DUDBUT'K'A

TURKİAŞİ XALK'İK ARMENİA ŞENİ MU İSİMADUPS?

Genosisiş M3udilobaşa Nodgitinuşi Fondişk’elen na ixvenu ar ank’et’i k’ala Turkiaşi xalk’ik, Turkiaşi Armenia k’ala so3ialuri do ek’onomik’uri k’ont’akt’i oxvenuşa muç’o o3’k’ernanşi oxo3’onuşa ixandinu. Erzurumi, Mp’oli do Ankaras 8.714 adami k’ala na ixvenu ank’et’ik, Turkiaş xalk’işi oşis otxoneçdojurik Armeniak namtini şart’epe qu na Yerevani k’ala ok’ont’akt’uşa k’ai na o3’k’ernan oxo3’onapu.

Xandas, Turkiaşi xalk’ik so3ialuri do ek’onomik’uri k’ont’akt’i oxvenu şeni Armeniaşen “oxat’iru” do “m3udişi genosisişi iddiapeşen uceru” steri mutxanepe na çumers oxoi3’onu. Ank’et’is na ak’atupeşen oşis 53 k’onari na 3’opxups 4 vitoşi 618 adamik, Ermenepe, Maartani Kianaş Limaşi oras na qu genosisepeşi sebebişen Turkialurepeşen xat’iroba ak’vandu, Armenias na ren genosisişi monument’i doloxvu do dudk’anoni mutepeşis Turkialurepe do Turkiaşi let’ape şeni ç’areli na ren p’at’i madde do tkvalape ojilu, diasp’ora k’ala k’ont’akt’i mutepeşi mek’vatu do genosisişen uceru do xe na gedves K’arabağişen gamaxtimuşi şart’epe qvan na, Turkiak Armenia k’ala k’ont’akt’i axvenen yado simadape na uğunan oxoi3’onu.

Armeniak Avrop’a do Amerik’aşi Ok’ont’aleri Oxen3ales na skidunan diasp’ora k’ala k’ont’akt’i mutepeşi meç’k’vidu do genosisi k’abuli uoqopinu dialogişi geç’k’inu şeni dobağineri ren ya zop’onanşi nisp’et’i oşis 16, “Jur tereşi oşkendas dialogişa geç’k’inu şeni Ermenepes, Maartani Kianaş Limaşi oras na qu genosisepeşi sebebişen Turkialurepeşen xat’iroba ak’vandu dvaç’irnan” na zop’onanşi nisp’et’iti oşis 6 iqu. Terepeşoşkenduri so3ialuri do ek’onomik’uri k’ont’akt’i şeni Armeniaşen genosisişi monument’i o3’k’imu do dudk’anoni mutepeşis Turkialurepe do Turkiaşi let’ape şeni ç’areli na ren p’at’i madde do tkvalape gamağinu na unonanpeşi nisp’et’i oşis 5, “Xe na gedves K’arabağişen irişen mk’ule oras gamaxtimu dvaç’irnan” na zop’onanşi nisp’et’i oşis 2 iqu. Ank’et’is na ak’atesşi oşis 18 na 3’opxups 1.568 adamisti çkar xalis Armenia k’ala k’ont’akt’i oxvenu na var unonan oxoi3’onu.

Genosisiş M3udilobaşa Nodgitinuşi Fondişi Dudmaxvence Mnş. Doç. Dr. Savaş Eğilmezik, ank’et’ik na mo3’iresşi toliten, Turkiaşi xalk’ik didopeten, Ermeni piralepek genosisepe, t’erorist’uri ak’3iape qvesnati, namtini şart’epe ixvenu na, Ermenepe k’ala p’olit’ik’uri do ek’onomik’uri k’ont’akt’işi geç’k’inuşa k’eleneri na renan oxoi3’onu ya tku. Ank’et’işi çodinalepe 3’oxle Armeniaşi P’rezident’i Robert Koçaryanişa oqopinot, temaşa k’eleneri do uk’eleneri mteli p’rezident’epe do galendulyaşi ofi3ialuri k’oçepeşa vuncğonit na tku Eğilmezik, “Bolaki p’roblemaşi o3’k’eşa ç’it’a ar mxuci meçamu domaqvernan” yado ğarğalu.



                                                                                                                                                              TÜRKÇE