OKORTURAK OMJORE OSETİAŞA NANK'AP'U

 

Okorturaşi armiak timoşletineroba na ognapu omjore Osetiaşa nank’apu do askeruli op’era3ia geoç’k’apu. Okorturaşi p’arlament’ok “limaşi xali” gamognapu. 3’oxle Amerik’aşi Ok’ont’aleri Oxen3alepek (AOO) do majura dido oxen3alek lima doçodinit yado uç’andes. Rusiaşi p’rezident’i Dimitri Medvedevik, omjore Osetias Rusiaşi dobadonarepeşi oğurinuşen mesuli na renanpes p’at’işi ceza mepçaten-ya tku. Avrop’aşi k’onsei do Avrop’aş artobaşi p’erioduri dudmaxvence Frangiak lima "astaxolo do uşart’oni" doçodinit yado uç’andu do k’rizi oçodinu şeni ok’oğarğalapes movunz’inaten-ya tku. Omjore Osetiaşa Rusiaşi mo3’qvaşi mencelepeş k’umandani Murad Kulahmedovik, nananoğa 3xinvali kodolipaşu-ya tku. Okorturaşi p’rezident’i Mixeil Saak’aşvilik, Okorturaşi 3aşa na amaputxu Rusiaşi jur oputxale mevon3’amit-ya do omjore Osetiaşa Rusiaşi 150 tank’i amaxtu-ya tku. Rusiaşi nodgitaşi nazirobak, omjore Osetias dobargeri Rusiaşi mo3’qvaşi mencelepeşa mevuşvelit-ya tku. Rusiaşi oputxalepek, Tbilisişa 20 k’ilomet’re mendranobas na gedgin Vazianişi usi do 30 k’ilomet’re mendranobas na gedgin Marneulişi havaşmeidani dobombes. Okorturaşi p’rezident’i Saak’aşvilik, "Rusia, let’ape çkinis memank’apernan"-ya tku. Okorturaşen na ok’oi3’k’u Abxaziak, Okorturak na ok’ont’rolapt’u jileni K’odoris op’era3ia p’it-yado gamognapu.

Omjore Osetiaşen limas oşdooşi k’oçi ğuru yado ambarepe moxtu do ok’oxtimeri milletepeşi emniet’işi k’onseik, omjore Osetiaşi xali oğarğalu şeni astaxolo ok’optaten-ya tku. AOO-şi p’rezident’i George Bushik, Rusiaşi p’rezident’i Medvedevis do Okorturaşi p’rezident’i Saak’aşvilis t’ilifoni geuçu. AOO-s demok’rat’iuri p’artiaşi namzet’i dudmaxvence do senat’ori Barack Obamakti Rusiaşa, Okorturaşi let’apeşi omtelobaş oşinu şeni nuç’andu. Germaniaşi dudnaziri Angela Merkelik, K’avk’asias limaşi astaxolo oçodinu ak’vandu. Rusiaşi oputxalepek, omjore Osetias Okorturaşi mevzepe dobombines do hududis na gedgin Goristi bomba ot’k’oçes. Rusiaşi galendulyapeşi naziri Lavrovik, Okorturaşi armiaş omjore Osetiaşa nank’apinuş oras 1500 k’oçi doğuru-ya do Rusiaşi armiak omjore Osetiaşi nananoğa 3xinvalişen Okoturaşi askerepe kogamavoçkvit-ya tku. Edo xolo Okorturaşi armiaş obombinuşi oras omjore Osetias jur oputxale memiles do ok’abğinus a3’işakis 12 askeri domiğures-yati dotku.

ANK'ARA MAK'VANDEPEŞİ CENNETİ RENİ?

 

Noğaşi mpuleri p’roblemapeşen mak’vandoba eşo-aşo mç’ipeşa goşigorinu. Ank’aras nak’onoba mutepeşi rek’orot na manz’inu mak’vandepeşi p’rofili dido onç’eloni ren. Didinoğaşi belediyeşi zabitobaşi k’ortaşi dudmaxvence Mehmet Ercanik, noğas na ixandeps mak’vandepe k’ala ok’vak’idinus voret-ya. Mara çodina 3’anapeşi doloxe nananoğas na ik’vandeps mak’vandepeşi nak’onobas rek’ori monz’inu iz’iren-ya. Ercanik 3’anaşi iptineri anşi tutas nak’o mak’vande na eiç’opu, namu noğapeşen ok’vandu şeni na mulunan, mak’vandobaşi dubarocobapeşen mak’vandoba şeni na mulun mitxanepeşi nak’onoba na manz’inu remezanişi tutas belediyek muç’o ixandeps steri k’arta xalişen çkina meçu p’resaşa. “Noğas, çodina 3’anapes mak’vandoba na ikips mitxanepeşi nak’onoba oşkurinoni ar xalis manz’inen. Golovilit 3’anaşi iptineri anşi tutas vitoş 409 mak’vande mep’ç’opit do k’anonuri dulya dop’it entepe şeni. Am k’oro3xa arteneri p’eriodis yextu 3 vitoş 82-s am 3’anas. Entepeşen ebzdit 7 vitoş 426 Turkuli lira cezaşi pasot. 117 Turkuli lira cezaşi pasepete mak’buzepe mevuk’vatupt. 117 Turkuli liraşi farate, mak’vandepes na uğunan geç’areli mak’buzi p’ç’arupt do ebzdipt. Çkin mak’vandepeşen na ebzdipt geç’areli ren vitoşişen arti, namupek xalk’işen na ezdipan. 3’oxleni 3’anapes mak’vandepes na bz’irit mtel geç’arelepe ebzdipt’it do na dvaç’irt’u k’anonuri formalit’epe vikipt’it. Namtini orapes maz’iret’es bilezuğepe, okrope, xark’uri geç’arelepe. Mara çodina 3’anapes erk’et’epe 3’opxinerenan do ar saat’oni, gverdi saat’oni p’eriodepete mulunan do mak’vandes na uğun geç’areli ezdipan do ulunan.

