|
1 MİLYAR DOLARONİ NUK'LERULİ AKT'İ QVES
Rusia do Çinik 1 milyar dolaroni nuk’leruli akt’is imza kogedves. İmzaşi seremonia Rusiaşi ağani go3’oncğoneri Dimit’ri Medvedevişi, Pek’inişi mok’itxuş maartani dğas ixvenu. Rusiaşi at’omuri energiaş k’idalaşi dudmaxvence Sergey K’irienk’ok, akt’i k’ala Çinis na dgin ar nuk’leruli sant’rali moirdinasunon do Çinişa xampineri uraniumi gamiçinasunon yado ognapu. K’irienk’ok, “Akt’i ar milyari dolarişen m3ika dido ren. Amuşi gverdi tesisişi omordinuk do majura gverditi uraniumik 3’opxups” ya tku. K’irienk’ok, Çinuri umçanepe k’ala k’orta Tianvanis na dgin nuk’leruli sant’raliş omordinuş temati ok’oviğarğalit yado noqonu. Tianvanişi maartani reakt’ori 2 mbulora 2007 tarixis, majuraniti 12 st’aroşina 2007 tarixis guin3’k’eret’u. A3’i masumani reakt’oriş gon3’k’imu isimadinen. TURKİAŞİ FUZELURİ DUDOÇVALUŞİ SİST'EMA
Amerik’aşi Ok’ont’aleri Oxen3alepes (AOO) dudoçvaloba speros gamiçkveneri Defense Nevs coxoni jurnalik ç’aru, Turkiak dixaşen dixaşa na istolen fuzepeşa medgineri risk’oni noğirapeşi dudoçvaloba ok’ap’et’inuşi simadate, fuzeluri dudoçvalobaşi sist’emape eç’opuşa ixaziren-ya do em temaş jin otxo dobadona k’ala ok’oitkvals-ya. Jurnalik ognapu, Turkuli avt’orit’epek AOO, Rusia, İsraeli do Çinişen fuzeluri dudoçvalobaşi sist’emapeşi pasi do omraluşi çkinape ak’vandu-ya, moxtimeri iptineri coğabepe niçasen-ya. Defense Nevsik fik’iri meçu, İranişk’elen mordineri dixaşen dixaşa na istolen Şahab-3 coxoni fuzepeşi menzilik dolok’atups-ya. Turkias eç’opuşi albetoba na uğun fuzeluri dudoçvaluşi sist’emapeş şkas ren AOO-şi noxvene p’at’riot’i, Rusiaşi noxvene S300 do S400, İsraeli do AOO-şi oşkari noxvene Arrov-2 do Çinişi noxvene sist’emape yado ignapinu.
Defense Nevsik ognapu, Turkiak na eç’opasen do otxo bat’aria do entepeşa mek’ireli majura p’arçape na dolok’atasen fuzeluri dudoçvaluşi sist’emaşi pasi ar milyari Amerik’uri dolarişen met’a iqvasen-ya. Jurnali k’ala na ok’oiğarğalu sp’e3ialist’epek ognapes, irişen idialoni jur k’andidat’i, ok’ok’idinuşi şart’epesti gecginerot 3aderi AOO-şi p’at’riot’i sist’ema do Rusiaşi ağanmorderi S400 sist’ema na ren. Turkiaşi fuzeluri dudoçvaluşi sist’ema, AOO-şi dudoçvaluşi naziri Robert Gatesik Ank’araşa k’unduraşi çodinas moxtuşi, kok’oitkvinu yado ignapinu. İptineri sist’ema eç’opinu şk’ule, Turkiak majurani ar fuzeluri dudoçvaluşi sist’emati oşkari omraluşi gzate omancelu p’lanups yado ignapinu ambaris.
