DUDBUT'K'A

ADRENALİNİŞİ ODUDE: SOLAĞANİŞİ SORFİ

K’oçepek muşeni texlik’e qoropan? Miepek texlik’oni sp’ort’epe inç’elnan? Am k’oçepeşi so3ialuri st’at’upe mu ren? Texlik’e skidalaşi ar st’ili ren-i? Am tema şeni xveneri do şigneri çkinaburi ar xanda var ren. Texlik’oni sp’ort’epeşa nç’ela manz’inuşi sebebi var içkinen. Mara namtini çkinerk’oçepek am texlik’oni sp’ort’epe na ikipan k’oçepe şeni, noğaluri skidala na var qoropan, avant’iuraşa gegaperi mitxanepe renan ya zop’onan. Coxo muşişenti na oxoi3’onen steri, texlik’oni sp’ort’epe namtini oras ğuraten, namtini orasti sak’at’obaten içoden. Texlik’oni sp’ort’epe ikipt’anşi na ğureen mitxanepe şeni mç’ipaşaşi çkina var miğunan. Am sp’ort’epeşi organizat’orepek ğuraten na içoden musabak’ape media do xalk’işen mpulupan do emuşeni.

Guramoba na dvaç’iren do risk’oni na ren namtini sp’ort’epe k’arta k’oçis var axvenen. Kianaşi irişen texlik’oni sp’ort’epeşen ar teri na ren solağanişi sorfiti eşo iris var axvenen. Solağanişi sorfi oxvenu şeni, minimalurot vit met’roşen mağaloboni solağanepe dvaç’irs. Am dvaç’iroba sorfi muk’o texlik’oni ar sp’ort’i na ren o3’iramu şeni dubağun. Sorfi, ar oput’e mek’arbuşi menceli na uğun yeğinderi solağanepe na iqven zoğap’icepes, pi3arişi jin balan3iuri dodgituten, solağanepe na muindrik’en k’ele gestvinuten ixvenen. Ekst’remuri sp’ort’epeşen ar teri na ren solağanişi sorfi, Turketis op’t’imaluri p’lajepe na var ren şeni var ixvenen.

Sorfi kianaş mtel zoğap’icepeşi irişen p’rest’ijuri sp’ort’i ren. Mara At’lant’ik’iş ok’ianusişi zoğap’icis na goladgin, San Fransisk’oşi eçidovitojur k’ilomet’ro omjores na ren Maverik’is sorfi oxvenu ek’o perpu var ren. Ar k’ele vitojur met’roni solağanepek, majura k’ele coğorişçxomepek k’oçi oşkurinaps. Mara “diviuri solağanişi mesorfepe” şeni am zoğap’ici cenneti ren. Vitoxut 3’anaş 3’oxle na iz’iru am raionis k’arta qinoras, golaxtimeri 3’anapes na ğuru mesorfepe oşinu şeni ar sorfişi musabak’a i3’opxinen. Majura k’ele ar Amerik’anuri k’erk’elişk’elen, eçidovit met’ro mağaloboni solağanepeşi jin sorfi na qvasunon maartani k’oçis, oşişilya Amerik’anuri dolari niçinasunon yado ignapinu. Ek’o mağali k’oro3xoloni p’rizepek texlik’oni sp’ort’epes onç’elu munz’inaps ya itkven.



                                                                                                                                                              TÜRKÇE