"OKORTURAS, GALİŞİ RAİONİ ABXAZİAŞEN OK'O3'K'U UNON"

Abxaziaşi p’rezident’i Sergey Bagapşik, Okorturas, Galişi raioni Abxaziaşen ok’o3’k’u unon ya tku. Galişi raionis na gedgin Abxaziaşi Resp’ublik’aş p’olisiaşi ok’ont’roluş şkaguris Okorturaşk’elen k’urşumi istolinu do ar p’olisi diyaraluşi, Abxaziaşi p’rezident’i Sergey Bagapşik, Galişi raioniş çodinuri dğalepeşi oğodape oistişaru şeni Abxaziaşi emnietişi k’omisia astaxolo ok’oxtalaşa uç’andu. Ok’oxtalaşk’ule na gamognapu Abxaziaşi p’rezident’i Sergey Bagapşik, emnietişi k’omisiaşi ok’oxtalas Galişi raionişi oğodape bğarğalit ya tku do Okorturak, Galişi raioni Abxaziaşen ok’o3’k’u şeni nuğinz’ibups edo t’erorist’uri dulyape ikips yado idia qu. Bagapşik, çodina dğalepes Galişi raionis Abxaziaşi otxo dobadonari iğurinu, antepeşen arteri Abxaziaşi p’olisi rt’u ya tku. Abxaziaşi emnietişi mencelepes Okorturaşa coğabi meçamu şeni selaieti komepçit do Abxaziaşi emnietişi doloxe am tema şeni ar unit’e dop’3’opxit yado konaqonu. Sergey Bagapşik tkvalape muşi, Okorturak antepe Galişi raioni Abxaziaşen ok’o3’k’u şeni qu mara var geacginu yado doçodinu.

"MALİMANOBAS VİRDATMİNONAN"

TAV holdingişi oktalaşi k’omisiaşi dudmaxvence Hamdi Akinik oxo3’onapu, omuşeurobaşi p’ro3esite, malimanobas beciti 3’oxlextimupek na yeçkindu. Hamdi Akinik entepe tku: “K’ap’it’ali gedvinus monz’ineri mevaqonaten. A3’işakis 100 milyoni Amerik’uri dolaroni k’ap’it’aldodvalupe dop’it. Moxtanoraşi 18 tutaloni p’eriodişk’ule dido beciti dulyape p’aten a3’işakis çkar uşigneri Mersinis. Mersiniş limani iqu Turkiaşi maartani didi limani a3’i. Nanç’inerot jurvitoşi şurik ixandeps akonaşis. Limanis uğun irişen dido p’ecoba andğanerdğas. Oğmalepe momixtepan udodginu. Agent’epeşi k’ont’einerepes gza mepçapt limanişi gale, aşopete ağani k’ont’einerepes sva aqvan yado. A3’işk’uleni p’ro3esis malimanobaşi sekt’oris, Marmara do Rusiaşa oxtimu do ordu minonan.” Hamdi Akinik havaşgzaşi sekt’oristi oxandoba mutepeşi op’ecute na noqonups, Turkiaşen çkva Okortura, Tunusia do Mak’edoniasti 3aşlimanişi oktaloba na uğunan, entepeşi noğira "umosi 3’oxlextimu" na renti ognapu.

FAZİL HUSNU DAĞLARCA DOĞURU

Turkuli leksişi beciti maleksepeşen Fazil Husnu Dağlarcak şuri meçu Ğormotis. K’adikoyis op’era teat’ri Sureyyas i3’opxinu ar 3eremonia. 3eremonias ak’atu k’ult’ura do t’urizmişi naziri Ertuğrul Gunay, Doğan Hizlan, Ozdemir İnce, Yaşar Buyukanit steri beciti k’oçepekti. K’ulelişi malimuri lises na ik’itxu do 1950-s oşişdudi rut’bete armiaşen tek’audi na iqu Fazil Husnu Dağlarcaşi cenaze let’as niçinu Karacahmetişi oğurunales, meçeti Soğutluçeşmes xveneri religiuri 3eremoniaşk’ule.

BEREPE MUŞİ NA GOÇ'K'ONDU NANA!