3’ori ptkvat, çare ren dobadonarepes. Entepes mxuci var meçasunonan. Oçkinoni renan, ar svas doxederi geç’areli ak’vans mitxaniti mak’vande ren, k’avşakepes epi Çinuri mali na gamaçaps mitxaniti, cami na pağups do geç’areli ak’vans mitxaniti mak’vande ren. Xalk’i çkinişi gagnapa k’aixeşa na uçkin am mak’vandepe renan ust’at’i masağalepeşen ekole masağale. Dobadonarepe va renan oceroni, xanç’ali, t’rik’is didi yara na uğun mitxanepes. Entepek xura mutepeşi k’vatupan do mekk’vateri svalepes nuxut’i, k’arbonat’i, leri geidumernan p’at’i iz’iras yado. Ndura, uneneli steri na ikips mak’vandepeşen çkar miti va ren ndura do uneneli. Losemi varna ep’ilep’sişi zabunepesti oceroni va renan dobadonarepe çkini. Entepe renan dubaracepe.

QOROPELİ MUŞİŞİ Tİ MEK'VATU

 

Qoropeli muşişi ti meç’k’vidu do kuçapes goilu. P’olisepe k’ala ok’obu do nuyaralu jur hekimi. Grek’ias, 31 3’aneri ar maaşek meç’k’vidu qoropeli muşişi ti. Oğodak yeçkindu t’urist’epek dido na qorops Ant’orinişi k’un3’ulas. Psikologiuri p’roblemape uğut’u ya na itkven At’anassios Arvanit’isi coxoni zanonik p’olisişi gontxozobate iç’opinu. Mamgurapaloba na ikipt’u 25 3’aneri k’ulani manebre Adamant’ia K’ark’alişi tite k’un3’ulaşi kuçapes goilu. Na gaak’viru oput’arepes mo domodginapt yati na tku Arvanit’isik ti muşis xe gedvuşi gzalepe na gorupt’u p’olisepeşen arteri xamite doyaralu. Ok’uleti p’olisuri ar mangana oxirute imt’u. Notxozobaşi oras, ar mot’osik’let’is kok’ot’k’va3u do doyaralu jur oxorca hekimi. Zanonik oxorca hekimepek na ixmart’es mot’osik’let’is ok’ot’k’va3uşen 3’oxle p’olisik xuti fara k’urşumi ostolu yado gamitkvinu. Arvanit’isik k’ulani manebre muşi oqviluşen 3’oxle, coğori muşişi ti k’asap’işi xamite noç’k’iru, tkves muşi manz’agerepek. Sant’orinişi k’un3’ulas ar lok’ant’as maaşe Arvanit’isis op’era3ia na aqu, ignapinu.

Tİ NA K'VATUPS YAMYAMİ

 

Avt’obusis na eluxert’u k’oçişi ti na nok’vatu maqvilacek tisya muşişi xor3iti koç’k’omeren p’olisişi tolepeşi 3’oxle. K’anadas, golaxtimeri dolonis, avt’obusis na eluxert’u k’oçis xami geçuşk’uşle ti muşi xamite noç’k’ireret’u do magzalepes o3’ireret’u. K’anadaş p’olisişi radioşen xalk’is na ignapu çkinapeşi xete, maqvilace Vince Weiguang Lik noç’k’iru na eluxert’u k’oçişi ti xamite. Ok’uleti oç’k’omus kogeoç’k’u tisya muşişi ti p’olisişi tolepeş 3’oxle. K’anadaşi p’olisik var gem3udu gazetapes gamaçkvineri am ambari. P’olisişi radioşen em nenape ignapinu: “Maqvilacek avt’obusişi k’ap’uleni k’ortas do tisya muşişi t’anişen xor3epe noç’k’iru do koç’k’omu.”

P'OLİSEPEK DOBADONAREPE K'ALA NİZA QVES

 

K’ayseris cumhuriyetişi meydanis ar mot’osik’let’oni k’ala t’rafik’işi p’olisepek niza qves. T’rafik’işi p’olisepek dodginu Cemal A., namuk na ulurt’u ist’asyonişi caddeşen cumhuriyetişi meydanişa 38 SC 119 p’lak’oni mot’osik’let’ite. P’olisepek goşines A.-s k’ask’i getveri na var uğut’u do xmaraşi dok’ument’i oz’iru unt’es. Şigneri idiaşi tolite, ek’ibişen ar t’rafik’işi p’olisis p’at’i nena tkveren do korba muşisti mcixi geçerenşi, emus xe gedvu unt’eren. Em oras p’olisepek ti muşis mcixi geçu ya na tku Cemal A.k kogeoç’k’u obecğus. Amuşk’uleti jur t’rafik’işi p’olisi k’ala mot’osik’let’onişi şkas niza ipaluru. Nizaşi oras na moxtu zirmiç’i mencelişi p’olisepeşi vavate, t’rafik’işi p’olisepek gondves Cemal A. do geçes k’elepçe k’lavepe muşis. P’olisepek iqves madavale mot’osik’let’oni Cemal A.şen “geçamu do p’at’i nena otku, memurişa oğobu”şi idiate. Cemal A.kti tku mati madavale viqvare t’rafik’işi p’olisepeşen-ya, na gemik’itxes do mcixi na gemçes şeni-ya. Murenki var iqu madavale p’olisepeşen, eya na mendiqones Reşat Vural polisişi şkaguris. Goşogora naqonops.