Amerik’uri na3ionaluri arkivis z’ireli oşkurinoni fot’oğrafepek Amerik’uri armiaşk’elen iptinerot 5 pukrik’aşi dğas gamiçkvinu. 58 3’anaş morgvalis şinaxeri am vandaloba mtel t’et’eloba muşite mjoraşi tes iz’irinu. Fot’oğrafepe ren yeşiğeri 1950 3’anaşi x3alas omjore K’oreas. Omjore K’orealuri p’olit’ik’uri molaxunerepeşi mtelot, omjore K’oreaşi armiaşk’elen go3’ok’idoba aşo doloç’areli ren. Andğanerdğaşakis xalk’işsimadaşen mpuleri am fot’oğrafepe na z’iru k’oçepes di3xiri dok’rotu. 3’oxle, mutepeşi sapule mutepeşi xeten zorite na intxorinu molaxunerepe, ok’uleti mtel sapulepeşa geit’k’oçinu. Na mebaz’gupeti zoriten dolit’k’oçinu. Ok’uleti entepeş jin k’urşumepe ist’olinu. Uşuroni xurape p’icdop’ic sapules doloxe na rt’u şeniti, malimepes çkar var aqu doxvuşi meç’iroba. Xvalot let’a gebğes entepeşi jin. Am dulya na goşogoru matarixepek, x3ala 1950-s, omjore K’oreaşi noğa Daejeonişen xolos ixor3elineri am mtelot go3’ok’idobaşi oras şkviti p’olit’ik’uri molaxuneri qvileri na rt’u inoğiren. Daejeonişi ambari a3’işakis ist’oriaşi şigneri irişen didi mtelot go3’ok’idinu na rt’u itahminen. SADRİ ALİŞİKİŞİ P'RİZEPE KONİÇİNU
Mustafa Kemali k’ult’uruli şkaguris me3’opxeri do Kerem Alişik do Berna Laçinik na koçkinapu p’rizepeş 3eremonias, p’rizepeş mancepeşi coxope ignapinu. Teat’rişi t’ot’is xçetomonobaşi p’rizi niçinu Nedret Guvençis. Sinemaşi t’ot’isti xçetomonobaşi p’rizi niçinu Mujde Aris. Teat’rişi speros “3’anaşi irişen gecgineri xvenaşi maktale”şi p’riziti niçinu Genco Erkalis. “3’anaşi irişen gecgineri oxorca masağale”şi p’rizi, Duru Teat’ris isahneri “Ar P’ik’asso domaç’irs” coxoni p’iesis na uğut’u rolite Ayça Bingolis, “3’anaşi irişen gecgineri k’oçi masağale”şi p’rizi Teat’ri Peras na isahninu “Venedik’işi taciri” coxoni p’iesis na uğut’u rolite niçinu Mehmet Ali Kaptanlaris. “Manuşvaluri rolis, 3’anaşi irişen gecgineri oxorca masağale”şi p’rizi MDB noğaşi teat’repeşk’elen na isahnen “Bernarda Albaşi oxori” coxoni p’iesis na uğut’u rolite Ozlem Turkadis, “Manuşvaluri rolis 3’anaşi irişen gecgineri k’oçi masağale”şi p’riziti, Mp’olişi oxen3aluri teat’repes na isahnen “Ok’vak’idu majurani perdes yeçkindasen” coxoni p’iesis na uğut’u rolite Burak Şenturkis niçinu.