Berepek amşkironesşi kogeoç’k’es omgarinus. Aya na ognu manz’agerepek ambari meçes p’olisis. P’olisik ezdu sum da-cumalepe oxorişen oç’vamaskirinepeşi şvelate. Nana do baba mutepeşi na var iz’irinu bere niçinu İzmirişi so3ialuri odulyaobaşi direkt’orobas. Manz’agerepes k’eraşcoxo muşi na var uçkinan Gulşah coxoni oxorcak naşku muşi sumi bere oxoris do idu goxtimuşa saat’i 09.00-s. Saat’i 14.00-s oxoris berepek kogeoç’k’es omgarinus do nek’anaşi ok’ank’us. Aşopeteti manz’agerepek ambari meçes p’olisis. Oxorişa na mextu p’olisik nek’naşi k’ap’ulas na geladgit’u berepe k’ala kok’oğarğalu. Diguru dulya. Berepeşen İlaydak entepe tku p’olisis: “Nana çkimişi coxo ren Gulşah do baba çkimişiti Ender. Nanak idu goxtimuşa. Jur da-cuma k’ala oxoris xvala vore.” Oç’vaşi k’vatate maanşani k’atis na geladgin oxorişa na amaxtu p’olisepek muşletines İlayda, Aras do Suzani. Goşogorestina, berepeşi nana do baba var az’ires do p’olisepek meçes berepe emaneti noğaluri so3ialuri odulyaobaşi direkt’orobas masavobaşi direkt’ifite.

P'RİDOGURALES MAXİRELOBA

Zonguldağis ar geç’k’apuroni dogurales iskedinu maxireloba. Xveneri idiate, direkt’oriş manuşvaleşi 3an3aşen nixirinu nanç’inerot 1600 Turkuli lira. K’abaxat’oni varna k’abaxat’onepe oz’iru şeni, doguraleşi oktalak qu ar ognapa k’lasepeşi dudmaxvencepe do manobete mamgurepeşi xete. İgnapinu, mtel mamgureşi nok’itoni na eizdasen. Am ambarite dido na iderdu mamgurepek ambari meçes ocaği mutepeşis. Namtini velepek ognapes ambari noğaşi na3ionaluri gamantanaşi direkt’orobas t’ilifonite. İdiapeşi sebebite, noğaşi na3ionaluri gamantanaşi direkt’orobak mendoçku insp’ekt’ori doguraleşa do geiç’k’inu goşok’itxa. Noğaşi na3ionaluri gamantanaşi direkt’ori Harun Girginik “berepeşi psikologia ok’oxvasen dulyapeşa gza var mepçaten-ya. İdiape mtini varna m3udi reni, insp’ekt’oruli goşogorak gamantanasen-ya” tku.

MAOĞURİNE Ç'AMİ XOLO P'İASAS REN

Magaleneç’opale firma Farmalifek gamaçamu şeni dudişen arzuxali meçu xaçka do oput’eşdulyapeşi nazirobas. Mara nazirobaşen izni uezdimeri kogeoç’k’u gamaçamus “Lida” int’ernet’işen. Lidaşi gamaçamuşi matemsilepek ognapes magalen-eç’opale firma Farmalife şeni na igorinu 880 vitoş Turkuli liraloni ceza Bakirkoyişi 13. monk’acezaşi maxkemeşk’elen moxva na var iz’irinu, firmasti xes uğun bardepe gamaçamu şeni xaçka do oput’eşdulyapeşi nazirobas izni şeni arzuxali na meçu. Andğanerdğas nazirobaşen dudişen gamaçamus na dvaç’irs izni var niçinutina, Lidak kogeoç’k’u gamaçamus int’ernet’işen. Cansağobaşi nazirobakti goişinu, osap’aruşi k’apsulişi doloxe “medi3inuri onç’uri madde sibut’ramini” na iz’irinu şeni, go3’os numemnu do “dido k’ap’ineri” ç’arate xe gedvuş k’arari na niçinu. Nazirobaşi timçxupek ognapes, obeziteşi ok’aus ixmaren ç’amepes na doloz’in sibut’ramini coxoni onç’uneri maddes na uğun majura onç’unobape muşi sebebite, hekimişi k’ont’rolite oxmaruşi ren-ya. Timçxupek ç’amişi oxmaru k’oçişi cansağobaşa dido zararoni ren-ya, am ç’amik nusebebasen ağani ğurapes-ya tkes.

KURDURİ P'ANK'ART'İ BELEDİYEK GO3'OK'İDU, P'OLİSİK KOGEİĞU

Hakkarişi ç’it’anoğa Yuksekovas DTP-uri belediyeşi reisi Salih Yildizik remezanişi bayramişen ar dğa 3’oxle Cengiz Topelişi caddes Kurduri “Cejna Remezane Li We Piroz Be Şaredariya Geveri” ç’areli p’ank’art’i go3’ok’idapu. P’ank’art’i ç’it’anoğaşi uoşkoninobaşi direkt’orobaşi ek’ibepeşk’elen geiğinuşi gonk’idoba yeçkindu. Belediyeşi reisi Salih Yildizik p’ank’art’is mahzuroni çkar mutu va ren do eya geğu ugagnaponi ar dulya ren ya tku.