 

K'ORTA YULVAS MEMXVACU

İndust’ria do k’omer3iaşi naziri Zafer Çağlayanik ognapu, yulvas şok’iuri memxvacuşi sist’ema o3’opxinu şeni na ixandepan. K’arsişen dixaşgzate Art’aanişa na idu naziri Çağlayanik mamgurapalepeşoxoris 3’opxineri Art’aanişi opasinu do ok’oğarğalaşi ok’oxtalas na qu ğarğala muşis çodina p’eriodis xveneri dulyapete Turkiaş ek’onomiaşi ç’ara iktiru yado gamognapu. Am dulyapeşk’ule Turkias kianaşi 17. ek’onomia iqu ya na tku naziri Çağlayanik eşo ğarğalu: “Andğanerdğas Turkias uğun 659 miliari Amerik’uri dolaroni na3ionaluri xasila. Xut 3’ana ekole, ar mitxanik “galengamaçama 36 miliari Amerik’uri dolarişen 127 miliari Amerik’uri dolarişa vomağalaten” yado domi3’vat’ukon na, var vicert’i. Xali aşo rentina, k’arta onditi giuli do giulistani ren yadoti var matkven. Golaxtoras xvaneri namtini p’op’ulist’uri p’olit’ik’apeşen na yeçkindu do andğanerdğasti k’ronik’uri oğadape miğunan. Entepe gevo3’k’apt. Kianaşi 17. siras oqopimu var domibağunan. Noğira çkini ren iptineri 10 ek’onomiaşi doloxe oqopimu.”

 

Na nok’itxu noğapeşi ek’onomiuri meç’ireloba nupases do am p’roblemapeşa ge3’k’uşi çarepe gorupan ya na tku naziri Çağlayanik eşo naqonu ğarğala muşis: “Ek’onomia ok’ap’et’inu şeni Ank’aras var bdgirt mara t’erit’oriaşa mevulurt. Emuşeniti Art’aanis voret. T’erit’orialuri şok’uri memxvacuşi sist’ema on3’uranu şeni gza bgorupt. Aşo gi3’vat, var ok’ovodginate Art’aani çkva noğa k’ala. 3’oxleni memxvacupes Art’aanik k’lasis doskidu. T’erit’orias, mepçaten mtel memxvacu maskinkinobas, namuk na ren Ğormotişi dido k’ainoba çkinda. Turkiaşi mtel noğapeşi ”emar”işi yevoşiğapt mtel mç’ipe cerğvepeşakis. Ront’genişi p’eriodi diçodu. Var vo3’k’ert omjore do yulvas p’ozit’iuri gamak’atobate. Aya ren t’erit’oriape çkinişi k’ap’inerot 3’oxlextimu şeni”. Art’aanişi indust’ria do k’omer3iaşi odaşi dudmaxvence Latif Tosonoğlikti, Art’aanişi 3’oxlextimu şeni minimumi eçi 3’anaş morgvalis akolen xarcişen moşletineri oqopimoni ren-ya, aşo mepşvent-ya tku.

K'LİMAT'İŞİ BAKT'ERİAS NUQUCİT!

 

Gon3’k’imeri speropeşi t’u3anoba, t’enişi mağaloba do tapaloba na igoren k’onari na ik’ips k’limapeşi ap’aret’epek unç’un hava şuri na movişvanupt do oşvanuşi organepe namupete şuri na movişvanupt. K’limaşi ap’arat’i oxvenu k’ala 3’k’arişi 3’ap’apek havas na nont’alups do oğurus na nusebeps “Legioneruli zabunoba”şa medginerot otxo tedbiri ezdimu dvaç’irs. Acibademiş Bursaşi ozabunaleşi ubaluri zabunobapeşi eksp’ert’i p’rof. dr. Mehmet Karadağik tku, am seriozuli do ğuraloni zabunobas go3’adginu şeni, bakt’eriapes na askedinen svalepe oz’iru do moxva ar xaliteti dezenfek’t’a3ia oxvenu, dido beciti ren-ya. Karadağik na eizdinasen tedbirepe eşo eyosvarups:

a) K’limaşi ap’arat’epe, ohavalinapuşi sist’emapeşi, 3’k’arişi dep’ope, genk’ileri speropes na geladgin havuzepe, duşepeşi xit’epe k’ala meyak’lima medi3inaluri aletepe k’aixeşa ok’ont’roloni renan. b) İnfeksia3iaşi meşit’iluk yeçkindaşi, opağu do dezenfek’t’a3ia oxvenu şeni, çkar uoçvu, 3’k’ari ogiboni ren 70 dereceşi jile. c) K’urnape, duşepeşi xit’epe obononi renan gebz’oni t’u3a 3’k’arite 30 deik’eş morgvalis. d) Met’aliuri iyoniza3iaşi metoditeti dezenfek’t’a3ia ixvenen. Am metodite, muşeuri elekt’rot’epeşk’elen t’angi, varçxili do çink’oşi ionepe 3’k’aris itiren. Na iz’iren k’onari iqvaşi, am ionepek ikipan dezenfek’t’a3ia. Am metodi, k’lorite na ixvenen dezenfek’t’a3iaşen umosi onç’uloni iqven.

