|
DİDİLOBAŞİ HEZEYANİ: MEGALOMANİA
Megalomania varna didilobaşi hezeyani, k’oçişi ti muşi şeni mtinoba na var uğun mağali k’valifik’a3iape memskvanu ren. K’ut’ali ar şuriluri p’roblemişi nişani ren. Megalomania, muşeburi ar zabunoba var rentina dido gvaqironi ar p’sik’ologiuri xali ren. Didilobaşi hezeyanepe k’oçişi xeşmaxvencobape, k’valifik’a3iape do skidalaşi uğnose ocerupeşen yeçkindun. Megalomania, ti muşis becitoba meçamuşi mtinobaşen na mulun dido oceru tkvala var ren.
Megalomania, sum çkvaneri ç’eşidis na iz’iren xalepeşa na niçinen coxo ren. Maartani, generalurot mezezoba, m3udişi oğarğalu, şumerobaşi nişanepe k’ala na iz’iren didilobaşi oceru do xalepeten ar mani oqopinot yeçkindun. Majurani ç’eşidis şizofreniaşi nişanepe iz’iren: Hezeyanepe ek’onari maniuri var iqven. K’oçis didi k’valifik’a3iape uğun do menceli do xampobaşi mance ren yado gya3’onen. Am ç’eşidi megalomanias didopeten çkvalepeşi p’at’inobas dolilinu yado hezeyanepe iz’iren. Masumani ç’eşiduri megalomanias, k’ronik’uri firengişi infek3iaşen yeçkinderi kunişi zabunoba iz’iren. Murenki, firengişi maartani nişanepe namtini oras var iz’iren do gyoç’k’aşi nişanepe manişa gondunun mara mik’roorganizmak ak’t’iva3ia muşis naqonops. Kunis na goşibğen infek3iak osimadu do ozmonuşi xeşmaxvencoba ok’oxups, dep’re3iaşa, megalomaniaşa do çkvaneri hezeyanepeşa sebebi meçaps.
Megalomanias, çkar mtinoba na var uğun hezeyanepe aqven. Mesela, fuk’ara ar megalomanik kianaşi irişen xampa k’oçi na ren steri dulyape ikips, ağani na içinu k’arta k’oçis mağali rak’amoni çek’epe ç’arups. Şvela, megalomania na yoçkindaps sebebişa mek’ireli ren. Mani do şizofrenia k’ala artot iz’iraşi, ç’ami do p’sik’ot’erapi k’ala ik’ont’rolinen. Mtelot ok’auşi garant’ia var rennati m3ika in3’uraninen. Sebebi muşi firengişi infek3ia ren na, generalurot penisilini k’ala na ixvenen aciluri şvelaşa gyoç’k’inu dvaç’irs. Şvelaşk’ule mtelot ok’au varna stat’ik’uri on3’uranu iz’iren.
|
TÜRKÇE