Noğanurobapeşi şkaguri, ist’orias iptineri ç’ara, iptineri geç’areli, iptineri ç’areli huk’uk’işi k’aidepe, iptineri musik’aşi alet’i, iptineri gurami mapa do legenda steri dido ondişi iptinerot na iz’irinu sva ren Anatolia. Mu xeleba rendo, entepek na ok’oikipan dido beciti k’ult’uruli ar anderi miğunan. Mcveşoraşen genomskide ar k’ult’uruli anderi, na axvenen k’onarite ok’oxtinoboni do vizualuri xampobas doloxe na meçasunon, berepe umekaçinute, entepe k’ala dido ondepe ok’oltalute am k’oroba ağani tasepeşa na naçinasunon p’iesi ren “Midasişi qucepe”. Maç’are: Gungor Dilmen; Maktale: Umut Toprak; Manuşvalepe: Şirin Toprak, Ozgur Keçeci; Dek’orişi masimadale: Sertel Çetiner; Dolokunuşi masimadale: Gazal Erten; Teşi masimadale: Mehmet Yaşayan; Dansişi me3’opxa: Koray Ural; Dramat’urgi: Şirin Aktemur Toprak; Sahneşi umçane: Serpil Kiliç; Teşi maktale: G. Ahmet Gokdemir; Suflozi: Ş. Belgin Ulusoy; Masağalepe: A. Volkan Çetinkaya, Ozgur Keçeci, Murat Ozben, H. Ebru Gulerarslan, Ahmet Çokmez, Ozgur Baş, Çağatay Çiftçi, Revşan Genç. 3'URAK'OBAŞİ ÇETE KOGOŞİBĞİNU
K’era mutepeşişk’elen elit’k’oçinu P.A. do D.B. doskides omralobaşoxoris. Jur ağanmordale k’ulanik imt’es na skidut’es omrolobaşoxorişen jur tuta 3’oxle. İptineri dğalepes, cebes na uğut’es ar-jur oşi lirate goiles barepes Taksimis. Geç’areli dvaçodesşi, P.A.-k oxandus kogeoç’k’u ar t’ekst’iluri atolyes, Esenyurtis. Xveneri idiaşi tolite, artneri atolyes na ixandept’u 25 3’aneri Mine O.-k, omralobaşoxorişen imt’es na iguru P.A. k’ala muşi manebre D.B.-s manebroba o3’iru do gun3’k’u entepes oxori muşişi nek’na. Mp’olişi noğaluri jandarma sardalobaşi ek’ibepek op’era3ia qves Mine O.-şi oxorişa Esenyurtis, golaxtimeri dolonis, nark’ot’ik’i na gamiçinen do 3’urak’oba na ixvenenşi ixbarite. P’olisepek nek’na get’axesşi, P.A. do D.B. nark’ot’ik’işi magamaçamale ren ya na itkven İbrahim Y. do Vedat S. k’ala ar oncires koiz’iru. Oxoris xveneri goşogoras, otxo pak’et’i, İbrahim Y. do Vedat S.-şi oxorepesti 98 pak’et’i 50-oni gramoni esrari k’ala uruxsatoni silaxi iç’opinu. Nark’ot’ik’işi magamaçamaloba do berepe moğerdinobaşi k’abaxat’epete Buyukçekmeceşi adliyes maxkemeşa meiqoneri Mine O., İbrahim Y. do Vedat S. okaçute mendiçkvinu xapisxanaşa. Masaveşi k’ararite ok’ont’rolinuşa mendaçkvineri P.A. do D.B. bozo na va rt’u oxoi3’onu. Ç’it’a k’ulanepe xolo konişkvinu omralobaşoxorişa.
|
XALK'İŞSİMADAŞİ OZİMOBA K'İP'RİSİS
K’ip’risuri Urumepek kogeoç’k’es oktirus K’ip’risuri Turkepe şeni negat’iuri osimadu, Tasos Papadopulosisi p’olit’ik’a kogeijilu şk’ule. Çodina xveneri xalk’işsimadaşi ozimobaşi tolite, Urumi xalk’işi oşişen 85-k k’abuli ikips K’ip’risuri Turkepe k’ala arto oskedinu, uoşkurinoba ixor3elinas na. Go3’os xveneri ank’et’is am nispet’i rt’u oşis 63. Urumi Politis coxoni gazetak gamoçkvu Noverna consulting and resarch coxoni k’omp’aniak 18-30 igrik’aşi tarixepes, 500 şurişi ok’atute na qu ank’et’işi çodina. Gazetaşi tolite, ank’et’is k’itxeri k’itxvapes işart’inu “ge3’k’umoba do uoşkurinoba mtelot ixor3elinaşi” yado. “Uoşkurinoba mtelot ok’idu”şi şart’ite Urumepes otku unonan k’un3’ulaşen mtelot Turkuli malimeşi oxtimu do Turkiaşi garant’orobaş oçodinu.