“Legioneruli zabunobas” na nusebebups “legionella pneumophila” coxoni bakt’eriak imralen misa 3’k’arepes. 3’k’arik havas goşabğuşi oras, şuri oşvanuşi gzate purpupeşa amaxtute nusebebupan purpuşi infek3iaşa. K’limaş ap’arat’işi doloxe na yeçkindas t’eneri gomorgvala ren moxva legionella pneumophila steri zabunobaşi fakt’orepeşi oskidu do omralus. Am fakt’orepek 3’k’ariş 3’ap’apete havas ak’aten do k’oçepes nak’nen. Ot’eli, dulyaşkagurepe, dido mağala binapeşi ohavalinuşi sist’emapeşi 3’k’arişi burmepe, havuzepe, 3’k’arişi dep’ope steri gomorgvalapes na irden bakt’erepes gza naçenan dido k’oçepeşi ozabunus. Murenki k’arta k’limaşi ap’arat’i na uğun gomorgvas am bakt’erepe var iz’iren do bakt’erepe na iz’iren gomorgvas na skidun do am hava na şvanups k’artayikti var izabunen.

SUMİ BEREK NANA DO BABA MUTEPEŞİ K'ALA SKİDASEN

 

Furnişi madulye 41 3’aneri Muzaffer Gunduzi k’ala 27 3’aneri çili muşi Şengul Gunduzik k’ulani mutepeşis ar cuma oxvenu unt’esşi, sum çkva k’ulani aqvesşi, xvala var gaak’vires, ek’onomik’uri xalepeşi sebebite var askedines. K’ulanape berepe oçvaluşi k’idalaşa (ÇEG) meçamu unt’es. Am berepes o3’k’edu eşo perpu va rt’u. Berepeşi ar tutaşi mesirafi 2 vitoş 500 Turkuli lira mek’iluşi, berepe oçvaluşi k’idalaşa meçamu gonk’vates. Mtel imendepe na nuskiru nanaşi şvelas nunç’uşu int’ernet’işi p’ort’ali “El Bebek Gul Bebek”işi k’erk’elak. Sum bereşi mtel mama, pedi do dolokunepe na meçu k’erk’elaşi dudmaxvence Canan Goztepek xut tuteri ar k’erk’ela rentina, andğanerdğas 85 ocaği 147 berepeşi dvaç’arobape mxuci na meçapanşi ambari ognapu. “El Bebek Gul Bebekişi k’erk’elaşi mak’ide oktalobaşi k’omisiaşi mak’ature İlknur Okayik mxuci ak’vandu xalk’işen “gurişari nana”şi p’roekt’is.

FİLMİ: BOMBAPEŞİ TUDE

 

Zeinak skidun Dubais. Kimoci muşi k’ala ok’oi3’k’asuntesşi, biç’i muşi oxorişi st’resi do ok’vak’iduşen mendralas okaçu şeni mendoçkves eya omjore Lubnanis na geladgin ç’it’a ar oput’e Xerbet Selemişa, so na skidun da muşik. Ar-jur dğaşk’uleti lima kogeoç’k’u Lubnanis. Dido gemzuleri Zeinak embargoşi sebebite Beyrutişi limanişa na var nanç’uşu şeni Turkiaşi jilen k’elen mek’ulun Lubnanişa. Em oras, dobadona naşku na isimadeps ar Xrist’iani do Zeina omjoreşa mendiqonu na k’abulups taksişi şofori Tony k’ala ok’oiçinops. Na zdipan derdepe dido rentina, Tony do Zeinak artikartis aqoropenan. Gomorgva mutepeşis na golulun ğuraşa ar coğabi steri ren entepeşi qoropa.

Maktale: Philippe Aractingi; Maxvene: François Cohen-seat, Paul Raphael, Herve Chabalier, Philippe Aractingi; Senario: Michel Leviant, Philippe Aractingi; Musik’a: Lazare Boghossian, Rene Aubry; Oz’iramuşi maktale: Nidal Abdel Khalek; Masağalepe: Bşara Atallah, Rawia Elçab, Nada Abou Farhat, Georges Xabbaz; Xvena: 2007, Fransia, Lubnani, Belçik’a, İngiltere; Sort’i: Drama; Ginz’enoba: 98 deik’e; Firma: Bir Film; Oz’iramuşi tariği: 1 mariaşina 2008.

Tİ MUŞİ ELEKT'RİK'ONİ XERXİTE NİXERXU

 

İngilteres ar firmas oktaloba na ikipt’u Roger Kirmanik ti muşi xerxite nixerxu. Gecgineri ar k’arieri na uğut’u Kirmanik ixandept’u ar firmaşi gamaçobaşi speros. Sp’ort’isti dido meraği uğut’u. K’arta 3’anas, namuk na ixandept’u k’amp’aniaşk’elen 3’opxineri triat’lonepes na ak’atet’u 45 3’aneri maktale ideret’u İngiltereşi olandes na geladgin çiftluğişi oxorişa ocaği muşi k’ala, p’ask’aliaşi moşvacinoni şeni. Akonaşis ocaği muşişen na nuxarsuvups ar not’i naşkvu do ti muşi tuvalet’işa na geink’ilu k’oçik ok’ule elekt’rik’oni ar xerxite qali muşi nixerxu. Adliuri medi3inaşi rap’orite, Kirmanişi ğura tiqviloba na rt’u do di3xirişi gondinuteti na ğuru, oxoi3’onu. Ocağişi mak’aturepes Kirmanişi tiqvilobas xoloti na var aceres do ti muşi oqviluşi sebebiti na var oxo3’ones, tkumernan. Çili muşis var unon oğarğalu p’resa k’ala. Kirmanik na ixandept’u firmaşi hekimikti tku, ğura muşişk’ule 3’opxineri ar goşogoras, Kirmanis çodina dğalepes udodginu ocaği muşişi zabunobape k’ala na ibodert’u do em sebebite emus ar nciraşi xap’iş coxo na meçeret’u. Gecgineri k’oçişi tiqvilobas, am zabunobapeşen yeçkinderi ar st’resi beciti fakt’ori na rt’u mo3’irapan.