 

Salih Yildizik Yuksekovaşi k’aimak’ami Mehmet Unalik t’ilifonite micoxu-ya, “p’ank’art’i geiğit-ya. Dudp’axi masavekti skani şeni k’abaxat’obaşi ambari ognapasen-ya” do emute ti muşikti “ma am p’ank’art’i var gevimer-ya. Mik giğasen na, geiğas” yado ognapu. P’ank’art’is na noç’ars ç’ara ”Yuksekovalurepes geaxvaman remezanişi bayrami” ren ya na tku Salih Yildizik eşo ğarğalu: “Yuksekovas malime do p’olisiş gale k’artayik ğarğalapan Kurduri. Xalk’i çkinik oxori do sokağis na ğarğalaps nena ren Kurduri. Am Kurduri p’ank’art’i ren bayramişi mesaji. Bayramepe renan xalk’uri so3iologiuri ar m3xade. Avrop’aşi uk’ore3xu dobadonas eyalet’is uk’ore3xu nenape iğarğalinen ofi3ialuri nenaşen ekole. Silopi, Cizre, Şirnak, Diyarbekiris Kurduri p’ank’art’i go3’ik’idinuşi k’abaxat’i var iqven. Muşeni akonaşis k’abaxat’i işinen, var oxoma3’onen. Ekonaşisti masave, hakimi, vali do k’aimak’amepe koren. Derdi va iqven. Aya ren umexondu xalk’işa. Aya k’ai dulya va ren bayramişi dğas. Am p’ank’art’i çkimişk’elen geğinu iqvasunt’u uhak’onoba do uşinoba xalk’işa medgineri.“

SULUK'ULE ARÇKVA VA REN!

Maxalle Neslişah sultanis geladgineri oxori mutepeşis na skidut’u makire dobadonarepek tires muşi eşyape ağani oxori mutepeşis, namupek na geladgin Taşolukis. Am otirobapes nuşvelas yado k’amionepe niçinu Fatih belediyeşk’elen. Ar k’ele ağani oxorepes na skidasunonan şeni ixeles majura k’eleti dido 3’anapeşen doni na skidut’es oxorepe muşişen ok’o3’k’inuşi derdite igemzules. Maxalleşi maskidalepeşen mak’uçxe magamaçale 43 3’aneri Coşkun Yoyenik aşo tku: “Na dovibadi do virdi Suluk’uleşen ok’o3’k’inuşi derdi bzdip. Suluk’ules na pxer oxori şeni mepçap kira 100 Turkuli lira. Taşolukis na pskidaten oxori şeniti mepçaminon 228 Turkuli lira. Mskva ar oxoris na pskidaminon şeni xoloti xelineri vore.”

Oxoşkverot na ixandeps 36 3’aneri Olcay Ozçivik mskva ar oxoris na pskidaminon şeni, xelineri vore-ya, mara-ya meç’ireloba maqvasen-ya oxorişi t’ak’sidepe meçamus-ya do Taşolukişa oxtimu-moxtimu meç’ireli ren-ya tku. Olcay Ozçivik eşo naqonu: “A3’i mevulurt m3’k’upi ar uçkinobaşa. Ekonaşis va miğunan sakvarişi albatoba. Oxandu şeni akonaşişa mopta na, biletişi geç’areli mepçaten. Eti mağala ren. Otxo bere miqonun. Artik ik’itxups dogurales. Taşolukişi doguralekti 3’ilvas goin3’k’asunt’eren. Mtel mzaxalepe domiğures am maxalles. Çare na var miğunan şeni vidaten.” Fatihişi belediyek ikips oağanu p’roekt’i maxallepe Neslişah sultani do Hatice sultanis. Am çerçeves 620 oxori ok’oxvasunonan. Am oxorepes makire na skidunan 34 ocaği iqu oxormance am p’roekt’iten. Suluk’uleluri dobadonarepes 80 m2 do 118 m2-oni jur t’ip’i oxorişen arti o3xunuşi gza i3’irineret’u.