Ank’et’işi tolite, K’ip’risişi p’roblema gein3’k’uminuşi xalis, Urumi ağanmebargalepeşen namtinepek k’ai tolite o3’k’en tazminat’i ezdimus, mcveşi mulki mutepeşişa goiktu var. Ank’et’is na ak’atupeşi doloxe tazminat’is “ho” na tkupeşi nispet’i oşis 46; “var” na tkupeşi nispet’iti oşis 39 ren. “K’ip’risişi p’roblema ge3’k’umus, tkvanda endişe na goğodapan ar xali koreni”şi k’itxa ik’itxinu ank’et’is. Am k’itxas “ho” itkvinu oşişen 47 nispet’ite. “Ho” na tkupe şeni irişen didi endişeşi odudeti ren k’un3’ulas na skidasunon Turkiaş cinconi Olande K’ip’risiş Turkuli Resp’ublik’aşi dobadonarepe.
Che na dibadu noğa Rosarioşi meydanis na ik’idasen 4 met’re ginz’enobas do sumi t’oni monk’anobas devi heykeli, iptinerot didinoğa Bunenos Airesişi kuçapes goingzalinu. Heykeliş Buenos Airesişi t’uri diçodu gedgineri kvas, namuk na ren Buenos Airesişi simboli. P’roekt’is mxuci na meçu Ernesto Che Guevaraşi muzeumiş direkt’ori Eladio Gonzalesik çodinas, medi3inuri dogurale na ik’itxu, ağanmordaloba muşişi hulyapeşa oxormancoba na qveret’u noğak xolo z’irops muşi oxtimu-ya tku. Bronzişi heykeli, Cheşi 3’anoba mbuloras, maotxoneçani dobadonaş dğaşen ar-jur dğaş 3’oxle Rosarios k’aide muşis geidgiu. SUMİ K'AT'İ ÇKVA ZİFİRİ UĞUN
Doğuş universit’eşi manuşvale do3ent’i dr. Asli Çarkoğlu do Erdem Pulcuk anşi tutaş morgvalis na qves goşogorak gamognapu ar mtinoba. Z’igaraşi pak’et’epes noç’areli nik’ot’ini, k’arbonmonok’sit’i do zifirişi nispet’epete goşagorineri z’igarapes na uğun nispet’işi şkas mtelot sumi k’at’i çkvaneroba iz’irinu. Z’igaraşi pak’et’epes noç’areli ğurz’ulişi nispet’epe tapala o3’iruk 35 milioni z’igaraşi t’iryak’i na skidun Turkias, ağani ar cansağobaşi sk’andali çkva ognapinu. FİLMİ: "…Şİ BEREPE"
Malimuri darbe şk’uleni vaxti ren. Na igoren ar çili-komoci menyaş gale oxtimu gonk’vatupan. Omt’inuş 3’oxle bere mutepeşi obargu şeni, uoşkurinoboni ar sotxani gorupan. İrişen uoşkurinoboni sva ren Mehtap nanaşi berepuna. Mara entepes na var uçkinan ar mutxani koren: bere mutepeşi na dobarges svaşi mance ren mcveşi ar 3’urak’a. Mehtapik gon3’k’eret’u ar berepuna, na ixandeps 3’urak’apeşi berepe şeni. Çili-komocik menyaş gale imt’es şk’ule, bere mutepeşi ezdas yado İt’alianuri k’ulani Turkiaşa mendoçkumernan. Murenki dulya var içoden entepes na unonan steri…