OXEN3ALURİ TEAT'Rİ: BİLETİŞİ PASİ VAR MOİNZ'İNASEN!

 

Qinoraşi tutapes 1 milion 300 vitoş maseyre do gecgineri ar sezoni na aqu (DT) oxen3aluri teat’repek sezonişk’ule “K’arta svas teat’ri” yado sloganite na geoç’k’u monç’inoraluri t’urnepeteti 100 vitoşişen ekole maseyre k’ala kok’oik’atu. Oxen3aluri teat’repek noğiraps ok’ok’atu dido maseyre k’ala ağani sezonisti. Emuşeniti var monz’inasen biletepeşi pasi. “K’arta svas teat’ri” sloganite monç’inoraşi t’urnepeşi çerçeves 12 t’erit’oriaşen 29 çkvadoçkva p’iesate 81 noğa, ç’it’anoğa do oput’es, ok’ot’alerot 293 obargales meçu temsilepe oxen3aluri teat’repek. 26 mbuloras na geoç’k’u do ağan na içodu monç’inoraşi t’urnepes 100 vitoşişen ekole maseyre aqu oxen3aluri teat’repes.

Oxen3aluri teat’repek 1 gimuas na geiç’k’asen 2008-2009 xeşnoxvenuri sezonisti beciti ar nak’onobate maseyrepe k’ala ok’ok’atu noğiraps. Emuşeniti biletepeşi pasi var moinz’inasen. Mcveşi t’arifete, “xelak’aoba” na tkvasen oxen3aluri teat’repek Ank’ara, İzmiri, Mp’oli, Bursa, Adana, Ant’alyaşi oxen3aluri teat’repe do gomorgvaş teat’repeşi biletepeşi t’arife mordalepes 6, tenzilatoniti 4 Turkuli lira iqvasen. T’amt’ra, Diyarbekiri, Vani, Erzurumi, Sivasi, K’onyaşi oxen3aluri teat’repe do gomorgvaşi mordalepes 3, tenzilatoniti 2 Turkuli lira iqvasen. Musik’alepesti am pasi iqvasen xolo golaxtimeri sezonis na rt’u steri. Ank’ara, İzmiri, Mp’oli, Bursa, Adana, Ant’alyaşi oxen3aluri teat’repe do gomorgvas, biletepeşi pasepe mordalepes 7,5 Turkuli liraşen, tenzilatoni biletepeti 5 Turkuli liraşen gamiçinasen. T’amt’ra, Diyarbekiri, Vani, Erzurumi, Sivasi, K’onyaşi oxen3aluri teat’repe do gomorgvas am pasi iqvasen 4 Turkuli lira mordalepes do 2,5 Turkuli lira iqvasen tenzilatoni.

Berepekti teat’ris geagan yado tapala pasoni bereluri p’iesapeşi biletepe xolo gamaçasen oxen3aluri teat’repek Ank’ara, İzmiri, Mp’oli, Bursa, Adana, Ant’alyaşi oxen3aluri teat’repe do entepeşi gomorgvas isağasen bereluri p’iesepe 2 Turkuli liraşen, T’amt’ra, Diyarbekiri, Vani, Erzurumi, Sivasi, K’onyaşi oxen3aluri teat’repe do entepeşi gomorgvas biletepe 1 Turkuli liraşen gamiçinasen. Gazepe, şehidepe do entepeşi şira, ubabelepe, sak’atepe, 65 3’anaşen ekole muxtaci, umenceloni do umitelepekti, k’arta 3’anas na rt’u steri upasonot no3’k’edasunon oxen3aluri teat’repeşi p’iesapes.

SHAKESPEAREŞİ İPTİNERİ TEAT'Rİ

 

Londonişi muzeumişi arkeologepek koz’ires çinoberi İngilisuri maç’are William Shakespeareşi teat’rişi genomskidepe, emuk na nosahninu muşi p’iesape iptinerot. Emus sadaot “teat’ri” na geodumernan arkeologepek tkves, am gon3’k’imeri t’aroni steraşi spero, teat’ri na rt’u, namus Shakespearek iptinerot na nosağu do ok’uleti muşi noxvenepe na nosahninu. Londonişi iptineri teat’repeşen rt’u ya na tkveri sva, 1576-s guin3’k’u, mara kiraşi p’roblemaşen var ixandu do 1599-s ğali Thamesişi omjores “The Globe” coxote ağneşen ik’idinu yado ignapinu.

TERSANES AĞANİ ĞURA

 

Var içoden dulyaşi ğurape tersanepes. K’ocaelis, ar madulyek na ixandept’u tersanes, k’aravişen melu do meçu şuri Ğormotis. K’ocaelişi ç’it’anoğa Korfezis k’ideri ar tersaneşi madulyepeşen 49 3’aneri İsmail Kirlangiçik k’aravişi guvertes ixandept’uşi, gondunu n3o do melu-yado ambari niçinu. Monk’a iyaralineri İsmail Kirlangiçi mendiqones muşiuri Korfezi Marmaraşi ozabunaleşa. Mtel medi3inaluri şvelape ixvenutina, madulye doğuru. Oğoda şeni masavobak goşogora geoç’k’apu yado ambari niçinu.

TEAT'Rİ: "ÇKİM OXORİ REN GERMAPE"

 

Andğanerdğaşi Turkias jur st’ajieri jurnalist’ik gza gorups Sabahattin Alişi ğura otanu şeni. Maç’are Ali Berktayik ixmareren Sabahattin Alişi romanepes guramepe gecginobate. Rutkay Azizişi maktalobas Ank’araşi xeşnoxvenuri teat’rişi masağalepeşi xete, svarapeşi k’ap’epeşen isağen do ixonaren sahnes am oğodak. “Am dobadonas namusoni oqopimu muk’oti meç’ireli t’eren megere… “Ar dğas, pasi çkimi içkinen na, coxo çkimi icoxinen na, sva çkimi moik’itxen na, çkimi oxori ren germape.”

