis, emtumanis keşapti
Xut oput’e lazut’i şeni gopti
Var maz’iruşi xolo upşu kogepti
Var içoden narği onç’elu çkimi

K’amik’amis jur tolepe dudgitas
Çili muşi çkimi steri duskidas
Mşkironite ut’ak’ate doskidas
Var içoden narği onç’elu çkimi

Gyari ç’k’omuş mç’k’idi var domiskidu
Ar luk’maşa toli kodomiskidu
Jur luk’maşa parati va domiskidu
Var içoden narği onç’elu çkimi

POT'P'ORİ

Moxtu kocalaxedu 3anaşk’ala m3orida
Nisalepe da şkimi bozope tisya vida
Anderi na naşkvare axir oxori skani
Mo var gokomocaman komoxtu ora skani

E dumani dumani nay ulur mani mani
Nana do baba skani nuk’u ok’oduman-i
Pulera kodolodu toliti var iz’iren
Bozo şuri do guri izmocepes maz’iren

LAZONAŞİ BEREPE

Germa steri mzuğape, ma mok’obilare
Feluk’aşi doloxe, ma golobincirare
Derhule denderhule

Koget’ağanat kapça, keleboç’k’omat şuka
Yali yali bidat do, komebanç’at Vi3’eşa
Derhule denderhule

Var maç’andinen t’ulumi, cumadik mibecğasen
Ar xoroni dixoroni, o na gogağarare
Derhule denderhule

Xoçk’ak’ali do mç’ima, tişi dudis gemolams
Lazonaşi berepe, dunyas ar teği renan
Derhule denderhule

Nena : Musa Karaalioğlu

GOLOBİLAT BİGZALAT

K’anapetis purkepe, oy oy obiç’vi
Naşkvit na idanenpe, hayde bigzalat hayde
Kogoyimskvanudoren, oy oy obiç’vi
Lazonaşi bozope, hayde bigzalat hayde

Hayde bigzalat hayde, va ren mitişen fayde
Hayde bigzalat hayde, golobilat bigzalat

Vi3’e çkunis gobulur, oy oy obiç’vi
Micoxona mebulur, hayde bigzalat hayde
Oropaten dopxombi, oy oy obiç’vi
Mibaraba mepskurur, hayde bigzalat hayde

Hayde bigzalat hayde, va ren mitişen fayde
Hayde bigzalat hayde, golobilat bigzalat

Stvilaz kogeyilen-i, oy oy obiç’vi
Ma kogogaşinen-i, hayde bigzalat hayde
M3’k’upis kogoyilen-i, oy oy obiç’vi
Ham çiles ninç’inen-i, hayde bigzalat hayde

Hayde bigzalat hayde, va ren mitişen fayde
Hayde bigzalat hayde, golobilat bigzalat

Nena : Musa Karaalioğlu

NANA ÇKİMİ MUÇ'ORE Sİ

Nana çkimi muç’ore si, kogiğun-i menceli xol
Vitojur kanyiz t’işa, komekçes si ar k’oçişa
Toli daha var gon3’k’işa oy oy

Nana çkimi muç’ore si, kogiğun-i menceli xol
Livadepe dobergi-i, ntxiyonape dokfini-i
Çayluğepe dontxori-i oy oy

Nana çkimi muç’ore si, kogiğun-i menceli xol
Kotumepe doyani-i, pelikiti domcvini-i
Pucepeti donkeli-i oy oy

Nana çkimi muç’ore si, kogiğun-i menceli xol
Karmat’ezti kogudvi-i, p’ek’meziti dogubi-i
Ayraniti donçaxi-i oy oy

Nana çkimi muç’ore si, kogiğun-i menceli xol
Berepeti doçili-i, doçili dokomoci-i
Motalepe kelordi-i oy oy

Nana çkimi muç’ore si, kogiğun-i menceli xol
Otku do onkaruten, var içoden xenape
Lazonaşi nanape oy oy

Nena : Musa Karaalioğlu

K'OÇİ STERİ KORT'ARE

Nak’o nena giçkin, hek’o k’oçi re si
Nana nena var giçkin na, çkar k’oçi va re si
Haşote muyaseren, k’oçepe xali çkuni
Lazuri gogoç’ondu, oncğorez meyile-i