FİLMİ: XÇE ANGELOZİ

Ali do Reşadik kunişi k’anseri baba mutepeşi Mp’olişa moqones k’emoterap’iaşi şvela şeni. Dido monk’a şvelaşen moç’ibru na var unon şeni Axmet’ik imt’en ozabunaleşen. Muşi biç’epek ek’atxozes. Murenki Axmet’ik imt’en. İmt’ert’uşi, amulun ar sotxanişa. Aya ren ar umencelonepeşoxori. Umencelonepeşoxoris na skidun xalk’is açkinen Axmet’i ren berepe muşişk’elen get’k’oçeri ar k’oçi. Edo Axmet’ik ekonaşis entepe k’ala skidas yado dido unonan. Meç’irelobate na ağarğalen Axmet’ik k’abuli ikips am xali. Ali do Reşadik z’iropan baba mutepeşi Axmet’i umencelonepeşoxoris. Mara xelineri na ren şeni, mutu var tkumernan emus ar p’eriodis. Çodina dğalepe muşis baba mutepeşi xelineri oskidu ren dido beciti entepeşa. Bekimda umosi beciti ren am umencolenepeşoxoris oskidu, mutus na var nupelasen mara dido ç’vini na meçasen ar şvelaşen. Umencelonepeşi oxoris na skidun k’arta xçini do badis uğun muşeuri p’aşurape do dramepe. Aya na ognaps Axmet’ik entepes dido naxolosen do aqoropen. Axmet’i st’umari na rt’u dğaşk’uleni dğas umencelonepeşoxoris na skidun Yaşar xoca do Nebahat iocağasunonan. Am k’oçepes arşvacis na anebu Axmet’is unon meçamu ç’andaşi meşarefepe. Xe-xes meçamute ar ç’anda ikipan. Amute na var ibağen Axmet’ik uç’andeps ağan çil-komoli Diyarbekirişa, muşi oput’eşa topuriştuta şeni. Xvala entepe var, umencelonepeşoxoris na skidunan mtel xalk’i ren ç’andineri am magzalobaşa. Bekimda genomskide ora mutepeşis aşo ar fursat’i arçkva na var aqvasenan xçini do badepek o3’k’ernan am tek’lifis k’ai tolite. Arto na nukirales ar minibusite gzas gedgitunan. Mara var iqven magzaloba mutepeşi eşo misa. Entepeşi onç’eloni ambarepe ignapen magzalobate arto.

Maktale: Mahsun Kirmizigul; Senario: Mahsun Kirmizigul; Masağalepe: Mahsun Kirmizigul, Ali Surmeli, Arif Erkin, Cezmi Baskin, Erol Gunaydin; Filmişi sort’i: Drama; Xvenaşi 3’ana: 2007; Xvenaşi dobadona: Turkia; Originaluri nena muşi: Turkuli; Filmişi nak’onoba: 115 deik’e; Magoşobğaluri firma: Boyut Film

TEAT'Rİ: Z'EGNE GONCAGULİ

Ortaoinişi muşeurobate Oktay Arayicik 1977 3’anas na ç’aru do Timur Selçukikti musik’ape muşi na nubestinu do a3’işakis uk’ore3xu farate na isahninu p’iesak mo3’irapan, xalk’iş doloxe oxorcas na uğun roli do ocağobaşi xali k’omediate. İnsaf xanumis kimoli uğurun. Emuşkule k’arta çare gorups. İnsaf xanumik kogeoç’k’aps çarepe oz’irus, ar xampa kimoli moçkvinu şeni k’ulani muşis. Emuk na gorups ondi ren paxali oskiduşi derdişen moçitu. Ar dğas, nosis muxteps dido mutxişi ar simada. Edo gonk’vatups ognapa meçamus okimocu şeni gazetapeşa z’egne “Goncaguli”te. Jurneçidosumeneçi k’onari namzeti sicapeşi şkas na goşo3xunes k’oçepe k’ala İnsaf xanumi do Gulsuniş şkas na mek’ilaps oz’i3oni, t’ragik’omediuri oğadapa ignapinen Timur Selçukişi musik’a k’ala arto.

Maç’are: Oktay Arayici; Maktale: Taner Barlas; Dek’orişi masimadale: Ozhan Ozdil; K’ost’umişi masimadale: Nihal Kaplangi; Musik’a: Timur Selçuk; Te: Fatih Mehmet Haroğlu; Efekt’iaşi masimadale: Levent Akman; K’oreografia: Yasemin Gezgin; Dramat’urgi: Hatice Yurtduru; Manuşvaluri maktale: Ersin Umulu; Manuşvalepe: Zafer Kirşan, Enes Mazak; Masağalepe: Sema Keçik, Hasibe Eren, Rahmi Elhan, Mehmet Bulduk, Kutay Kirşehirlioğlu, Mahperi Mertoğlu, Ahmet Ozarslan, Sezai Aydin, Zafer Kirşan, Enes Mazak (Mp’olişi noğaluri k’inoteat’ri)