Maktale: Rutkay Aziz; Dek’ori do mask’i: Şeyda Demirşinik; Musik’a: Cahit Berkay; Te: Murat Atmiş; Masağalepe: Rutkay Aziz, Erol Demiroz, Cengiz Sezgin, Hakan Salinmiş, Aylin Saraç, Ebru Saraç, Nesim Kaygusuz, Hasan Baliktaş, H. Tarhan Karagoz, Eray Cezayilioğlu, Ayşegul Unlu.

 

1 Mariaşina 1571: Lala Mustafa Paşak xe gedvu Venedik’işi Resp’ublik’aşi k’un3’ula K’ip’risis.
2 Mariaşina 1865: Levis Carrollik na ç’aru “Alice harik’apeşi dobadonas” gamiçkvinu iptinerot.
3 Mariaşina 1960: Generaluri st’abişi dudmaxvence Ragip Gumuşpalati doloxe muşi rt’u 235 generali do admirali ixvenu tek’audi.
4 Mariaşina 1988: Samsoni do Sinop’işi zoğap’icepes ğurz’uloni varilepe iz’irinu.
5 Mariaşina 1912: Padişaxi Sultan Reşadik genk’ilu meclisi mebusani do 14 mbulora 1914-şakis var ok’vak’atu Osmanuri meclisi.
6 Mariaşina 1975: Sungurlarişi fabrik’as na ixandept’u madulyepek edgitus kogeoç’k’es.
7 Mariaşina 1871: P’arisişi k’omunaşk’ule k’omunarepe na imaxkeminu iptineri dava kogeoç’k’u. Na imaxkeminasen 36 vitoşi p’olit’ik’uri xe gedvineri kort’u.
8 Mariaşina 1928: Mp’olis, Taksimişi resp’ublik’uri monument’i guin3’k’u. Gon3’k’obaşi 3eremonias ak’atu nanç’inerot 30 vitoş k’oçi.
9 Mariaşina 1975: 9.000 Turkik kogeoç’k’u olande K’ip’risişa mek’axtimus.
10 Mariaşina 1914: İnglisuri zoğaşi mencelepeşen na imt’u “Goeben” do “Breslau” coxoni jur germanuri zirxoni Osmanuri dobadonaşi zoğapeşa kamaxtu. Ok’ule jur zirxonis coxo geidvinu “Yavuz” do “Midilli”.
11 Mariaşina 1480: Gedik Ahmet Paşak na oktalapt’u Osmanuri armiak xe gedvu İt’aliaşi Otranto limanis.
12 Mariaşina 1930: Resp’ublik’aşi Timoşletineri P’art’ia ik’idinu. Fethi Okyar i3xunu dudmaxvence.
13 Mariaşina 1951: Çankirişi dixaşk’ank’alas 56 k’oçi doğuru.
14 Mariaşina 1962: Çxoro Amerik’uri kogeoç’k’u ogorus Nuxişi k’aravi germa Ağris.
15 Mariaşina 1461: Fatih Sultan Mehmetik xe gedvu T’amt’ras. Aşopete T’amt’raşi imp’eria kodilixvu.
16 Mariaşina 1908: Ank’ara- Bağdatişi erk’inagzaşi madulyepek grevis kogeoç’k’es.
17 Mariaşina 1999: Dixaşk’ank’ala Marmaraşi t’erit’orias: Richterişi zomate 7,4 şiddet’is rt’u. Dixaşk’ank’ala naqonu 45 saniyeşi morgvalis. Ofi3ialuri k’oro3xapete 18 vitoş 373 k’oçi doğuru. 48 vitoş 901 k’oçi iyaralinu. Oşvitoşepete k’oçi doskidu uoxoreli.
18 Mariaşina 1938: Ahmet Emin Yalmanişi st’at’ia gamiçkvinu Gazeta Tanis, namuk na meçapt’u çkinapa Ataturkişi cansağobaşen. Am st’at’iaşi sebebite gazeta geink’ilinu xe3alaşk’elen sumi tutaş morgvalis.
19 Mariaşina 1927: Ortodoksuli ek’lesisias niçinu Sovyeturi oktaloba.
20 Mariaşina 1940: Sovyeturi gektalaşi go3’oncğonerepeşen Leon Troçki iqvilinu uçvobas na skidurt’u Meksik’as.
21 Mariaşina 1944: T’u3anoba iqu 40,6 derece vavas, Mp’olis.
22 Mariaşina 1642: Doloxeni ok’vak’idu kogeoç’k’u İngilteres.
23 Mariaşina 1305: “K’ap’et’i guri” coxoni filmişa tema na iqu Şot’landuri dobadonamaqorope Sir Villiam Vallace iqvilinu şk’encete Londonis.
24 Mariaşina 1964: Turkias na skidut’u 12 vitoş Grek’uri dobadonarişen 6 vitoşik Turkiaşen idu yado oxoi3’onapinu.
25 Mariaşina 1970: 21 vitoş madulyek grevis kogeoç’k’u 18 şekerişi fabrik’as.
26 Mariaşina 1071: Sultan Alparslanik na oktalapt’u Selçukuri armiapek ocgines Bizant’iuri armiape Malazgirtis. Malazgirtişi gecginobak gun3’k’u Anatoliaşi nek’nape Turkepes.
27 Mariaşina 1859: Kianaşi iptineri p’et’roluri orme guin3’k’u Amerik’aşi Ok’ont’aleri Oxen3alepeşi eyaleti P’ennsylvanias.
28 Mariaşina 1934: Uskudari-Kadikoyişi t’ramvayiş ğaraşi iptineri 3adala ixvenu.
29 Mariaşina 1842: “Op’iumişi ok’vak’idu” na oçodinu Nankingişi ak’tis coxoşç’ara geidvinu İngiltere do Çinişi şkas.
30 Mariaşina 1971: Mp’olişi t’eleviziak kogeoç’k’u 3adaluri ç’andinas.
31 Mariaşina 1997: P’rensesi Diana k’ala manebre muşi Dodi Al Fayedi doğures t’rafik’iş k’ezas P’arisis.

