|
TURKETİŞİ BANK'APE MUŞENİ İNCUBALİNEN?
Turketişi bank’ape çodinaşi 3’anapes xark’işi k’ap’it’alişk’elen incubalinen. Na golaxtu sum 3’anaş doloxe mebank’elobaşi sek’t’oris, xark’iş k’ap’it’alişi nisp’et’i oşis sumişen oşis eçdovitişa kextu. Muşeni p’ia? Avrop’a do Amerik’aş Ok’ont’aleri Oxen3alepeşi oşi milyar dolaroni divi bank’apek Turketuri ç’it’a bank’ape eç’opupan do Turketişi p’iasaşa amulunan. 3’oxle Halkbanki oqopinot gamaçamuşi list’es na renpeti visimadatşi, xark’işi bank’apek ar-jur 3’anaş doloxe mebank’elobaş sek’t’orişi gverdis xe gedvasunonan. Xark’işi bank’apes Turketişa moxtimu muşeni unonan? Mebank’elobaşi sek’t’ori loqa mogapaşi p’eriodişen manişa imendranet’aşi xark’işi k’oçepe Turketişa mu muiqonops?
Na ixvenu goşogoraşi toliten, divi finan3ialuri inst’it’ut’epes Turketi sum k’rit’ik’uri sebebiten k’ai a3’onenan: Maartani, Amerik’aş Ok’ont’aleri Oxen3alepes do Avrop’as p’iasa yepşeri na ren şeni. Majurani, mordineri terepes mogapaşi marji dido na iç’it’anu şeni. Masumani, p’enet’ra3ioni na itkven bank’a k’ala na ixandeps nak’onoba moxtasneris dido na var muinz’inasunon şeni. Turketi na onç’els İtaliaşi (Uni Credit-İntesa), Fransaşi (BNP Paribas-Societe Generale), Belgiumişi (Fortis-Dexia) do Hollandişi (ABN Amro- Rabobank) bank’apek terepe muşis na uğunan rek’abet’i majura terepeşi doloxeti oxvenu do Avrop’aşi lideroba şeni rek’abet’i oxvenuti (Deutche Bank-BNP Paribas-Uni Credit) majura sebebepeşi oşkendas molişinen.
Xolo goşogoraşi toliten, 2005-2015 p’eriodis Avrop’aşi nak’onoba var iktirasunon do 450 milyonis doskidasunon, bank’aşi muşt’erepes 10 milyoni manz’inasunon do 425 milyoni iqvasunon. Mara Turketişi nak’onoba am p’eriodis 75 milyonişen 80 milyonişa yextasunon, oput’epeşen noğapeşa dobarguşi sebebiten, muşt’erepe 28 milyonişen 48 milyonişa nunç’işasunon. Edo Turketik bank’apeşa mteli Avrop’as na ren muşt’erepeşen 2,8 fara dido muşt’eri meçasunon. Edo xolo, Avrop’as şilya k’onari bank’ak 10 milyoni ağani muşt’eri incubalupt’anşi, Turketis 28 milyoni ağani muşt’eri şeni 25-30 bank’ak icginasunon.
Goşogoraşi toliten, mordineri terepeşi p’iasape z’ğeri na renan şeni divi bank’ape Avrop’a do Amerik’aş Ok’ont’aleri Oxen3alepes var ardenan. Turketik mordinu şeni am bank’apes dido nuşvels. Avrop’aşi terepes bank’apeşi mogapaş marji oşis 0,38 k’onari ren. Mara Turketis mebank’elobaş sek’t’orişi mogapaşi marji oşis 2,5 k’onari ren. Am nisp’et’epek Turketişi mogapaşi marji, Avrop’aşi terepeşen 6,5 fara mağali na ren o3’iraps.
|
TÜRKÇE