GREVİ GREK'İAS

Grek’iaşi madulyuri sendik’apeşi federa3ia (GESEE) do Grek’iaşi oxen3aluri madulyepeşi k’onfedera3iaşi (ADEDY) coxinate ixvenu grevi Grek’ias. Grevis ak’atu oxen3aluri k’idalepe, svaluri oktala, bank’a, xarcişi dairepe, post’a, elekt’rik’i do 3’k’arişi dulyapes na ixandeps maamagepek. Magamantanepe do namtini advok’at’epekti numxvacu grevis. T’erit’oria At’ik’as na geladgin oxen3aluri ozabunalepeşi maxandepekti ak’atu grevis. Mara uoşkorinoba do aciluri burmepek naqones odulyoba meçamus. P’resa do gamaçkvalaşi organepes na ixandepanpekti qu 24 saat’oni grevi. Var ak’ates p’resişi ok’oxtalapes. Oxen3aluri do muşeuri t’eleviziapeşi arxepe, radiopeşi st’an3iape do ambaruli oagent’alepekti var gamoçkves ambari. İnt’ernet’işi sait’epekti var oağanes gverdepe muşi. Grevis na ak’atespek qves demonst’ra3ia Atina, Selanik’i do çkva noğapes.

MGVANEROBAŞİ GENİ KOİZ'İRU

Harvardişi universit’eşi genet’ik’uri do k’omp’leksuri zabunobapeşi burmeşi dudmaxvence p’rofesori dokt’ori Gokhan S. Hotamişligili do muşi ek’ibik uçapurpus yağişi sintezis gebaz’gute uçapurpuşi oyağinus gza na var meçaps, adaleşi şvalasti insulinis na nungaps ar dulya ikips do adaleşi şvalas glik’ozişi amaxtimu na iastaxolonapaps ağani ar hormonişi renoba o3’ires. Gokhan S. Hotamişligili do muşi ek’ibişi çodina çkinaperuli xvena gamiçkvinu “Cell” coxoni lit’erat’uruli jurnalisti. Gokhan S. Hotamişligilik ağanz’ireli hormoni, ar p’rot’eini vardo “yağişi molek’ula” na ren am dulyaşi irişen k’ai na iz’iren k’valifik’a3ia ren yado ognapu. Gokhan S. Hotamişligilik entepe tku: “Am yağişi xasieti na uğun iptineri hormoni ren do “lip’ok’ini” gevodvit am k’at’egoris na dolodgin molek’ulapes. Aşo ar akt’iuroba oz’iru şeni, “lip’idomiksi” na gevodvit ağani ar t’eknologiaşi p’lat’formik memarges am dulyas. Mk’ulot, genepes o3’k’edute “genomiksi”, p’rot’einepes o3’k’edute “p’rot’eomiksi”şi t’eknologiaşi oxmarus artneri pasoni na ren p’lat’forma vixmarit yağepes. 500 çkvadoçkva yağişi molek’ula vo3’irit mağalandğuloni ar t’eknik’ate. Çkvadoçkva şvalapes, kobz’irit oktirobape mgvaneroba do diabet’i steri zabunobapeşi oras. Ok’uleti am hormoni vo3’mindinit do xuraş doloxe onç’onobape do met’abolizma na nun3’uranups roli muşi vo3’irit. Ar k’ele iptinerot irişen ağani ar k’onsep’t’i gamotku şeni, majura k’ele emuşk’ule am ç’eşidi molek’ulapeşi çkva akt’iurobape do zabunobapeşi rolepeş gamatanus ağani ar spero na gon3’k’asen şeni, masuma k’eleti aşo Ğormoturi odudepeşen moxtimeri ar hormoni oxanduşa ağani fursat’epe momçasunonan şeni, aya ren biomedi3inaluri çkinaperobas k’lasik’uri iqvasunon yado visimadep.”

T'RAFİK'İŞİ K'EZA K'ONYAS

Na momixtes ambarite, 48 SA 525 p’lak’oni avt’omobili k’ala 42 HT 305 p’lak’oni avt’omobili melenk’elendon mulut’esşi, K’onya-Aksarayiş gzaşi 53. k’ilomet’res kok’vaç’apxes. Aksarayis na skidun mzaxalepe mok’itxuşen na goiktet’u Mehmet Buyuksaçlik na goçumert’u 42 HT 305 p’lak’oni avt’omobili k’ala Volkan Biçakçik na goçumert’u 48 SA 525 p’lak’oni avt’omobilik K’onya-Aksarayiş gzaşi 53. k’ilomet’res kok’vaç’apxes. Na yeçkindu k’ezas jur avt’omobilişi maktale k’ala Buyuksaçlik na goçumert’u avt’omobilis na rt’u 34 3’aneri Nazmiye, 17 3’aneri Ethem do 4 3’aneri Osman Nuri Buyuksaçlik meçes şuri mutepeşi Ğormotis. K’ezas iyaralinu xuti şurişen 13 3’aneri Ayten do 11 3’aneri Zehra Buyuksaçli k’ala skidaluri oşkurinoba na uğun Esma coxoni ar bereşi minobape oxui3’onu. Mara majura jur yaralinerişi minobape 3’oxle na var oxui3’onu, ignapinu. K’ezaşi adliuri goşogora ixvenen. K’ezaşi sebebite, gza t’rafik’işa geink’ilu nanç’inerot 30 deik’e.