Daily Mail coxoni gazetaş ambarişi tolite, Missourişi vet’erinerobaşi doguralek gurişi zabunoba na uğut’u xuti 3’aneri çik’olat’aşi peroni Labrador cinsoni Mollyis gurişi pili doludvu. 3’una Mollyis op’era3iate pili dolodvus, guris na uğut’u p’roblema na iz’iru şk’ule k’arari niçinu. Mollyişi mancepe Allen do Alicia Brovnik meo3xvu, 2 şilya 500 Amerik’uri dolari k’onari na ren op’era3ia do muşi majura masrafepe, lok’aluri ar gazetas gamiçkvineri “Mollyis gurişi pili dvaç’irs” yado ambarite entepes niçineri şvelapete. Oxori muşişa na goiktu Mollyik ar-jur tutaş doloxe naqonasunon mcveşi dulya muşişa. Edo K-9 goşogoru do moşletinuşi brigadis cansağobaşi xalk’işa gurişarot mxuci na meçaps Brovnişi k’erak. Dido energiuri na rt’u Mollyi golaxtimeri tutas arşvacis uxonaroni iquşi do şuri moşvacinuşi derdi zduşi zabunoba muşi oxoi3’oneret’u. İRİŞEN 3'ANERİ COĞORİ
Gazeta Daily Mailik, Labrador cinsoni Bela şeni a3’işakis irişen 3’aneri coğori ren yado ç’aru. Mara 76 3’aneri mance muşi David Richardsonik ma-ya ep’çopi Bela-ya 1982 3’anas-ya, sumi 3’aneri rt’uşi-ya, xes sureti na var miğun şeni-ya ispat’i var maxvenen-ya. Golaxtimeri dolonis dido na izabunu do na var agzalu şeni Bella kodonciras, mtini gi3’vat na, doqvilas yado vet’erinerişen randevu ep’ç’opi-ya. Murenki var maxvenu do randevu mebjili-ya tku Richardsonik. Livadis na vuntxori sapuleti kevopşi xolo let’ate-ya. K’ap’ulas goviktişi, Bela rt’u otxo k’uçxes jin do igzalt’u-ya. Edo k’ap’et’i rt’u-ya. A3’i k’ai ren-ya. Mitam domsincu-ya tku. Ofi3ialuri ç’arapes na iz’iren irişen mcveşuri coğori rt’u Avust’ralias 1939 3’anas 39 3’aneri do 5 tuteri rt’uşi na ğuru cogişi coğori Blueyi. İrişen mcveşurot Guinnessişi rek’ordepeşi svaras amaxtimeri coğoriti rt’u Amerik’aşi Ok’ont’aleri Oxen3alepes 2003 3’anas 28 3’aneri na ğuru Beagleşi cinsoni Butch. P'ARKİNSONİŞİ MAAMBAREPE
The marmara ot’elis, k’onferan3ias na gamağarğalu p’rofesori Haletlik, p’arkinsonişi zabunobak k’oçis k’ank’ala ek’onudginaps-ya, k’ank’alaşi dork’inobas nusebebups-ya do aşopete otirtinu do ogzaluşi ok’oxvobaşa gza meçaps-ya tku do aşo noqonu: “K’ank’alaşi semp’t’omepe ik’aen mara p’arkinsonişi zabunepe renan dep’resifi generalurot. Na tirtins zabunepes, p’arkinsoni irden umosi tamot. Zabunoba ren oşişen 15 nispet’ite genet’ik’uri fakt’orepete yeçkindineri. K’ank’alaş şkaguronişi gale onç’onobape muşi ak’aen meç’irelot. Am onç’onobape hip’ertansioni, guri do kunişi zabunobape, ink’ibazoba, t’u3anoba do qinobaşa unoxondinoba, obsesiuri seksi, dido upi geçamu, dğas ncironi goxtimu do seris unciru. Amuş met’a k’umarişi gegaperobati ren p’arkinsonişi maambare.” P’rofesori Halletik p’arkinsonişi zabunobas dvaç’irs ç’amişi şvela-ya, 3’oxle do ok’uleti-ya op’era3iuri gzalepeti dvaç’irs-ya tku. P’rofesori Halletik eroini na ixmars ağanmordalepesti risk’i uğunan p’arkinsonişi zabunobaş-ya tku. |
ABXAZİAŞİ AĞANİ MO3'QVAŞ P'LANİ İ3'OPXİNEN
