|
İRİŞEN P'AT'İ İMAJONİ TERE: İSRAELİ
İsraeli, kianaşi irişen p’at’i imajoni tere na ren koxoi3’onu. ''National Brand İndex'' coxoni goşogoras, İsraeli kianuri xalk’epeşi tolis, terepeş imajepeşi list’es maçodinale iqu. Eçidovitoxut teres 25.903 k’oçi k’ala na ixvenu goşogoras, investiment’i do t’exişogzalu, galeşgamaçamu, k’ult’ura do k’ult’uruli anderi, xalk’i, maktale do t’urizmişi speropes, xalk’epek am terepe şeni mu isimadepan yado goşigorinu.
GMİ coxoni inst’it’ut’işk’elen na ixvenu goşogorak, İsraeli majura terepeşi oşkendas maçodinale na iqu k’ala goşogora na ixvenu k’arta speros majura terepeşi oşkendas didi çkvaneroba na aquti o3’iru. Goşogoras xolo, İsraelurepeşa kianaşi doloxe mok’itxe irişen ç’it’a na qorops xalk’i oqopinot na i3’k’omilinen oxoi3’onu. Goşogoraşen na oxui3’oni sup’rizi ar temati, İsraelişi xolosoni megabre na ren Amerik’aşi Ok’ont’aleri Oxen3aleş xalk’işi, İsraeli int’erna3ionaluri emniet’i do mo3’qvaşi speropes arxvala Çinişen 3’oxle oz’iramu ren.
Goşogora na ik’oment’aru Simon Anholtik, ''İsraelişi mark’a'' şeni, am indek’sis a3’işakis na ixesap’inu irişen p’at’i imaji uğun do am speropeşi mtelis list’eşi irişen tude doskidu ya tku. Anholtik, ar tereşi p’olit’ik’ak, ar k’oçişi em tere şeni na isimadups mteli simadape uktiraps yado izmons. Anholtik, imaji muşi mtelot oktirus gecgineri oqopinu na unon ar teres, xalepe muşi oktiru dvaç’irs yati tkumers.
Goşogora; Argent’ina, Avust’ralia, Belgiumi, Brazilia, K’anada, Çini, Çek’iş Resp’ublik’a, Denmark’i, Egvipt’i, Est’onia, Fransa, Germania, Hungaria, İndia, İndonezia, İrlandi, İtalia, Jap’onia, Malezia, Meksik’a, Hollandi, Ağani Zelandi, Norvegia, P’olonia, Portugali, Rusia, Singapuri, Omjore Afrik’a, Omjore K’orea, Sp’ania, Svideni, Svitzerlandi, Turkia, Englandi do Amerik’aşi Ok’ont’aleri Oxen3ales ixvenu.
|
TÜRKÇE