1 Gimua 1956: Maç’are Eflatun Cem Guneyis niçinu Andersenişi op’aramituri p’rizi.
2 Gimua 1923: Çodina itilafuri diviziapekti kok’ui3’k’es Mp’olişen.
3 Gimua 1990: Yulva do geulva Germania kok’oinç’u.
4 Gimua 1965: K’ubaşi go3’oncğoneri Fidel K’ast’rok Che Guevarak K’ubaşen kok’ui3’k’u imp’erializmaşa medgineri ok’vak’idu şeni yado ognapu.
5 Gimua 1908: Bulgariak ognapu muşi timoşletineroba Osmanuri dobadonaşen.
6 Gimua 1973: Egvipt’ia do Suriak nank’ap’u İsraelişa jur front’işen.
7 Gimua 1993: Madonna Mp’olis ren. Çinoberi p’op’işi muru3xik meçu k’on3ert’i 50 vitoş şurişa st’adiumi İnonus.
8 Gimua 1958: Eyup Xanik xe gedvu xe3alas darbete Pakistanis.
9 Gimua 1967: Argent’inuri gerillaşi go3’oncğoneri, K’ubaşi gektalaşi go3’oncğonerepeşen Che Guevara iqvilinu Bolivias.
10 Gimua 1993: 74 3’aneri Andreas Papandreu i3xunu dudnaziri Grek’iaşa.
11 Gimua 1980: Fezas 185 dğaş morgvalis oskidute rek’ordi na qves Sovyeturi k’ozmonavt’epek goiktes kianaşa.
12 Gimua 1492: Cenovauri mazoğari Krist’ofi K’olombik k’uçxe geobaz’gu Amerik’as.
13 Gimua 1973: Muzisieni Vict’or Jara k’urşumite iqvilinu, xepe muşi ok’oik’vatuşk’ule.
14 Gimua 1979: Timoşletineri k’andidat’i Fikri Sonmezi i3xunu belediyeşi reisi Fatsaşa.
15 Gimua 1878: Mak’idepe, mak’uçxeşmodvalepe do terzepeşi madulyepek qves grevi Mp’olis.
16 Gimua 1924: Topkapişi sarayi guin3’k’u mok’itxuşa muzeumot.
17 Gimua 1938: Ataturkik amaxtu iptineri monk’a k’omaşa.
18 Gimua 1943: Ulvi Cemal Erkin do Necil Kazim Aksesik meçu gecgineri ar k’on3ert’i Berlinis.
19 Gimua 1945: Ank’araşi universit’eşi medi3inaşi fak’ult’e guin3’k’u.
20 Gimua 1969: Mp’oliş belediyeşi meclisik noxi do k’ilimepe xvalot tutaçxapes ipatxasen yado ognapu.
21 Gimua 1999: Oguruşi mak’ature do magazete mç’arale p’rofesori Ahmet Taner Kişlali iqvilunu bombaloni ar nank’ap’as.
22 Gimua 1938: Çester K’arlsonik yoçkindu fot’ok’op’ia.
23 Gimua 1972: Zonguldağis jur noşkerişi k’eras grizu t’k’va3u: 20 madulye doğuru, 76 madulye iyaralinu.
24 Gimua 1975: Turkiaşi didelçi İsmail Erez do şofori muşi iqvilinu P’arisis, Sumexi milit’ant’epeşk’elen.
25 Gimua 1929: Mp’oli-Berlinişi şkas kogeoç’k’u “havaşi p’osta”.
26 Gimua 1951: 77 3’aneri Vinst’on Çurçilik iqu İngiltereşi dudnaziri ağanburot.
27 Gimua 1922: Faşist’epek Romaşa igzales xe3alas xe gedves Benit’o Mussolinişi go3’vancğonute İt’alias.
28 Gimua 1940: İt’aliuri malimepek amaxtes Grek’iaşa.
29 Gimua 1956: İsraelişi armiak mek’axtu Egvipt’iaşi hududi. Gverdk’un3’ula Sinas xe gedvu.
30 Gimua 1983: Erzurumi do K’arsis dixaşk’ank’ala: 1330 şuri doğuru. 534 şuri diyaralu.
31 Gimua 1963: 50 fara na3ionaluri forma na dolikunu Fenerbahçeuri mafut’bole Lefter Kuçukandonyadisis niçinu xçetomanobaşi medali.