Var megomskun e skiri, ti ğeğeri goxtima
Mo dgoyiç’k’ondinam, siti k’oçi na ore
Handğa varna ya ç’ume, ç’umanişe va rt’are
Skider ğureri t’aşa, k’oçi steri kort’are

Çkimi oraz berepe, bozo edo biç’epe
Lazur nena doboxvamt, çkuni çkuni xepete
Gaşkurinen mutxaşen, mi noreti var gatkfen
Boyne t’obineri, koninç’en-i ham şuri

Nena : Musa Karaalioğlu

K'OÇİNOBA

Beyari moxtayiz muşen ntxoruman
Goşiğaman tasi kayi nani doduman
Fayde renki hem zameki nzoruman
Hemuşeni k’oçinoba goruman

Livadepez 3’k’ari muşen meçaman
Mjora şeni purkiz mzika muzkaman
Fayde renki hem zameki nzoruman
Hemuşeni k’oçinoba goruman

Onkoruten mkferi muşen nkoruman
Geşoluman mçxviner gestaz geduman
Fayde renki hem zameki nzoruman
Hemuşeni k’oçinoba goruman

Nena : Musa Karaalioğlu

ŞURİMŞİNE

Kyoyis bort’i noğaşe nit’işk’ule
Tamo tamo gelit’i ondğerşk’ule
Skani derdite guri omaç’u
Mot memt’k’omer, axi vaxi e şurimşine

Aşo çkimi gençluği bedi goç’veri
Aşkva dubağu aşkva moxti memiyuci
Ma hak bibgar si P’olis elaxeri
Var mot mi3’ume, ho mi3’vi oropa çkimi

Dunya divu çkimi şeni axi zindani
Gzapes bi3’k’er jur toli mot’axeri
Var gamulun guris oropa skani
Mot memt’k’omer, memiyuci sevgyuli çkimi

Nena : Efkan Şeşen

İGZALİ NA

İgzali na igzali, var iu molva skani
Mefta mogionat’i, var viçinam gza skani

Naminepes celabi, mç’itoni porça skani
Hayde vigzalat hayde, si şkimi do ma skani

E k’aiği k’aiği, sevda şkimi nay iği
Mendiği na mendiği, haşo mo var momiği

SO ORE

Ham seri izmoces daği kobz’iri
Mendili cemilu mişkun si z’iri
Gobili gobili ma si va gz’iri
So ore so ore va moxtare-i

So ore so ore va moxtare-i
Go3’omant’er do 3aşa extare-i

Hayde gyuli hayde dağiş dişkaşa
Ma p’k’vata do si gamiği gzaşa
Burği p’avrite pşvat ela 3’arişa
So ore so ore va moxtare-i

Nena : Ayhan Alptekin

LAZONA

Rak’ani gamotanay, dotanurişi mcora
Komoxtu-i xolo, dulyaşi ora

Mobiselat do bidat, dalepe cumalepe
Nandidi o3’edasen, 3’ulu berepe
Şkunti kogobilat’u Lazonape

Ok’ok’ates do mulvan, Lazepeşi berepe
Muç’o ek’ebişkvaten, ham do melepe

Nena : Engin Alptekin

ZENİS VORT'İ

Zenis vort’i Tunaşa nit’işk’ule
Yano yano gelit’i ondğeşk’ule
Mamgarinu oxorşa meptişk’ule
Mo memt’k’omer na şuri mişinare

Mutxa diqu suzgişi m3xuli skani
Va p’ç’k’omi do dop’i xat’iri skani
Mot var moxti megot’roxas xe skani
Mo memt’k’omer na şuri mişinare

Txiris mebli saği xe met’axeri
Ma ak vimgar si Tunas elaxer-i
Gzapes vi3’k’er tolepe mot’axeri
Mo memt’k’omer na şuri mişinare

Kart’ali miç’ari mati meptare
Mat’rozi gaqva do armas yeptare
Mati skani k’ala Tunas goptare
Ordo moxti na şuri mişinare

MELENK'ALE

Melenk’ale tik’ani
Mele mole onk’ani
Ek’o na megamskvanu
Met’aksi got’k’va skani

Melenk’ale rak’ani
Di3xir dobdvare k’ani
Na mogobun k’alati
Ekol akol onk’ani

Melenk’ale tik’ani
M3’k’oşi t’ot’i onk’ani
Meptar mogiqonare
Va gz’ir oxori skani

 
© 2006 kolkhoba.org