Gazeta Kommersantişi tolite, Abxaziaşi ağani mo3’qvaş p’lanik, Margali multecepeş irot Abxaziaşi Gali do Oçamçireşi k’ortapeşa uk’uniktinu noğiraps. P’lanişi tolite, am k’ortas na geşaxenan Rusepeşi mo3’qvaş askerepe gamaxtasunon do k’ortaşi emniet’i Okortura do Abxaziaşi p’olisepek artot oxor3elasunon. K’odorişi ğaliş olande k’ele mtelot Rusiaşi k’ont’rolişa nişkvinasunon. Okorturakti K’odorişi ğaliş olande k’ele Kortu multecepeş uk’uniktinuşi ok’vandu naşkvasunon. Abxaziaşi ağani mo3’qvaş p’lanişi det’ayepeşi tolite Tbilisik, Rusiaşi k’ap’it’aliş Abxaziaşa moğinuşa var nodgitasunon. Edo xolo Tbilisis, Rusiaşi Federasionişen formalit’ot rt’astina Abxazia do omjore Osetia k’ala p’icdop’ic ok’ont’akt’uş k’ararişi mejilu unon. Gazeta Kommersantişi tolite, p’lanis uğun Abxaziaş huk’uk’uri st’at’uş ogarant’inu do Okorturaş doloxe dido mçire hak’epeş meçamu. Mara p’rakt’ik’urot K’odorişi olande k’ele am p’laniş doloxe var t’asunon. EK'LESİAPE MEÇETİ NİKTEN
Belçik’aşi majurani didi noğa Anversis, cemaat’i muşi na im3ikanu şeni, o3’k’omiloba do tamiroba şeni, geç’areli na var az’iren ek’lesiapeşi meçetişa noktinu varna çkvadoçkva noğirapete oxmarinu ip’lanen. Anversişi k’ult’ura, t’urizmi do religiuri monument’epeşa coğabinameçaps, Krist’ian demok’rat’i belediyeş manuşvale reisi Philip Heylenik, De Morgen coxoni gazetas na meçu oxo3’onapas, noğas na geladgin 80 ek’lesiaşen didopes var uğun dobağine cemaat’i-ya do namtinepes uqonun xvala 20 şuri ar dolonis-yado ognapinu. “Muşeni var mepçat namtini ek’lesiape Muslimanepeşi oxmarinus” yado na k’itxu Heylenik, Anvarsis nak’onoba muşi şurşurisobas na imağalen Muslimanepeşi dvaç’irobas gza na meçasen didi meçetepe na varenobasti no3’iru. An3’os noğaşi doloxe na geladgin ek’lesiape na moik’itxasunon do entepeşi p’ap’azepe k’ala na ok’oiğarğalasunon na oxo3’onapu Heylenik ek’lesiapeşi envant’eri o3’opxu diçodaşi, ek’lesiape meçetot varna çkva noğirapete oxmaru şeni tolite iz’irasen gzalepe na o3’iarasunonşi ambari meçu. T'URİST'EPEŞA MAFİAŞİ T'URİ
Brezilias, onç’eloni t’urist’epes nark’ot’ik’uri mafia k’ala ok’oçinuşa gza meçamu şeni t’urepe 3’opxeri na rt’u oxoi3’onu. Noğaşi umuteli raionepe na nok’itxupan t’urist’epes silaxoni nark’ot’ik’uri abrak’epe k’ala ok’oçinuşa gza niçinen yado şigneri idiapeşi sebebite noğa Rio de Janeiroşi p’olisik goşogorus geoç’k’asunon. Breziliaşi p’olisis oxo3’onu unon, am goşogorak t’urist’epeşi skidalapes zarari meçaseni varna var meçaseni yado. P’olisik t’urist’uri gzaloba na 3’opxups k’omp’ania do t’urişi p’olit’ik’asti ek’agorups. Brezilialuri t’urist’uri rexberepek 3’opxupan t’urepe Rio de Janeiros, skidalaşi na var iz’iren nunk’u t’urist’epeşa o3’iru şeni. Brezilias, ar milyonişen