İST'ORİA, ÇKİN NA MOGURES STERİ VA REN!

Mp’oliş arkeologiaşi muzeumepeşi direkt’ori do marmarayiş ontxoruşi dudmaxvence dokt’ori İsmail Karamutik, Yenikapis ontxoruşi dulyapes 4 3’anaşi doloxe 58 vitoş m2-oni ar dixa intxorinu-ya tku: “4 3’anaş doloxe dido beciti ist’oriuli oz’irobape, xeşnoxvenepe kobz’irit. 33 k’aravi gamiqoninu. Zoğaşen 6 met’re tude, T’eodosiusiş limanişi tude iz’irinu 4 k’oçişi sk’elet’i. Am sk’elet’epe renan K.3’. 6000-6500 3’anapeşen genomskide. Aya ren dido gak’vironi oz’iramoba. Mp’olişi ist’oria dudişen na noç’arapasen ar xali ren do emuşeni.

 

Mp’olişi gomorgvas, neolituri p’eriodişen genomskide xeşnoxvenepe iz’irineret’u. Mara Mp’olis neolituri p’eriodişen genomskide xeşnoxvenepe var iz’ireneret’u. İst’oriuli k’un3’ulas gamaviqonit aşo ondepe iptinerot. Ontxorobapes pi3arişi eşyape, dudoçvaluri silaxepeti kobz’irit. Ontxoruşi semt’i ren, abja Lixosik Marmaraşzoğa k’ala na ok’oik’atenan soti. Eşo iz’iren, andğanerdğaşen 8000-8500 3’ana ekole, ar oput’e geladgit’u am semt’is do oput’arepekti skidutes maskindinoba do xaçkate. K’oçepek maavoba do mak’orobaleşen dobargeri skidala do xaçkaşi skidalaşa na mek’iles p’eriodis, aşo ptkvat neolituri oras na ixmart’es malzemepe miçkinan. Yenikapis z’ireli malzemepe, xususurotti k’eramik’uri finçapek mo3’irapan, entepe ren neolitiuri oraşen genomskide. Yenikapis z’ireli k’eramik’uli finçape k’ala Çatalhoyukis neolitiuri oras z’ireli k’eramik’uri finçapes didi mengaperobape na uğunan, oxovo3’onit.”

Neolitiuri ora (K.3’. 8000-5500) varna majura coxo muşite ciloni kvaş oras, 3’oxleni orapeşen umosi k’ap’et’i do on3’orineri kvaş aletepe ixvenu. Let’a varna kilite xveneri angepe igibinu. Emuteti kogeoç’k’u k’eramik’aşi xeşnoxvenoba. Em orapeşi xalk’ik imağalu çkinapoba do t’eknik’a 3’oxleni orapeşi xalk’is na uğut’uşen ekole. K’oçepek naşkves maavoba do ulet’aloba do obarguşi skidalaşa mek’axtimukti kogeoç’k’u em p’eriodis. Artikartis xolosi ocağepek artot ar svas doxunute 3’opxes oput’epe. Aşopete ik’idinu iptineri oput’epe ist’orias. Emuşen met’a, k’oçepek kogeoç’k’es çxvari omralus. Skindinape koxumç’k’ines. Maxarcale rt’es do niktes mamrale. K’omer3iuli skidala kogeoç’k’u iptinerot. Neolitiuri gektalak yeçkindu oşkenayulva, 3’oxleasia, mendrayulva steri mçire do on3’uraneri abjape didopete na geladgin semt’epes.

ÇİNUREPEK QVES QALBİ İPHONE 3G

Turkias p’iasaşa na gamaxtu ar doloni na var iqu iphone 3g-şi qalbi niçinu p’iasaşa. Turkuli menu na uğun qalbi ap’arat’is meşidven t’k’ubi sim k’arti’. 1500 Amerik’uri dolaroni iphones inadi qalbi ap’arat’işi pasi ren xvalot 120 Amerik’uri dolari. T’eknologiaşi devi Applek Turkias gsm-şi op’erat’orepeşi xete na gamaçaps ağani artikartisoburi ap’arat’epe iphones Turkuli menu var uğuntina, Çinişen moxtimeri qalbi iphones uğun mtelot Turkuli menupeti. Qalbi mali oxvenus “ust’at’oba” mutepeşiten na içkinen Çinurepek Turkiasti na gamiçinen mobiluri artikartisoburi ap’arat’i iphoneşi qalbi qves.