OSMAN YAĞMURDERELİ DOĞURU

Mp’olişi mebusi Osman Yağmurdereli doğuru. Ar oraşen doni k’anserişi ok’aoba na aqu Osman Yağmurderelik meçu şuri Ğormotis Acibademişi ozabunales K’adikoyis. Yağmurdereli rt’u k’ap’et’i ok’aobaşi k’ortas. Ok’aobas na rt’u Acibademişi ozabunales, na aqu infek3iak manz’inu do şuri oşvanuşi meç’irelobati uğut’u şeni p’eci ok’aobaşi k’ortaşa na mendiqones Yağmurdereli rt’u skidalaş omxvacobaşi k’ortas. Xali muşi seriozuli na iqu şeni, kodoinciru yado na ignu Yağmurderelik meçu şuri Ğormotis nanç’inerot saat’i 02.25-s. Yağmurderelişi cenaze let’as niçinu Aşiyanişi oğurunales Fatihişi meçetis ikindişi nemazişk’ule xveneri cenazeşi nemazişk’ule.

 

6 k’undura 1953-s T’amt’ras na dibadu Osman Yağmurderelik ik’itxu Gazişi universit’eşi gamantanaşi fak’ult’eşi musik’aşi k’ortas. Ar oras mamgurapalot ixanduşk’ule, mabirulot xeşnoxvenuri dulyape qu. 1988-s “Ajans yağmur” ok’idute filmi oxvenus kogeoç’k’u. Ar p’eriodis Trabzonsporişi mediaşi sp’ik’erobati na qu Osman Yağmurdereli i3xunu mebusi Mp’olişi majurani k’ortaşen 22 x3ala 2007 tariğişi 3xunas.

CHP-Şİ MUZEUMİ GUİN3'K'ASEN

 

Xalk’uri Resp’ublik’uri P’art’iak (CHP) geoç’k’apu muzeumi gon3’k’uşi dulya p’art’iaşi 85. 3’anoba şeni. 9 st’aroşinas, muşi 3’anoba na nuxvamasen CHP-k gon3’k’asen p’art’iaşi muzeumi, namuk na geladgitasen p’art’iaşi generaluri şkaguri binas. Muzeumis iz’irasen 1923-1981 k’ala 1992-şen andğanerdğaşakis CHP-s xmareli do ist’oriuli pasi na uğun k’arta mutxani. CHP-şi dudmaxvencepe na rt’u Mustafa Kemal Ataturk, İsmet İnonu, Bulent Ecevit, Deniz Baykal, Hikmet Çetin do Altan Oymenişi suretepe k’ala namtini biografiapeti iz’irasen. Amuşen met’a 85 3’anaş morgvalis, CHP-s misia na aqveren 22 generaluri mdivanepeşi suretepe do biografiapeti iqvasunon.

MİGROSİK EÇ'OPU MAKSİ

 

Migros Turkişi generaluri direkt’ori Ozgur Tortik Migrosi k’ap’ineri irden-ya. Maksişi mark’et’epe doloxe çkinişa ok’atu şeni coxoşç’ara gebdvit p’rot’ok’olis-ya. Rek’abetişi k’idalak gza momçanşi, Silivri, Tekirdaği do Çengelkoyis geladgeri Maksişi mark’et’epeti niktasen Migros Turkişi format’is-ya. Nanç’inerot 13 vitoş met’rek’vadrat’i gamaçamuşi spero na uğun sumi Maksi mark’et’işi mağaziapes na uğun kiralobaşi k’ont’rakt’i Migrosişi coxote o3’opxinuşa k’arari niçinu. Mk’ule oraşk’ule doloxe muşis ak’atasen yado na isimaden Maksişi mark’et’epeş gale, Migrosis uğun Turkias 1064 do menyaş galeti 16 mağazia. Turkias na geladgin am mağaziapeşen 230 dane “Migros”, 261 dane “Tansaş”, 3 dane “5M”, 8 dane “Macrocenter” do 562 dane “Şok” format’ite odulyaoba meçaps. Migrosik Turkias çkvadoçkva format’epe muşite 59 çkvaneri noğas ixandeps.

Migros Turkiş tema şeni İMKB-s xveneri ognapas eşo itkvinu: “Hamoğluşi grubis na uğun svalonuri p’erak’ende mosa Maksişi mark’et’epeşi Silivri, Tekirdaği do Çengelkoyis na uğun 13 vitoş met’rek’vadrat’i gamaçamaşi spero na uğun mağazapeşi mtel demirbaşi do tesisati eç’opus do jile tkveri 3 dane mağazaşi kiraşi k’ont’rakt’i k’amp’ania çkinişi coxote o3’opxinute tapuşa oşerxus k’arari niçineren. Jile tkveri meçamu-ezdimuşi dulya ixandasen rek’abet’işi k’idalak gza momçanşi.”