met’a umuteli k’oçi skidun Rioşi gomorgvas goşabğeri varoşepes. Oşkurinoni nark’ot’ik’uri abrak’epek oktalapan namtini varoşepe didopete. Majura varoşepeti mok’itxuşa moxva ren yado içkinen. Folha de Sao Paulo coxoni gazetakti na gamoçkvu ar ambarite ognapu, ar k’omp’aniak gza meçaps silaxoni malime coxoni mitxanepe k’ala ok’oçinusti yado. Gazetak noç’aru ambari muşis, nark’ot’ik’uri mafiaşi mak’aturepek t’urist’epe k’ala ok’oiğarğalnan yadoti. Gazetak mendoçku ar maambare muşi am oşkurinoni varoşepeşen ar terişa t’urist’ot. Maambare ok’oiçinu silaxoni ar k’oçi k’ala, am t’uris. Am k’oçişi tkvalate, raionis nark’ot’ik’uri t’rafiği na oktalaps ar grup’işi k’oçi na ren aya adami xapisxanas molaxuneri rt’eren 9 3’anaşi morgvalis. Am silaxoni k’oçik, muşi k’ala na rt’u maambare do t’urist’epes aşo tkveren: “İrişen didi endişe çkimi ren p’olisi do rak’ibi abrak’epe.” Avt’omat’ik’uri silaxoni ar mitxanikti oxo3’onapu t’urist’epes, muç’oşi ixandeps 12 saat’oni vardiyapete do ar dolonis 180 Amerik’uri dolari na mogaps. 19 3'ANERİ P'ROFESORİ!
Ok’itxu do oç’aru vit tuteri rt’uşi na iguru, Amerik’aşi Ok’ant’aleri Oxan3alepeşi dobadonari Alia Saburik notamamu universit’e vit 3’aneri rt’uşi. Alia Saburik dokt’ora muşi notamamuşiti, vitootxo 3’aneri rt’u. Omjore K’oreas, K’onk’uk’u universit’es xolos ar vakit’is p’rofesori unvani muşite dersepe meçamus geoç’k’asunon. A3’i vitoçxoro 3’aneri na ren Alia Saburik vit 3’aneri rt’uşi notamamu Stony Brooki universit’e. Alia Saburiş ekole Guinness rek’ordepeşi svaras na amaxtu irişen ağanmordale p’rofesori, çinoberi mafizik’e İsaac Nevtonişi mamgure Colin Maclaurini rt’u. Omjore K’oreas dersi meçamus na geoç’k’asunon Alia Saburis var uçkin K’orealuri nena a3’i. Alia Saburik, matematik’a do musik’aşi nena miçkin do aya gamantanu şeni domibağun ya tku. AĞANİ ÇERİBAŞİ 3XUNES
Maxale Menzilahiris xveneri çeribaşobaşi 3xunas kogeoç’k’u, arteri namzet’i na rt’u Fikri Ocaki, maxaleşi k’axvexanas ar orz’os dodgitinute na qu ğarğalate. Romani dobadonarepes na nucoxu do na qvasen dulyape na oxo3’onapu Çeribaşobaşi namzet’i Fikri Ocakik, 18 3’anaşen doni çeribaşoba na ikipt’u Mehmet Ali Korukluk, k’ai var domitemsilnan-ya tku do aşo noqonu, “Mcveşi çeribaşi çkinik var domitemsiles k’aixeşa do 3xuna oxvenu gevonk’vatit. Mati tkvani omxvacute arteri namzet’i viqvi do vognapi çkimi çeribaşoba. Na momçit mxuci şeni didi mardi gi3’umert.” Ağani çeribaşik na qu ğarğala şk’ule, 3xunaşi speros na ok’oibğes Romani dobadonarepek Fikri Ocaki mok’idute goiles maxales. Ok’uleti artot davuli do zurna k’ala korbaşi dansite ixeles Romani dobadonarepek serişi yano saat’epeşakis.