Turkuli menuti na uğun Çinişi noxvene iphones meşidven t’k’ubi sim k’art’i. Çinis maelekt’ronik’epe do bazarepes na gamiçinen qalbi iphoneşi pasiti ten nanç’inerot 800 yuani (120 Amerik’uri dolari). Ap’arat’işi k’ilifis noç’ars xvala “phone”. K’ut’işi doloxe doloz’in ar şarjişi ap’arat’i, 2 p’ili do ar qucişognale. Originali muşite eşo-aşo ar na ren qalbi iphoneşi marifet’epek k’oçis gaak’virapaps. Nenaşi o3xunuşi menus uğun Turkuli k’ala Rusuli, Arabuli, İnglisuri, Germanuri, Frangiuri, İt’aliuri, Esp’anuri, P’ort’ugaliuri, T’ailanduri, Viet’namuri steri 12 nena.

K'OROŞİ SENDROMİ!

İzmiruli mamobilye Erol Çamik, qole muşi xuraşa amuxtasen do gundunasen yado nisimadu avt’omobilişi magzalobas 12 3’ana ekole. Am şkurinate dok’rotu mtelot. Şkurina muşi na var gundunu şeni, 42 3’aneri Erol Çamis varti avt’obusis do varti velosp’edis geaxunu dido 3’anapeşen doni. İdu k’arta svaşa k’uçxete. Aşopeteti, k’uçxete na agzalu svalepeş gale na duskidu obargalepe k’ala artikartisoba eluç’k’odu. Egeşi universit’eşi ozabunales, muşi zabunobas geidvinu “k’oroşi sendromi”.

Am zabunobaşi sebebite, “var axanden”şi rap’ori na niçinu mamobilyek iqu tek’audi malulurot. Mara ozabunaleşa na var alu şeni, gundunu tek’audobaşi hak’i. Dudişen xeşpasi go3’oğu şeni, xuti 3’ana ekole dava na gon3’k’u mamobilyeşa gza niçinu Mp’olişa, adliuri medi3inaşi rap’ori şeni davaşi hakimişk’elen. K’oçik avt’obusi do avt’omobilis na var geaxunen u3’u hakimis. Murenki hakimik var goktiru muşi gonk’vata. Aşopeteti dava doskidu oşkandes. Davas na no3’k’ert’u hakimik tek’audi iquşi, imendu Erol Çamis a3’i davas na no3’k’edasen ağani hakimişen. Egere hakimis var unon na Erol Çamişi Mp’olişa oxtimu k’rima mamobilyes aqvasen tek’audobaşi hak’i. Erol Çamik eşo ognapu muşi derdişi odude: “Ç’it’a bere vort’işi, baba do nanak niza ikipt’es udodginu-ya. Na vogni do bz’iripete viderdi iroras-ya. Vimgari mpulerot-ya. Aha am gurişç’vinepek domixves cansağobaşen-ya. Am derditeti var maçilu-ya”.

P'ORNOGRAFİAŞİ ŞKAGURİ DOÇ'VES

Oç’va yeçkindu Osakas ar oxoktinuşi şkaguris şkviti k’atoni ar binas geladgin “Cats adult video theater” coxoni k’inoteat’ris. Salonişi ç’eri do k’idapes oç’vak kogvak’limu mk’ule oras. Ğurapek didopete k’arbonmonok’sit’işi o3’ink’uten na yeçkindu ignapinu. Seris, saat’i sumis na yeçkindu oğodas 10 şuri, namuşi 4 ren monk’a. Na ğuru şurepeşi minobape goşigorinen.

Oğodaşk’ule, iç’opinu ar şuri ok’undak’u do oqviluşi k’abaxat’ite. Minoba muşi na var ignapinu şurik gazetaşi kart’alite konun3’eren do aşote oç’va na yoçkindu ignapinu. P’olisişi simadate, zanonik nutirafu oç’va na yoçkindu “oskidute doç’k’indineri ren” şeni. Amaxtimoni k’atis na geladgin burmes muşt’erepek nukiralapan do doxmeli odapes nuseyrapan. Am videoşi salonis uğut’eren 32 oda. Am odape ixmaren epi ot’elişi odanot generalurot xalk’işk’elen, namupek na var nanç’uşen çodina t’reni do oxori mutepeşişa na var alen.