P'ORNOGRAFİURİ CD-K DOŞİŞOLU BODRUMİ

 

Bodrumişi belde Yalişi belediyeşi reisi Anavatan p’art’iuri 41 3’aneri İsmail Altindağis şant’aji oxvenute na ik’abaxat’inu svalonuri jurnalist’i A. Y.-s xes geidvinu. Bodrumik ik’ank’alu Yalişi belediyeşi reisi İsmail Altindağis xveneri şant’ajite. Bodrumişi maxale Kumbahçes na geladgin sum muru3xoni ar ot’elişi masajişi salonis do saunas yeşiğeri yado idia na ixvenen, p’ornografiuri 3’k’omilapek doşişolu xalk’i. Belediye reisi İsmail Altindağik ar 3’anaşen doni çkvadoçkva temapete jurnalist’i A. Y.-şk’elen na itexdidinu do ti muşis şant’aji na ixvenet’uşi idiate masavcoba do jandarmaşa idu. Altindağik “E. A.”şi coxo na ixmart’u do am temapeşi lak’lak’oba ignapinuşi, dulyaşen geit’k’oçinu jurnalist’i A. Y.-ya. Çodina ar tutaşen doni, ar ot’elişi masajişi salonis Rusi ve Moldovuri oxorcalepe k’ala seksi ikipt’uşi yeşiğeri suretepe miğun mi3’u-ya. Am suretepeşi pasot 100 vitoş Turkuli lira emus var mepça na, am suretepe mtel xalk’is vo3’iraminon-yado idiate domitexdidu-ya.

Altindağişi ok’ot’alute, jandarmaşi ek’ibepek kogeoç’k’es ar op’era3ia 24 x3alas, A. Y. k’abaxat’işi oras oç’opu şeni, namuk na entepek natxozupt’es. Seriuli nomerape ezdimeri 100 vitoş Turkuli lira, Yalişi ocağuri çaişi bağis, reisişi xeşen na ezdu A Y. iç’opinu jardarmapeşk’elen k’abaxat’iş oras. Xe na geidvinu A. Y.şi cebepes do mangana muşis xveneri goşogoraten var iz’irinu CD-pe jandarmaşk’elen, namus doloxe p’ormografiuri 3’k’omilape uğut’u ya na itkvenet’u . A. Y. mendiçkvinu Muğlaşi genk’ileri molaxunaleşa.

NA İNCİRT'U OXORCA MUŞİS NUTECAVUZU

 

Amerik’aşi Ok’ont’aleri Oxen3alepes 28 3’aneri do coxo muşi utkvineri sap’ara kimocik nciri muşi dido monk’a na ren çili muşis nutecavuzu 30 fara ar 3’anas do suretepe muşiti yeşiğu. Var unt’utina, kimoci muşişi tecavuzepeşen na var nuşletinu oxorcak k’arak’olişa idu do kok’ot’alu kimoci muşişen. Çili muşişi ok’ot’alute, xe geidvinu k’oçik na qu mtel ondepe nutirafu do mu p’a eşo mom3’ondun do xazi maqven-ya. Aya ren ixtisari çkimda-ya tku.

AMERİK'AŞİ OK'ONT'ALERİ OXEN3ALEPES GO3'İK'İDİNU

 

Amerik’aşi Ok’ont’aleri Oxen3alepeşi eyaleti Teksasis 15 3’ana 3’oxle ağanmordale jur k’ulanis çeteşi mak’ature manebrepe muşi k’ala seksualurot na nank’ap’u do na qviluşi k’abaxat’ite ğuraşi ceza na niçinu molaxunerişi ceza ğurz’ulişi lemşite infazinu. Meksik’as dobaderi 33 3’aneri Jose Mendellini, akt’epete meçameri hak’i uoçkinute Meksik’aşi k’onsolosobate oğarğalu muşis gza na var niçinu şeni, na qu itirazi muşi Amerik’aşi Ok’ont’aleri Oxen3alepeşi mağala maxkemek na var ik’abuluşk’ule, ceza muşi astaxolo infazinu. Eyaleti Teksasişi avt’orit’epek Mendellinik xe geidvinuşk’ule 4 3’ana mek’iluşakis Meksik’aşi k’onsoloba k’ala oğarğalu na var ak’vandu do ak’vanduşiti maxkemeşk’elen 16 3’aneri Elizabeth Pena k’ala 14 3’aneri Jennifer Ertmanişa nank’ap’ate k’abaxat’oni na iz’irinu şeni, itirazi muşi var ik’abulinu yado gamitkvinu.

P'ORNOGRAFİAŞİ MURU3XİŞİ ONÇ'ELONİ KTİROBA

 

Amerik’aşi Ok’ont’aleri Oxen3alepes, ek’lesiaşi k’oros na ibirt’u, noğa do ocaği muşişi timo3’ondoba na rt’u ağanmordale k’ulani iqu p’ornografiaşi muru3xi. A3’i 22 3’aneri p’ornografiaşi muru3xi Nikki Jaynek 12 3’ana 3’oxle ar ek’lesiaşi k’oros rt’u. Mjoraçxaşi dğalepes, ek’lesiaşa mteloras na ulurt’u Nikkik ek’lesias xvamupt’u, xçini do badepes çai do k’aveşi odulyaoba ikipt’u. Murenki a3’i iqu Amerik’aşi Ok’ont’aleri Oxen3alepeşi p’ornografiaşi indust’riaşi didi ar muru3xi. 3’ori coxo muşi Samant’a rt’u na tkumers seksualuri muru3xik ocaği çkimik domordu dido dindari-ya. Vibirt’i ilahepe ek’lesiaşi k’oros-ya. Mara kimolepe bz’irişi, kodolobli am sekt’oris-ya. P’ornografiaşi muru3xi oqopimute dido xeleberi vore do am sekt’oris dido geç’areli movogi yado oxo3’onapu.