1 Pukrik’a 1945: Germaniaş nazi p’rop’agandaşi naziri Joseph Goebbelsik muşi oxorca do anşi bere oğurinu do ti muşi niqvilu Sovieturi armiapek Berlinişa amaxtesşi. |
"ARTOBA ÇKİNİ VOK'AP'ET'İNATEN"
Prot’ok’olişi tolite, Ortodoksuri majura ek’lesiape mok’itxu şeni dudp’isk’oposi majurani İeronimosis dvaç’irs 3’oxle mokit’xu ek’umenuri P’at’rik’i. P’at’rik’i Bartholomeosik nuk’abulu dudp’isk’oposi majurani İeronimosi p’at’rik’xanaşi t’axturi salonis. P’at’rik’xanaşi avt’orit’epek na meçu çkinapaşi tolite; ok’otkvalobas, İeronimosik Hristodulosişi xe3alas jur ek’lesiaşi şkas skideri gonk’idobaşa arçkva gza var mepçaten-ya tku. Hristodulosik, p’at’rik’xanaşk’elen 1928-s Grek’iaşi ek’lesiaşa emanetot niçineri olande Grek’ia steri namtini t’erit’oriapeşi religiuri oktaloba meçamu ek’uk’tuşi do p’at’rik’xanaşa umeqonute am ek’lesiapeşa reliagiaşk’oçi na mendoçku şeni, jur ek’lesiak ok’ok’idinus kogeoç’k’eret’u. Bartholomeosik mek’vateret’u artikartisoba Grek’iaşi ek’lesia k’ala ar ora şeniti.
Ok’otkvalobas, am ambariti kogoşinu do, “Ocerapu minon, ma do çkini ek’lesiaşi met’rop’olit’epe, xvala oktalurot jur çkvaneri na ren ek’lesiape çkinişi şurieri uğarot artoba do artikartisobas k’arta k’eleşen mxuci meçamu do omağalu şeni vixandaten” ya tku İeronimosik. P’at’rik’i Bartholomeosik, “Macerepeşi şkas qoropaşi artikartisoba xvalot religiuri ar geçinadva var artneri oras çkini noğirati ren” ya tku. Mok’itxas, jur k’ele şeniti ağani ar p’eriodi na geoç’k’u ignapinu. Fenerişi p’at’rik’xana k’ala xe3aluri ok’ok’idinus na geoç’k’u do Turkiaşa medginerobate na içkinen, Hristodulosişi t’avris çkar k’ai na var o3’k’ert’u İeronimosişi p’at’rik’xana k’ala artikartisoba xvala jur ek’lesia şeni var Turko-Grek’o artikartisobasti p’ozit’iuri mxuci meçasen yado ç’areret’u Grek’iaşi p’resak.
1 pukrik’aş oxvamobapeşi oras iptineri ambari yeçkindu Şişlis, ondğeneri orapes. P’olisi do demonst’rat’orepeşi şkas yeçkinderi k’abğaşi morgvalis, p’olisik ge3’k’aru demonst’rat’orepe. Emuşk’ule demonst’rat’orepek kogeoç’k’es omt’inuşa ç’it’a kuçapes. Edo demonst’rat’ori ar oxorca komelu. Am oxorcak mutu uçkineri svas gelacant’uşi, 3’oxle namtini p’olisepek geçes emus lastik’işi bigate. Ok’uleti k’uçxete geiçini mpuleri p’olisepeşk’elen dudi muşis. Majura ambariti yeçkindu Taksimis. T’urist’i ar k’oçi-oxorcak am ambarepeşi oras, ekol-akole gulut’esşi, ibaxines mask’ete mpuleri p’olisepeşk’elen.
ÇİNİS MEK'ARBERİ NOĞA |
